काठमाडौं– फागुन महिनाको लागि बैंक तथा वित्तीय संस्थाले बचतको ब्याजदर बढाएका छन्। फागुन १ गतेबाट लागु हुने गरी वाणिज्य बैंक, विकास बैंक र फाइनान्स कम्पनीले निक्षेपको ब्याजदर बढएका हुन्।
२७ वटै वाणिज्य बैंकले बचतको ब्याजदर बढाएको सूचना सार्वजनिक गरेका छन्। यसअघि गत शुक्रबार बैंकर्स संघले बचतकर्तालाई दिने ब्याजदर बढाउने निर्णय गरेको थियो। संघको निर्णयसँगै बैंकहरुले ब्याजदर बढाएका हुन्।
बैंक तथा वित्तीय संस्थाले हरेकमहिना बचतमा दिने ब्याजदर र कर्जामा लिने ब्याजदर तोक्न पाउँछन्। बेसरेटमा आधारित रहेर ब्याजदर बढाउने वा घटाउने निर्णय गरेको सूचना अघिल्लो महिनाको मसान्तभित्र सार्वजनिक गर्नुपर्ने व्यवस्था रहेको छ।
नेपाल राष्ट्र बैंकले ३ महिनाअघि दोहोरो अंकमा ब्याज नबढाउन वाणिज्य बैंकहरुलाई सर्कुलर जारी गरेको थियो। तर, अहिले भने राष्ट्र बैंकबाटै ब्याजदर बढाउन दबाब आएको एक बैंकरले बताए। निक्षेपको ब्याज नबढाउने हो भने राष्ट्र बैंकले दिने स्थायी तरलता सुविधा (एसएलएफ) को दर बढाउने भनेपछि बैंकर्स संघले शुक्रबार निक्षेपको ब्याजदर बढाउने निर्णय गरेको उनको भनाइ छ। अहिले राष्ट्र बैंकले बैंकहरुलाई दिने एसएलएफको ब्याजदर ५ प्रतिशत छ।
फागुन १ गतेबाटै लागु हुनेगरी विकास बैंक तथा फाइनान्स कम्पनीले पनि बचतको ब्याजदर बढाएका छन्। वाणिज्य बैंकले विकास बैंक तथा फाइनान्स कम्पनीको भन्दा धेरै बचतको ब्याजदर बढाउँदा विकास बैंक तथा वित्त कम्पनीको बचतमा आउने पैसा घट्ने भएकाले ब्याजदर बढाइएको एक विकास बैंकका प्रमुख कार्यकारी अधिकृत बताउँछन्।
कुन वाणिज्य बैंकले बचतमा कति ब्याज दिन्छन्?
२७ वाणिज्य बचतको ब्याजदर बैंकले औसत १०.९७ प्रतिशत दिने गरी सूचना सार्वजनिक गरेका छन्, जसमा २६ बैंकले बचतको ब्याजदर ११.३ प्रतिशत दिने गरी सूचना सार्वजनिक गरेका छन्। कृषि विकास बैंक, नबिल, नेपाल बंगलादेश, सानिमा, मेगा, सिभिल, सिटिजन्स, हिमालयन, नेपाल इन्भेष्टमेन्ट बैंकले बचतकर्तालाई निक्षेपको ब्याज ११.३ प्रतिशत दिने सूचना सार्वजनिक गरेका छन्।
यसैगरी, ग्लोबल आइएमई, कुमारी, लक्ष्मी, माछापुच्छ्रे, एनसीसी, एनएमबि, एनआईसी एसिया, प्रभु, प्राइम, राष्ट्रिय वाणिज्य, नेपाल बैंक, सनराइज, बैंक अफ काठमाण्डू, नेपाल एसबिआई, सेन्चुरी, एभरेष्ट र सिद्धार्थ बैंकले बचतको ब्याजदर ११.३ प्रतिशत दिने निर्णय गरेका छन्।
सबैभन्दा थोरै ब्याजदर दिने बैंक स्ट्यान्डर्ड चार्टर्ड बैंक रहेको छ। यस बैंकको बचतको ब्याजदर भने ९.५० प्रतिशत रहेको छ।
विकास बैंकले कति दिन्छन् ब्याज?
विकास बैंकहरुले पनि निक्षेपको ब्याजदर बढाएका छन्। आइतबारदेखि लागु हुने गरी विकास बैंकहरुले निक्षेपको ब्याजदर अधिकतम ११.६५ प्रतिशतसम्म कायम गर्ने निर्णय गरेका छन्। यसअघि वाणिज्य बैंकहरुले यस्तो ब्याजदर अधिकतम ११.०३ प्रतिशत थियो।
नेपाल राष्ट्र बैंकको नियमानुसार विकास बैंकले ११.६५ प्रतिशतसम्म ब्याजदर दिने डेभलपमेन्ट बैंकर्स संघका अध्यक्ष एवं मुक्तिनाथ विकास बैंकका प्रमुख कार्यकारी अधिकृत (सीईओ) प्रद्युम्न पोखरेलले बताए। ब्याजदर वृद्धिको निर्णयसँगै राष्ट्रियस्तरको विकास बैंकका बचतकर्ताले ११.५५ प्रतिशत र क्षेत्रीयस्तरका विकास बैंकको ब्याजदर ११.६५ प्रतिशत ब्याजदर पाउने पोखरेलको भनाइ छ।
फाइनान्स कम्पनीले कति दिन्छन्?
फाइनान्स कम्पनीले पनि निक्षेपको नयाँ ब्याजदर सार्वजनिक गरेका छन्। फागुनका लागि प्रायः सबै फाइनान्स कम्पनीले व्यक्तिगत मुद्दतीमा अधिकतम ११.७१ प्रतिशत र संस्थागतमा १०.७१ प्रतिशतसम्म ब्याजदर तोकेको नेपाल वित्त संघका अध्यक्ष सरोजकाजी तुलाधरले बताए। उनका अनुसार रेमिट्यान्स एकाउण्टमा राष्ट्र बैंकको व्यवस्था अनुसार १ प्रतिशत बढी ब्याजदर दिँदा १२.७१ प्रतिशत कायम हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
