काठमाडौं- प्रमुख प्रतिपक्षी दल नेकपा (एमाले)सँगको संवादका लागि सत्तारुढ दलका नेपाली कांग्रेसका नेताहरु बालकोट पुगेका छन्। एमाले अध्यक्ष केपी शर्मा ओलीको निवासमा अहिले दुवै पार्टीका दोस्रो तहका नेताहरुबीच छलफल भइरहेको छ।
शनिबार प्रधानमन्त्री शेरबहादुर देउवा र एमाले अध्यक्ष ओलीबीच पनि भेट हुने कार्यक्रम छ। त्यसअघि दुवै पार्टीका दोस्रो तहका नेताहरुले संवाद गरिरहेका हुन्।
छलफलमा एमालेबाट वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल र उपमहासचिव विष्णु रिमाल छन्। त्यस्तै, कांग्रेसबाट उपसभापति पूर्णबहादुर खड्का, महामन्त्री गगन थापा र सञ्चार तथा सूचना प्रविधि मन्त्री ज्ञानेन्द्रबहादुर कार्की छन्।
अमेरिकी सहयोग परियोजना मिलेनियम च्यालेन्ज कर्पोरेशन (एमसीसी)सँगको सम्झौतालाई प्रतिनिधि सभाबाट अनुमोदन गर्नुपर्ने समयसीमा नजिक आइसक्दा संसद्का प्रमुख दुई शक्तिहरु निरन्तर संवादमा जुटेका छन्।
उनीहरुबीच १२ गते दुई पटक र १३ गते एक पटक छलफल भइसकेको छ। ती छलफलबाट दुई पार्टीबीच केही साझा समझदारी बनेको तर त्यसले अन्तिम रुप नपाइसकेको नेताहरुको भनाइ छ।
प्रतिनिधि सभाको अर्को बैठक आइतबारका लागि बोलाइएको छ। सोमबारभित्र एमसीसी पारित गराइछाड्ने प्रधानमन्त्री शेरबहादुर देउवाको प्रयास छ। एमालेसँग सहमति हुनसके त्यो सहजै पारित हुनसक्छ।
अर्कोतिर, गठबन्धनका दुई दलहरु नेकपा (माओवादी केन्द्र) र नेकपा (एकीकृत समाजवादी)ले एमसीसी पारित नगर्ने भनेर निर्णय नै गरिसकेका छन्।
उनीहरुसँगको संवाद अपेक्षित सकारात्मक हुन नसकेपछि देउवा गठबन्धन भत्काएरै भए पनि एमालेको साथमा एमसीसी पारित गराउन खोजिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
