चलचित्र र उपन्यासमा धेरै मसालेदार चट्ट परेको, पिरो अमिलो मिसिएको चटपटे प्रेम कथा पढ्नु भएकै होला। आज यहाँहरूलाई यस्तो सत्य प्रेमकथा सुनाउन गइरहेको छु, जसलाई सुनेर तपाईंले भन्नुहुनेछ, ‘अरे! यो त कुनै चर्चित फिल्मको कहानी जस्तो छ।’
भनिन्छ पवित्र प्रेमको कहिले अन्त्य हुँदैन, अमर रहन्छ। अजर रहन्छ, कालजयी बन्छ। अनि एउटा प्रसिद्ध भनाइ पनि छ, ‘यदि प्रेम निस्वार्थ छ भने कसैलाई हृदयबाट इमानदार भएर मन पराउनुहुन्छ भने ब्रह्माण्डको शक्तिले नै त्यो प्रेमलाई प्राप्त गर्न सहयोग गर्दछ।’
यस्तै एउटा अदभूत प्रेम किस्सा केटी रोबिन्स मेहज र जिनिन गनेय पियर्सनबीच भएको थियो। यिनीहरूको भेट द्वितीय विश्वयुद्धताका भएको थियो। रोबिन्स अमेरिकन सैनिक थिए, जसको पोस्टिङ फ्रान्सको एउटा गाउँमा भएको थियो। त्यति बेला उनी २४ वर्षका थिए। त्यहीँ गाउँमा जिनिन पनि बस्थिन्, जोसँग पहिलो नजरमै प्रेममा परेका थिए, रोबिन्स।
रोबिन्सले आफ्ना कपडा धुवाउनका लागि धोबीको खोजी गरिरहेका थिए। सो काम गर्नको लागि जिनिनकी आमा तयार भइन्। यसरी रोबिन्स र जिनिनको भेट बाक्लियो। अनि उनीहरूबीच प्रेमको बीज उम्रियो। दुवैले जिन्दगीभर साथसाथ हिँड्ने कसम खाए।
अचानक एउटा यस्तो मोड आयो जिन्दगीमा कि द्वितीय विश्वयुद्ध सुरु भयो। युद्ध सुरु भएलगत्तै रोबिन्स इस्टर्न ओरंटमा जान पर्ने भयो। जानुपूर्व रोबिन्सले जिनिनलाई लिन आउने वाचा गरे। दुर्भाग्यवश युद्ध सकिएपछि रोबिन्सले जिनिनको प्रतीक्षालाई बेवास्ता गरेर अमेरिका गए।
रोबिन्सले अमेरिकामा गएर लिलियन नामीसँग बिहे गरे। सन् २०१५ मा ९२ वर्षको उमेरमा रोबिन्सको श्रीमतीको देहान्त भयो। उता जिनिनले पनि सन् १९४९ मा बिहे गरिन्। समयले उनीहरूको प्रेममा वियोगान्त रेखा कोरे पनि रोबिन्सले जिनिनलाई मनमस्तिष्कबाट निकाल्न सकेका थिएनन्। रोबिन्सले ७५ वर्षदेखि जिनिनको श्यामश्वेत तस्बिर आफूसँगै सम्हालेर राखिरहेका थिए।
समयले छुटाएको प्रेमलाई एक दिन समयले नै यस्तो खेल खेलायो कि कुनै काल्पनिक कथाभन्दा फरक लाग्दैन। एक दिन फ्रान्सको टेलिभिजनमा अन्तर्वार्ता दिने क्रममा रोबिन्सले आफ्नो अधुरो प्रेम कहानी साझा गरे। उनले अन्तर्वार्तामा भने, ‘म जिनिनलाई धेरै प्रेम गर्छु। यदि यहाँहरूले जिनिनलाई खोज्न सहयोग गर्नुभयो भने आभारी हुने थिएँ।’
अन्तर्वार्ता प्रसारण भएको केही दिनमा एक जना पत्रकारले जिनिन र उसका परिवारलाई खोजेरै छाडे। अनि त के चाहिन्थ्यो र, ७५ वर्षको बिछोड मिलनमा परिवर्तन भयो। जिनिन र रोबिन्सको अप्रत्याशित भेट भयो।
उनीहरूको लामो विछोडपछिको मिलनमा एकार्कालाई अँगालो हालेर तिर्सना मेटाए। घण्टौसम्म एकअर्कालाई हेरिरहे। अनि रोबिन्सले आफ्नो वालेटबाट पुरानो फोटो निकालेर जिनिनलाई देखाए। दुवै निकै खुसी भए। जीवनको नयाँ उत्साह छायो।
त्यति बेला वर्षौं पहिलेको संकल्प रोबिन्सले पूरा गरे। अहिले जिनिन ९५ र रोबिन्स १०० वर्षका भए। उनीहरूको प्रेमलाई उमेरले कुनै पर्खाल लगाएन। एउटा निशर्त, निस्वार्थ र पवित्र प्रेमको जित भयो। प्रणय दिवसको दिन उनीहरूको जस्तै पवित्र प्रेम सबैको बनोस्, शुभकामना।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
