नवलपरासी (बर्दघाट सुस्तापूर्व)- नवलपुरको मध्यविन्दु जिल्ला अस्पतालमा रहेको पीसीआर प्रयोगशालामा पीसीआर परीक्षण बन्द भएको छ। प्रयोगशालामा रहेका दुई कर्मचारीलाई कोरोना संक्रमण पुष्टि भएसँगै पीसीआर परीक्षण बन्द भएको मध्यविन्दु जिल्ला अस्पतालका सूचना अधिकारी छविलाल सुवेदीले जानकारी दिए।
अस्पतालमा सञ्चालनमा रहेको पीसीआर प्रयोगशालामा छ कर्मचारी रहेका थिए। तीमध्ये तीन जनाको पुस मसान्तमा करार अवधि सकिएको र बाँकी तीनमध्ये दुई जनामा कोरोना देखिएपछि आइतबारदेखि पीसीआर परीक्षण रोकिएको सूचना अधिकारी सुवेदीले बताए।
‘छ कर्मचारीमा तीन जनाको करार सकियो, दुई संक्रमित भए, एक जनाले मात्रै प्रयोगशाला सञ्चालन गर्न सकिने अवस्था हुँदैन, त्यसैले बन्द भयो,’ सूचना अधिकारी सुवेदीले भने।
पीसीआर प्रयोगशालाका कर्मचारीमा कोरोनाका कारण जाँच रोकिएपछि प्रदेशमा थप जनशक्ति माग गरिएको उनले बताए। उनका अनुसर प्रदेशबाट केही दिनभित्रमा जनशक्ति व्यवस्थापन गर्ने जानकारी प्राप्त भएको छ। जनशक्ति थप नहुँदासम्म पीसीआर परीक्षण भने बन्द रहने उनले बताए।
पीसीआर परीक्षण बन्द रहे पनि एन्टिजेन परीक्षण भने नियमित हुनेछ। अस्पतालमा कोरोनापरीक्षण गर्नेको चाप बढिरहँदा पीसीआर रोकिँदा समस्या हुने देखिएको छ। यसैगरी अस्पतालले अत्यावश्यक नपरी अस्पताल नआउनसमेत सबैमा अनुरोध गरेको छ। आइतबार एक सूचना जारी गरी कोरोना संक्रमणको जोखिम बढदै गएकाले अस्पतालमा भीडभाड हुँदा थप जोखिम हुनसक्ने भन्दै अतिआवश्यक नपरेसम्म अस्पतालमा नआउन सर्वसाधारणलाई अनुरोध गरेको छ।
अस्पतालका कर्मचारीमा समेत कोरोना संक्रमण भई जनशक्ति कम भएको र भीडभाड हुँदा कोरोनाको जोखिम थप बढ्ने भएकाले यस्तो अनुरोध गरिएको सूचना अधिकारी सुवेदीले बताए।
‘अस्पतालबाट सेवा दिइरहेका छौं, तर पनि अतिआवश्यकबाहेक केही दिनपछि अस्पताल आए हुने बिरामी यो समयमा नआए भीड कम हुने र जोखिमसमेत कम हुने भएकाले यस्तो अनुरोध गरेका हौं,’ सूचना अधिकारी सुवेदीले भने,‘कर्मचारीमा कोरोना देखिएर जनशक्ति कम हुँदा सेवा दिनसमेत गाह्रो हुने भएकाले यस्तो गर्नुपरेको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
