काठमाडौं- लोकतान्त्रिक मोर्चाका लागि गठन गर्ने भनिएको सात सदस्यीय कार्यदल नेपाली कांग्रेसका कारण अझै अपूरो भएको छ।
बिहीबार बिहान ८ बजेसम्म कार्यदलले पूर्णता पाउने भनिए पनि कांग्रेसले सदस्यको टुंगो नलगाउँदा राष्ट्रिय जनता पार्टी (राजपा), संघीय समाजवादी फोरम र नेपाल लोकतान्त्रिक फोरमले सदस्य सिफारिस गरेका छैनन्।
बुधबार साँझ बसेको ६ दलको बैठकले सात सदस्यीय कार्यदल बनाउने सहमति गरेको थियो । सहमति अनुसार कांग्रेसबाट २ र अन्य पार्टीबाट एक-एक जना सदस्य रहनेछन् । अहिलेसम्म राप्रपा र राप्रपा प्रजातान्त्रिकले मात्र कार्यदलको सदस्य टुंगो लगाएका छन् । राप्रपाले बुद्धिमान तामाङलाई पठाएको छ भने राप्रपा प्रजातान्त्रिकले विक्रम पाण्डेलाई कार्यदलको सदस्य बनाएको छ।
राजपा, संघीय समाजवादी र लोकतान्त्रिक फोरमले भने कांग्रेसलाई कुरिरहेको बताएका छन् । कांग्रेसबाट जुन तहको नेता सिफारिस हुन्छ, त्यही तहको नेता कार्यदलमा पठाउने उनीहरुको तयारी छ।
'कांग्रेसले जुन तहको नेता पठाउँछ, हामी पनि त्यही तहको नेता कार्यदलमा पठाउँछौं', लोकतान्त्रिक फोरमका नेता जितेन्द्र देवले नेपाल लाइभसँग भने।
राजपाका नेता शरतसिंह भण्डारीले पनि कार्यदलमा सदस्य पठाउन कांग्रेसलाई पर्खिरहेको बताएका छन्।
'कांग्रेसले शीर्ष नेता सम्मिलित कार्यदल बनाएको अवस्थामा अध्यक्षज्यूलाई नै पठाउने तयारी हाम्रो छ', उनले भने।
संघीय समाजवादी फोरमका नेता अशोक राईले कार्यदलमा सदस्य सिफारिस गर्ने जिम्मेवारी अध्यक्ष उपेन्द्र यादवलाई दिएको जानकारी दिए । कांग्रेसले शीर्ष नेता सम्मिलित कार्यदल बनाएको अवस्थामा अध्यक्ष यादव स्वयं सहभागी हुने र नभए राजेन्द्र श्रेष्ठलाई पठाउने तयारी रहेको नेता राईले बताए।
सात सदस्यीय कार्यदलले चुनावी तालमेलको खाका बनाउनेछ । कुन दलले कति सिट पाउने, चुनावी एजेण्डा के तय गर्ने सहितको प्रतिवेदन कार्यदलले तयार गर्नेछ। कार्यदलको प्रतिवेदनका आधारमा ६ दलका शीर्ष नेताले थप निर्णय लिनेछन्।
'सिट संख्या चुनावी एजेण्डा लगायतका विषयमा कार्यदलले प्रतिवेदन तयार गर्नेछ । त्यही अनुसार लोकतान्त्रिक मोर्चा चुनावमा सहभागी हुन्छ', नेता विमलेन्द्र निधिले भने।
नेपाली कांग्रेसको केन्द्रीय कार्यसम्पादन समितिको बैठक अहिले बालुवाटारमा बसिरहेको छ । बैठकले कांग्रेसबाट कार्यदलको सदस्य छनोट गर्ने नेता निधिले जानकारी दिए। कार्यदलले बिहीबार नै पूर्णता पाउने र चुनावी तालमेलको खाका बनाउन आजैबाट गृहकार्य सुरु गर्ने नेताहरुले बताएका छन्।
एमाले र माओवादीले दीर्घकालीन सहकार्यसहित वाम एकता गरेपछि कार्यदलले पनि लोकतान्त्रिक पक्षधरको दीर्घकालीन एकताको लागि खाका तयार पार्ने नेताहरुको भनाइ छ । प्रधानमन्त्री एवं कांग्रेस सभापति शेरबहादुर देउवाले बुधबारको बैठकमा ६ दलबीच दीर्घकालीन सहकार्य हुने गरी कार्यदलका सदस्य प्रतिवेदन तयार गर्नुपर्ने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
