काठमाडौं– सभामुख अग्निप्रसाद सापकोटाले बोलाएको ‘सर्वदलीय’बैठक सिंहदरबारमा सुरु भएको छ। बैठक सिंहदरबारस्थित अर्थ समितिको हलमा जारी छ।
प्रधानन्यायाधीश चोलेन्द्र शमशेर राणाविरुद्ध दर्ता भएको अविश्वास प्रस्ताव, संसद्को अवरोध लगायतका विषयमा छलफल गर्न सभामुखले बैठक आह्वान गरेका थिए। तर, बैठकमा प्रमुख प्रतिपक्ष एमाले भने अनुपस्थित छ।
बैठकका विषयमा आफूहरूसँग कुनै सरसल्लाह नभएकाले सहभागी नहुने एमाले प्रमुख सचेतक विशाल भट्टराईले बताएका थिए।
'हामीसँग कुनै सरसल्लाह गरिएको छैन। सभामुखले यसअघि बोलाएका कुनैपनि बैठकमा हामी सहभागी भएका छैनौं। आज पनि हुँदैनौं', भट्टराईले नेपाल लाइभसँग भनेका थिए।
प्रधानन्यायाधीश चोलेन्द्रशमशेर राणाविरुद्ध संसद्मा महाभियोग प्रस्ताव दर्ता भएसँगै पछिल्ला राजनीतिक घटनाक्रमको विषयमा छलफलका लागि सभामुख सापकोटाले सर्वदलीय बैठक बोलाएको उनका प्रेस संयोजक श्रीधर न्यौपानेको भनाइ छ। ‘समसायिक विषयमा छलफल गर्न सभामुखज्यूले बैठक बोलाउनुभएको हो,’ न्यौपानेले भने।
बैठकमा कांग्रेस सभापति एवं प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल 'प्रचण्ड', नेकपा एकीकृत समाजवादीका अध्यक्ष माधवकुमार नेपाल, जसपा अध्यक्ष उपेन्द्र यादव, जनमोर्चाकी उपाध्यक्ष एवं सांसद दुर्गा पौडेल, नेमकिपाका सांसद प्रेम सुवाल, कानुनमन्त्री दिलेन्द्रप्रसा बडूलगायत सहभागी छन्।
आइतबार सत्तारुढ दलहरु नेपाली कांग्रेस, नेकपा माओवादी केन्द्र र नेकपा एकीकृत समाजवादीका ९८ जना सांसदहरुले प्रधानन्यायाधीश राणाविरुद्ध महाभियोग दर्ता गरेका छन्।
अर्कोतिर, गत भदौदेखि प्रमुख प्रतिपक्षी दल नेकपा एमालेले संसद् अवरुद्ध गर्दै आएको छ। एमसीसीसँगको सम्झौतालाई सदनबाट अनुमोदन गर्ने विषयमा पनि दलहरु विभाजित छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
