काठमाडौं– मिलेनियम च्यालेञ्ज कर्पोरेशन (एमसीसी) अनुमोदनको विषयलाई लिएर सत्ता गठबन्धन दलहरुबीचमा नै विवाद भइरहेका बेला आज बस्ने संसद् बैठक अघि उनीहरू आन्तरिक छलफलमा जुटेका छन्।
बिहानै देखि सत्ता साझेदार दलहरु आन्तरिक छलफल गरिरहेका छन्। नेपाली कांग्रेस पनि आन्तरिक छलफलमा जुटेको छ। प्रधानमन्त्रीको सरकारी निवास बालुवाटारमा प्रधानमन्त्री एवम् पार्टी सभापति शेरबहादुर देउवाले शीर्ष नेताहरुसँग छलफल गर्दै छन्। छलफलमा एमसीसी अनुमोदन गर्ने विषयमा नै कुराकानी हुने बताइएको छ। गएराति बनेको सहमतिलाई अन्तिम रुप दिने बारे आजको बैठकमा छलफल हुने भएको छ।
यस्तै नेकपा माओवादी केन्द्रको शीर्ष नेताहरुको बैठक पनि खुमलटारमा जारी छ। अध्यक्ष पुष्पकमल दाहालको निवासमा बिहानैदेखि निवर्तमान स्थायी समितिमा रहेका नेताहरु छलफल गरिरहेका छन्। नेकपा माओवादी केन्द्रका नेता गणेश साहले एमसीसी व्याख्यात्मक रुपमा अनुमोदन हुने भएपछि पार्टीबाट अनुमोदन गर्न छलफल भइरहेको जानकारी दिए।
यस्तै सत्ता साझेदार अर्को दल नेकपा एकीकृत समाजवादीको पनि बैठक बस्दैछ। बिहान ११ बजे स्थायी कमिटीको बैठक बस्न लागेको एक नेताले जानकारी दिए।
एमसीसी अनुमोदनको विषयलाई लिएर सत्ता गठबन्धन दलहरुबीच लामो समयदेखि विवाद छ। आज प्रतिनिधि सभाको बैठक दिउँसो १ बजे बस्दैछ। बैठकअघि नै सत्ता साझेदार दलहरु पार्टीमा छलफल गरेर यो विषयलाई टुंगोमा पुर्याउन खोजिरहेका छन्। सम्भवतः आजको बैठकबाट नै एमसीसीलाई टुंगोमा पुर्याउने सरकारको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
