एमसीसीले ‘रणमैदान’ बनिरहेछ काठमाडौं [तस्बिरहरू]

राजनीति

निमेषजंग राई बिहीबार, फागुन १२, २०७८ १९:२२

काठमाडौं– अमेरिकी सहयोग परियोजना मिलेनियम च्यालेन्स कर्पोरेसन (एमसीसी)सँगको सम्झौताले यतिबेला देश ध्रुविकृत भइरहेको छ।

राजनीतिक अस्थिरता निम्तिरहेको छ। सत्ता गठबन्धन टुट्ने र नयाँ समीकरण बन्ने संकेत देखिएका छन्। देशका प्रमुख पार्टीका शीर्ष नेताहरू सघन छलफलमा छन्।

संसद्‌मा टेबल भइसकेको एमसीसी सम्झौताबारे थप छलफल अघि बढाउने तयारीका लागि आज बिहीबार बोलाइएको प्रतिनिधि सभा बैठक भोलि शुक्रबारका लागि सारिएको छ।

सत्ताको नेतृत्वकर्ता दल नेपाली कांग्रेस जसरी पनि एमसीसी सम्झौता संसद्‌बाट अनुमोदन गराउने पक्षमा छ। सत्ताघटक नेकपा माओवादी केन्द्र र एकीकृत समाजवादी भने विपक्षमा मतदान गर्ने अडानमा छन्। जसपामा दुईधार छ।

सत्ता सहयात्रीले भरथेग नगरेपछि प्रधानमन्त्री शेबरहादुर देउवा प्रमुख प्रतिपक्ष एमालेका अध्यक्ष केपी शर्मा ओली र उक्त पार्टीका शीर्ष नेताहरूसँग 'निर्णायक' छलफलमा छन्।

एमसीसीका कारण देशको राजनीतिक भविष्य अन्योल बनिरहेका बेला सडकमा आन्दोलन चर्किरहेको छ। सडकमा आउनेको संख्या बढिरहेको छ। बिहीबार पनि प्रदर्शनकारी र प्रहरी आमनेसामने भए।

माइतीघर मण्डलबाट सुरू भएको प्रदर्शन बानेश्वरमा पुगेर झडपमा परिणत भयो। संसद् भवन घेराउ गर्न पुगेका प्रदर्शनकारीमाथि प्रहरीले बल प्रयोग गर्‍यो। त्यसक्रममा डडेलधुराका हेमराज अवस्थी गम्भीर घाइते भए। उनको अन्नपूर्ण न्यूरो अस्पतालमा उपचार भइरहेको छ। दिनभर तनावग्रस्त बनेको बानेश्वर क्षेत्रमा देखिएका केही दृश्यहरू :