काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले एमसीसी सम्झौताको संसद्बाट अनुमोदन भएको विषयमा पार्टीका नेताहरुले गरेको विरोधप्रति असन्तुष्टि जनाएका छन्। एमसीसीको विरोध गरेर कार्यकर्ता र जनताको समर्थन बटुल्न सकिन्छ भन्ने नसोच्न पनि प्रचण्डले चेतावनी दिएका छन्।
व्याख्यात्मक घोषणासहित एमसीसी सम्झौता संसद्बाट अनुमोदन भएपछि सार्वजनिक रुपमा विरोध जनाउने पार्टीका नेता नारायणकाजी श्रेष्ठ सहितका नेताहरुलाई प्रचण्डले एमसीसीका विषयमा 'सेन्टिमेन्ट'मा नआउन पनि आग्रह गरे।
आफ्नै निवास खुमलटारमा सञ्चारकर्मीसँग कुरा गर्दै प्रचण्डले पार्टीका नेता नारायणकाजी श्रेष्ठलाई असहमति भएपनि सार्वजनिक रुपमा नबोल्न आग्रह गरेपनि बोलेको भन्दै असन्तुष्टि पोखे।
‘नारायणकाजी श्रेष्ठ कमरेडले बैठकमा असहमती राख्नुभयो। तपाईंलाई मतभेद राख्ने अधिकार पार्टीमा हुन्छ। तपाईंको विचारलाई सम्मान गरिन्छ,’ प्रचण्डले भने, ‘अब केन्द्रीय समिति बैठक आउँदै छ। त्यसमा व्यवस्थित रुपमा राख्नुहोला। त्यसो हुँदा केही आपत्ति हुँदैन। म सम्मानै गर्छु।’
एमसीसीको विरोध गर्दा भएभरका कार्यकर्ता र सबै जन्ता आफूतिर केन्द्रित हुन्छन् भन्ने नठान्न पनि प्रचण्डले श्रेष्ठलाई आग्रह गरे।
‘एमसीसीको विरोध गरे भएभरका सबै कार्यकर्ता मतिर केन्द्रित हुन्छन् भन्ने ठान्नु भएको होला। जनता सबै मतिर ह्वार्रै आउँछन् भन्ने ठान्नु भएको होला। एमसीसीको विरोध गर्न वित्तिकै सबै जनता आउँने भए प्रेम सुवालले लगातार मुर्दावादका मुर्दावाद गरि रहनुभएको छ। नेपालभरका सबै उहाँतिर जानु पर्ने हो, तर त्यस्तो हुँदैन।’
महाकाली सन्धिमा एमालेले राष्ट्रघात गरेको भन्दै वामदेव गौतमले पार्टीबाट आधा केन्द्रीय सदस्य लगेपनि चुनावमा शून्य भएको विषयलाई प्रचण्डले स्मरण गराए। ‘तत्कालीन एमालेले महाकालीमा राष्ट्रघात गर्यो भनेर वामदेवजी पार्टी केन्द्रीय समितिको आधा लिएर जानुभयो। भोट आउने बेला जिरो भयो,’ प्रचण्डले भने, 'त्यसैले एमसीसीमा कोही सेन्टिमेन्टमा आउँन जरुरी छैन। त्यसमा सबै स्पष्ट हुनु पर्छ।’
व्याख्यात्मक घोषणाका विषयमा स्पष्ट भएपछि मात्रै आफू एमसीसी पारित गर्न सहमत भएको पनि प्रचण्डले दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
