काठमाडौं– कुनै बेलाकी स्थापित अभिनेत्री हुन् उषा रजक। ‘कुसुमे रुमाल २’, ‘इकु’लगायतका फिल्म खेलेकी, रंगकर्म हुँदै फिल्ममा प्रवेश गरेकी उनले संघर्षका सुरुवाती दिनमै राम्रो सफलता पाइन्। त्यत्ति नै बेला उनले ‘टाटा–बाईबाई’जस्ता फिल्ममा पनि अभिनय गरेकी थिइन्।
तर, व्यक्तिगत कारणले उषा ओझेलमा परिन्। विवाहपछि उनको बसाई पनि नेपालमा रहेन। परिवारलाई साथ दिँदै उनी ‘किर्गिस्तान’ बस्न थालिन्। नेपालमा बसाइ नभएपनि नेपाली फिल्मसँग उनको सम्बन्ध भने रहिरह्यो। उनले प्रशान्त रसाइलीको फिल्म ‘कथा’मा काम गरिन्।
उषा अहिले नेपाल फर्किएकी छन्। रंगकर्मदेखि फिल्ममा उनको सक्रियता बढेको छ। सात वर्षसम्म किर्गिस्तान बसेर नेपाल आएकी उनले अभिनय गरेको पछिल्लो फिल्म ‘कठपुतली’ आजबाट प्रदर्शनमा आएको छ।
पुराना पुस्ताका दर्शकसँग परिचित रहेपनि नयाँ पुस्ताका दर्शकलाई अपरिचति अनुहार हो, उषा रजक। यो फिल्मले दर्शकामाझ 'कमब्याक' गर्ने आशामा छिन् उषा। प्रचारप्रसारदेखि फिल्मको प्रिमियरमा आएका प्रतिक्रियाले नेपालमा बन्ने गरेका विधामा भन्दा फरक हरर विधामा बनेको यो फिल्मलाई राम्रै सफलता मिल्ने देखिन्छ।
आजबाट प्रदर्शनमा आएको फिल्म हलमा कस्तो रुपमा उत्रिन्छ, हेर्न बाँकी नै छ। ‘स्पाइडर–म्यानः नो वे होम’, ‘पुष्पाः द राइज’जस्ता फिल्मसँग प्रतिस्पर्धा गरिरहेको फिल्मलाई दर्शकले कति रुचाउँछन् भन्ने हेर्न बाँकी नै छ। तर, उषाको ‘कमब्याक’का लागि भने यो फिल्म अवश्य पनि कोसेढुंगा बन्नेछ।
भीमसेन लामाको निर्देशनमा बनेको फिल्ममा उषासँगै कर्मा, गौरी मल्ल, मिथिला शर्मालगायत कलाकारको अभिनय छ। फिल्ममा परित्यक्त एक राजकुमारले जिउनका लागि संघर्ष गरिरहँदा भएका असाधारण घटनालाई देखाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
