फिल्ममा गंगूबाईको भूमिकामा रहेकी आलिया भट्ट (बायाँ) र गंगूबाई।
संजय लीला भंसाली कम फिल्म बनाउँछन्, तर मन मस्तिष्कमा लालमोहर लगाउने गरी बनाउँछन्। उनको पछिल्लो फिल्म `गंगूबाई काठियावाडी´ को ट्रेलरले धमाका मचाइरहेको छ। फिल्ममा गंगुबाईको भूमिकामा देखिएकी आलिया भट्टको दमदार डायलग र अभिनयले दर्शकलाई तानिरहेको छ। ट्रेलरले महिलाप्रधान चलचित्र हो भनेर सहजै अनुमान लगाउन फिल्मका डायलगले थप मद्दत गरेको छ।
-लिखो माँ का नाम गंगूबाई... ( लेख, आमाको नाम गंगूबाई...)
-और बापका नाम... बापका नाम क्या लेखू (अनि बाउको नाम .. बाउको नाम लेखूँ..?)
-माँ का नाम काफी नहि हे ना.. चलो कोहि बात नहि बापका नाम देवानन्द ...(आमाको नाम काफी छैन.. ठीक छ बाउको नाम देवानन्द)
अरे जब शक्ति, सम्पत्ति,सदबुद्धि तिनो हि औरत हे..तो इन मर्दोको किस बातका गुरू? ( जब शक्ति सम्पत्ति, सदबुद्धि तीन वटै महिला हो भने यो पुरुषले के कुराको घमण्ड गर्छ?)
यी माथिका संवादले फिल्ममा महिलाई शक्तिशाली रूपमा देखाइएको छ भन्ने कुराको छनक पाउन सकिन्छ।
`गंगूबाई काठियावाडी´ बायोपिक हो। यो एउटा यस्तो कहानी जसलाई कम सुनिएको छ। गंगूबाईले जीवनको दयनीय स्थिति देखिन्, भोगिन् र समस्यामा समाधान खोजिरहिन्। उनलाई 'माफिया क्वीन' भनेर पनि चिनिन्छ।
***
गंगूबाईको असली नाम गंगा हरजीवन दास कोठियावाडी हो। सन् १९३९ मा गुजरातको काठियावाडमा उनको जन्म भएको हो।
गुजरातको सम्मानित परिवारमा जन्मिएकी गंगूबाई एक्ली छोरी थिइन्। जिन्दगीका उतारचढावले उनलाई अपराधी, डन, यौनकर्मी र 'बिजनेस वुमन' बनायो। ६० को दशकमा उनी माफियाको जीवन गुजार्न थालिन्। उनीसँग कसैको बोल्ने हिम्मत हुँदैन थियो। देशभर उनको कोठीको शाखा फैलिएको थियो।
गंगूबाई सम्मानजनक परिवारमा जन्मिएकी हुन्। उनको परिवारले छोरीले पनि पढ्नु पर्ने भन्ने मान्यता राख्थ्यो। उनको रुचि पढाइमा भन्दा फिल्म क्षेत्रमा थियो। 'हिरोइन' बन्ने सपना पालेकी गंगूबाईको चाहना जसरी पनि मुम्बई प्रवेश गर्ने थियो।
गंगूबाईको पितासँग एकजना लेखापाल काम गर्थे। उनको नाम रमणिक थियो। गुजरात आउनुपूर्व रमणिक मुम्बईमा काम गर्थे। जब गंगूबाईलाई थाहा भयो रमणिक मुम्बईमा काम गरेको मान्छे हो, उनले आफू मुम्बई जाने गोरेटो देखिन थालेको महशुस गरिन्। उनले रमणिकलाई प्रेम गर्न थालिन्। गंगूबाईको घरमा यो कुरा थाहा भएपछि उनीहरूलाई छुटाउने प्रयास भयो। गंगूबाईले रमणिकसँग भागेर बिहे गरिन् र मुम्बई पुगिन्। उनले विवाह गर्दा मात्र १६ वर्षकी थिइन्।
बिहेपछि बेचिइन् काेठीमा
मुम्बई पुगेको केही समयपछि रमणिकले उनलाई एक जना महिलाकोमा लगेर छोडिदिए। ती महिलासँग छोड्दा रमणिकले भनेका थिए, 'उनी मेरो मोसी हुन, मैले घर नखोज्दासम्म तिमी उहाँसँगै बस्नु।' रमणिकले झूट बोलेर उनलाई मात्र ५०० रुपैयाँमा बेचिदिएका थिए। गंगूबाईलाई थाहा थिएन कि उनी मुम्बईको रेडलाइट एरियाको कोठीमा पुगिसकेकी थिइन्।
