बैंक/बिमा/सेयर

अधिकांश वाणिज्य बैंकको आधार दर उकालो, एक वर्षमा औसत १.१४ प्रतिशतले महँगियो ऋण

सुमित्रा कार्की बिहीबार, माघ १३, २०७८ ११:२०

काठमाडौं- चालु आर्थिक वर्षको दोस्रो त्रैमाससम्म आउँदा २७ वाणिज्य बैंकको आधार दर (बेस रेट) औसतमा १.१४ प्रतिशतले बढेको छ। गत आर्थिक वर्षको दोस्रो त्रैमाससम्म औसत ७.२३ प्रतिशत रहेको आधार दर चालु आवको सोही अवधिमा औसत ८.३८ प्रतिशत पुगेको छ।

हाल सञ्चालनमा रहेका २७ वाणिज्य बैंकले चालु आवको दोस्रो त्रैमास (पुस मसान्त) सम्मको अपरिष्कृत वित्तीय विवरण सार्वजनिक गरेका छन्। उक्त विवरणअनुसार बैंकहरुको आधार दर गत आर्थिक वर्षको यसै अवधिको भन्दा बढेको हो।

आधार दर प्रत्येक तीन महिनामा संशोधन हुने गर्छ। आधार दर वास्तविक ब्याजदर नभइ ब्याजदर निर्धारण गर्ने औजार मात्रै हो। बैंकहरुले ब्याजदर निर्धारण गर्दा आधार दरमा प्रिमियम थपेर कर्जा लगानी गर्ने गर्दछन्। जस्तै: कुनै बैंकले ६.५ प्रतिशत आधार दर कायम गरेको छ भने त्यस बैंकले त्यो आधार दरमा पाँच प्रतिशतसम्म प्रिमियम थपेर कर्जा लगानी गर्न पाउँछ। बैंकले कर्जा लगानी गर्दा कर्जाको प्रवृत्ति हेरेर त्यहीअनुसार ब्याजदर निर्धारण गर्नसक्ने नेपाल राष्ट्र बैंकले जनाएको छ।

बजारमा तरलता (लगानीयोग्य रकम)को अभाव हुँदा कर्जा र निक्षेपको ब्याजदर बढ्छ। निक्षेप धेरै संकलन भयो भने कर्जाको ब्याजदर घट्ने गर्दछ। राष्ट्र बैंकले वाणिज्य बैंकको कर्जा र निक्षेपको औसत ब्याजदर अन्तर ४.४ प्रतिशतभन्दा बढी हुन नहुने व्यवस्था गरेको छ। यसकारण बैंकहरुले निक्षेपकर्तालाई जति ब्याज दिएका छन्, त्यसको ४.४ प्रतिशतभन्दा बढी कर्जाको ब्याजदर पनि लिन पाउँदैनन्।

कुन बैंकको आधार दर कति बढ्यो?
एक वर्षको अन्तरालमा सबैभन्दा धेरै ब्याजदर बढाउने बैंक हिमालयन बैंक रहेको छ। यस बैंकले एक वर्षको अवधिमा १.९२ प्रतिशतले आधार दर बढाएको छ। गत आर्थिक वर्षको पुस मसान्तसम्म ७.४ प्रतिशत रहेको यस बैंकको आधार दर यस वर्ष ८.३८ प्रतिशत पुगेको छ।

यसैगरी, ब्याजदर धेरै बढाउने दोस्रो बैंक नेपाल एसबीआई रहेको छ। यस बैंकको आधार दर यो एक वर्षको बीचमा १.७१ प्रतिशतले बढेको बैंकले सार्वजनिक गरेको अपरिस्कृत वित्तीय विवरणले देखाउँछ। गत आर्थिक वर्षको पुस मसान्तसम्म ७.२४ प्रतिशत रहेको बैंकको आधार दर गएको पुस मसान्तसम्म आउँदा ८.९५ प्रतिशत पुगेको छ।

यसैगरी, सबैभन्दा धेरै ब्याजदर बढाउने तेस्रो र चौथो बैंकमा क्रमश: सनराइज र नबिल रहेका छन्। यी दुई बैंकको ब्याजदर एक वर्षको अन्तरालमा क्रमशः १.६५ र १.६३ प्रतिशतले बढेको छ।

गत वर्षको यसै अवधिको भन्दा यस वर्षसम्म आउँदा आधार दर घटाउनेमा कृषि विकास बैंक रहेको छ। यो बैंकको आधार दर पुस मसान्तसम्म ७.७३ प्रतिशत रहेको छ। यो गत आर्थिक वर्षको यसै अवधिको भन्दा ०.१४ प्रतिशतले कम हो। गत आर्थिक वर्षको यसै अवधिमा यस बैंकको आधार दर ७.६७ प्रतिशत थियो।

यस अवधिसम्म सबैभन्दा सस्तो ब्याजदर भएको बैंक राष्ट्रिय वाणिज्य बैंक रहेको छ। यो बैंकको आधार दर यस अवधिसम्म ६.६ प्रतिशत रहेको छ। यसैगरी सबैभन्दा सस्तो ब्याजदर भएको अर्को बैंक स्ट्याण्डर्ड चार्टर्ड हो। यो बैंकको आधार दर पुस मसान्तसम्म ६.६३ प्रतिशत रहेको छ।

क्र.सं.	बैंक	२०७८/७९ को आधार दर (प्रतिशतमा)	२०७७/७८ को आधार दर (प्रतिशतमा)	परिवर्तन
१	ग्लोबल आईएमई	७.९९	६.७६	१.२३
२	एनआईसी एसिया	९.४४	७.९४	१.५
३	नबिल	७.३९	५.७६	१.६३
४	राष्ट्रिय वाणिज्य	६.६	५.६१	०.९९
५	प्राइम कमर्सियल	८.९८	७.८५	१.१३
६	नेपाल इन्भेष्टमेन्ट	७.२१	६.५६	०.६५
७	सिद्धार्थ	८.५८	७.३८	१.२
८	कृषि विकास	७.५३	७.६७	-०.१४
९	मेगा	८.७७	७.३५	१.४२
१०	प्रभु	८.६८	७.२५	१.४३
११	सिटिजन्स	९.०८	८.२५	०.८३
१२	स्ट्याण्डर्ड चार्टर्ड	६.८३	६.०७	०.७६
१३	सानिमा	८.०८	६.८३	१.२५
१४	माछापुच्छ्रे	८.७९	७.५६	१.२३
१५	कुमारी	८.९३	७.९२	१.०१
१६	एनसीसी	९.१५	७.९४	१.२१
१७	लक्ष्मी	८.७४	७.२४	१.५
१८	नेपाल बंगलादेश	८.७४	८	०.७४
१९	नेपाल एसबीआई	८.९५	७.२४	१.७१
२०	सेञ्चुरी	८.८२	७.९१	०.९१
२१	बीओके	८.४५	७.६७	०.७८
२२	सिभिल	९.७४	८.४५	१.२९
२३	एभरेष्ट	७.६२	६.३४	१.२८
२४	सनराइज	८.९४	७.२९	१.६५
२५	एनएमबि	८.५८	७.४	१.१८
२६	नेपाल बैंक	६.९२	६.१९	०.७३
२७	हिमालयन	८.७५	६.८३	१.९२
	औसत वार्षिक आधार दर	८.३८	७.२३	१.१५