बैंक/बिमा/सेयर

वाणिज्य बैंकहरुले ६ महिनामा कमाए ३३ अर्ब नाफा, ग्लोबल आईएमई अगाडि

सुमित्रा कार्की सोमबार, माघ १०, २०७८ १८:४७

काठमाडौं- चालु आर्थिक वर्षको छ महिना (साउन-पुस)मा 'क' वर्गका २६ वाणिज्य बैंकले ३३ अर्ब ३६ करोड ५१ लाख रुपैयाँ नाफा कमाएका छन्। सञ्चालनमा रहेका २७ मध्ये २६ वाणिज्य बैंकले चालु आवको दोस्रो त्रैमास (पुस मसान्त) सम्मको अपरिष्कृत वित्तीय विवरण सार्वजनिक गरेका छन्। उक्त विवरणअनुसार बैंकहरुको नाफा ३३ अर्ब रुपैयाँ नाघेको देखिएको हो।

बैंकहरुको नाफा गत आर्थिक वर्षको पुस मसान्तको भन्दा ९.६८ प्रतिशत अर्थात् दुई अर्ब ९४ करोड ५२ लाख रुपैयाँले बढेको छ। गत आवको सोही अवधिसम्म २६ वाणिज्य बैंकले ३० अर्ब ४१ करोड ९९ लाख १७ हजार रुपैयाँ नाफा आर्जन गरेका थिए। बैंक तथा वित्तीय संस्थाले आर्थिक वर्षको दोस्रो त्रैमाससम्मको त्रैमासिक प्रतिवेदन माघ १५ भित्र सार्वजनिक गरिसक्नुपर्ने हुन्छ। सो अनुसार माघ १० गतेसम्ममा २७ मध्ये २६ वाणिज्य बैंकले आफ्नो अर्धवार्षिक प्रतिवेदन सार्वजनिक गरेका छन्।

हिमालयन बैंकले भने यस्तो विवरण सार्वजनिक गरिसकेको छैन। वित्तीय विवरण प्रकाशित गर्ने २० बैंकको नाफा गत आर्थिक वर्षको यसै अवधिको तुलनामा बढेको छ भने छ बैंकको नाफा घटेको छ।

ग्लोबल आईएमई अगाडि
चालु आर्थिक वर्षको दोस्रो त्रैमाससम्म सबैभन्दा धेरै नाफा कमाउनेमा ग्लोबल आईएमई बैंक रहेको छ। उक्त बैंकले यस अवधिमा दुई अर्ब ६६ करोड ३३ लाख रुपैयाँ खुद नाफा आर्जन गरेको विवरण सार्वजनिक गरेको छ। बैंकको नाफा गत वर्षको यसै त्रैमाससम्मको भन्दा १५.०४ प्रतिशतले बढेको हो। गत आर्थिक वर्षको पुस मसान्तसम्म यस बैंकले दुई अर्ब ३१ करोड ५१ लाख रुपैयाँ नाफा कमाएको थियो।

गत आवको यसै अवधिको तुलनामा धेरै नाफा वृद्धि गर्नेमा भने सिभिल बैंक रहेको छ। सिभिलले चालु आर्थिक वर्षको दोस्रो त्रैमाससम्म ५० करोड ४० लाख रुपैयाँ नाफा आर्जन गरेको छ। बैंकको नाफा गत वर्षको यसै अवधिको भन्दा १४७.४७ प्रतिशतले उकालो लागेको हो। गत आर्थिक वर्षको यसै अवधिमा बैंकले २० करोड २८ लाख रुपैयाँमात्र नाफा कमाएको थियो।

चालु आर्थिक वर्षको दोस्रो त्रैमाससम्म दुई अर्ब रुपैयाँभन्दा धेरै नाफा कमाउनेमा ग्लोबल आईएमईपछि एनआईसी एसिया र नबिल बैंक रहेका छन्। यी बैंकले गत आर्थिक वर्षको यसै अवधिको तुलनामा आफ्नो नाफा क्रमशः १६.४७ र ८.२ प्रतिशतले बढाएका छन्।