मुम्बईको रेडलाइट एरिया कमाठीपुरामा उनी सबैसँग अञ्जान थिइन्। उनले आफ्नो यो परिस्थितिसँग सम्झौता गर्न सिक्न थालिसकेकी थिइन्। त्यतिबेला शौकत खान नाम गरेको व्यक्तिले गंगुबाईसँग जबर्जस्ती गर्यो। रातभर उनको तनसँग जनावरको व्यवहार गरेर हालत खराब बनाइदियो। गंगूबाईको स्वास्थ खराब भएपछि अस्पताल भर्ना गराइयो। जब उनी ठीक भइन्, शौकतबारे जानकारी बटुल्न थालिन्। शौकत त्यतिबेला प्रसिद्ध माफिया करिम लालासँग काम गर्छन् भन्ने थाहा भयो।
करिम लालाकोमा पुगेर गंगूबाईले शौकतले गरेका हर्कतबारे वृतान्त कहिन्। त्यसपछि करिम लालाले गंगूबाईको रक्षा गर्ने प्रण लिए। शौकत खानलाई लालाले डरलाग्दो सजाय दिए। करिम लालाले गंगूबाईलाई राखी बाँधेर धर्मबहिनी बनाए। त्यसै दिनदेखि गंगूबाईलाई 'कमाठीपुराको डन' भनेर संबोधन गर्न थालियो। गंगूबाई गंगूको नामले चर्चित हुन थालिन्। मुम्बईका मान्छे जति करिम लालासँग डराउँथे उति नै गंगूबाईसँग पनि डराउन थाले। उनी कुख्यात हुँदै गइन्। रेडलाइट एरियामा काम गर्नेको भविष्यको सकारात्मक चिन्ता गर्न थालिन्।
गंगूबाईले भन्ने गर्थिन, `यदि रेड लाइट एरियामा काम गर्ने महिला नभएका भए मुम्बईमाका अन्य महिला घरबाट निक्लन ग्राहो हुनेछ।´ गंगूबाई आफू यौन व्यवसायमा डुबे पनि कसैलाई जबर्जस्ती यसमा लाग्न बाध्य बनाउँदैन थिइन्। उनले मुम्बईका अनाथका लागि पनि उल्लेखनीय काम गरेकी छिन्। मुम्बईका यौन व्यवसायीहरूको आन्दोलनको उनले नेतृत्व पनि गरेकी थिइन्।
गंगूबाई काठियावाडी : बायोपिक फिल्म
गंगूबाई काठियावाडी फिल्मलाई संजय लीला भंसालीले निर्देशन गरेका छन्। आलिया भट्ट गंगूबाईको भूमिकामा छिन्। यस फिल्ममा अभिनय गर्न आलिया भट्टले काठियावाड भाषा र रेडलाइट एरियामा गरिने अश्लील गाली पनि सिकेकी थिइन्। यस फिल्मको माध्यमबाट गंगूबाईको जीवनको उतारचढावका साथसाथै मुम्बईमा भएका रेड लाइट एरियाका यथार्थसँग पनि परिचित गराइने छ। फिल्ममा अजय देवगन पनि देखिने छन्।
आफूले निर्देशन गरेका फिल्मको प्रदर्शन मिति नजिक आउँदा निर्देशक भंसाली प्राय: विवादमा तानिन्छ्न्। यसपटक पनि उनी विवादमा मुसिएका छन्। गंगूबाईका छोरा बापू जी रावजी शाहले संजय, आलिया, भंसाली प्रोडक्सन र लेखक हुसैन जैदी एवं रिपोर्टर जैन बार्गिङलाई मुद्दा हालेका छन्। गंगूबाईका छोराको आरोप छ कि, फिल्ममा गंगूबाईका विवादित विषय र निजी जानकारीहरूलाई गलत रुपमा प्रस्तुत गरिएको छ।
गंगुबाई काठियावाडी फिल्म एस हुसैनले लेखेको किताब ` माफिया क्वीन इन मुम्बई´ मा आधारित छ। श्रीमानले मात्र ५०० रुपैयाँमा बेचिदिएकी गंगूबाईले नारकीय जीवन भित्रबाट कसरी विशाल साम्राज्यको स्थापना गरिन् भन्ने कथालाई करौडौं दर्शकले प्रतीक्षा गरिरहेका छन्। २५ फेब्रुअरी २०२२ मा फिल्मको रिलिज डेट तय भएको छ।
गंगूबाई सन् २००८ मा ६८ वर्षको उमेरमा यो संसारबाट बिदा भएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1787821306.jpg)
-1786602170.png)
-1786513116.png)