यसैगरी यस अवधिमा एक अर्ब रुपैयाँभन्दा बढी नाफा कमाउन सफल बैंक १३ वटा रहेका छन्। बाँकी बैंकको नाफा ५० करोडदेखि ९० करोड रुपैयाँसम्मको बीचमा रहेको छ।

६ बैंकको नाफा घट्यो
चालु आर्थिक वर्षको दोस्रो त्रैमाससम्ममा छ वटा वाणिज्य बैंकको नाफामा गिरावट आएको छ। यी ६ बैंकको नाफा गत आर्थिक वर्षको यसै अवधिको भन्दा घटेको हो। यो अवधिमा सबैभन्दा धेरै कुमारी बैंकको नाफा २१.७७ प्रतिशतले घटेको छ।

यसैगरी, धेरै नाफा घट्ने दोस्रो बैंक सनराइज बैंक रहेको छ। यस बैंकको नाफा यस अवधिमा २१.४७ प्रतिशतले घटेको छ। प्रभु बैंकको १६.९० प्रतिशत, नेपाल बंगलादेश बैंकको १३.७८, एभरेष्टको १२.७९ र प्राइमको ७.४३ प्रतिशतले नाफा घटेको छ।

यस्तो बैंकहरुको नाफा (रु. हजारमा)

क्र.सं.	बैंक	आव २०७८/७९ (६ महिना)	आव २०७७/७८ (६ महिना)	परिवर्तन (प्रतिशत)
१	ग्लोबल आईएमई	२,६६३,३८४	२,३१५,११८	१५.०४
२	एनआईसी एसिया	२,४००,०००	२,०६०,५३७	१६.४७
३	नबिल	२,१८१,४२०	२,०१६,०२३	८.२
४	राष्ट्रिय वाणिज्य	१,९१९,५०५	१,७४८,८५९	९.७६
५	एनएमबि	१,७११,५१९	१,६१३,९७३	६.०४
६	प्राइम कमर्सियल	१,६७८,५८९	१,८१३,३२९	-७.४३
७	नेपाल इन्भेष्टमेन्ट	१,६२४,३२४	१,५८६,६०९	२.३८
८	नेपाल बैंक	१,४१७,०५८	१,३५०,४२३	४.९३
९	सिद्धार्थ	१,५७७,३१३	९१८,७४०	७१.६८
१०	कृषि विकास	१,४२२,५१२	१,३२१,६८८	७.६३
११	मेगा	१,३९९,९१२	१,३०४,४७१	७.३२
१२	प्रभु	१,२६२,०१०	१,५१८,६८४	-१६.९
१३	सिटिजन्स	१,२३९,३४९	८७५,१९३	४१.६१
१४	स्ट्याण्डर्ड चार्टर्ड	१,०८६,७७०	७२७,६३९	४९.६३
१५	सानिमा	१,०७७,०६८	१,०६२,७९६	१.३४
१६	माछापुच्छ्रे	१,०१०,८३०	८०२,७७४	२५.९२
१७	एनसीसी	९००,५४३	६१४,००४	४६.६७
१८	कुमारी	८५१,७३८	१,२१६,५५८	-२१.७७
१९	एभरेष्ट	८३८,९२०	९६१,९०४	-१२.७८
२०	लक्ष्मी	८१७,३९८	८०७,११५	१.२७
२१	नेपाल बंगलादेश	८११,१५२	९४१,२५५	-१३.८२
२२	नेपाल एसबीआई	७८२,७८१	५१४,८५९	५२.०४
२३	सेञ्चुरी	७२२,१६४	४६६,५९९	५४.७७
२४	बीओके	७१९,३१९	७०८,५११	१.५३
२५	सनराइज	७४५,५४४	९४९,४१२	-२१.४७
२६	सिभिल	५०४,००१	२०२,८४४	१४८.४७
	कूल नाफा	३३,३६५,१२३	३०,४१९,९१७	९.६८