काठमाडौं- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले खुमलटार डेराबाट सर्ने तयारी गरेका छन्। ठेकेदार शारदाप्रसाद अधिकारीको घरमा बसेको भन्दै प्रचण्डको आलोचना भइरहँदा उनले डेरा सर्ने तयारी गरेका हुन्।
प्रचण्ड निवासलाई लिएर आलोचना हुन थालेपछि डेरा खोज्ने कार्य सुरु गरिएको माओवादी केन्द्रका एक स्थायी समिति सदस्यले बताए। पार्टी रुपान्तरण गर्ने भन्दा प्रचण्डको निवासलाई लिएर आलोचना हुन थालेपछि पार्टीकै योजना अनुसार सामान्य घरमा डेरा सर्ने तयारी गरिएको ति नेताले जानकारी दिए। हिमायलय टेलिभजनको कार्यक्रम 'यक्ष प्रश्न' को एक अन्तर्वार्तामा प्रचण्डले खुमलटार निवास छोडेर जाने तयारी भइरहेको बताएका हुन्। खुमलटार निवास प्रचण्डको भन्दै हल्ला भएको भन्दै त्यहाँबाट छोडेर गएपछि सबै जनताले थाहा पाउने उनले बताए।
यसअघि लाजिम्पाटमा बसेको घरसमेत प्रचण्डको भन्दै टिप्पणी भएकोमा समेत उनले आपत्ति जनाए। ‘लाजिम्पाटको घर मेरो होइन। मेरो त्यसमा कुनै लगानी छैन। स्वामित्व पनि छैन। एक महिलाको घर हो। मैले छोडेर आएँ सिद्धियो। त्यसैलाई जोड्या छ फेरि प्रचण्डको भन्या छ’ अन्तर्वार्ताका क्रममा उनले भनेका छन्, ‘अहिले बसेको घरपनि एक जना ठेकेदार मित्रको हो। दुनियालाई थाहा छ। तर, मैले आरोप खेरिरहेको छु।’
शारदा अधिकारी पञ्चायतकालदेखि नै आफ्नो पार्टीमा जोडिएर काम गरेको प्रचण्डले बताएका छन्। ‘शारदा भनेको हिजो पञ्चायतकालीन अवस्थादेखि हाम्रो पार्टीसँग जोडिएका साथी हुन्। अहिले पनि हाम्रो निर्माण व्यवसायी संघमा हुनुहुन्छ। हिजो भूमिगत हुँदा पञ्चायतकालमा हामी त्यहाँ बस्ने गर्थ्यौं। त्यो बेला उहाँले ठूलो देन गर्नु भएको छ’ प्रचण्डले भने,‘यो घरपनि छोड्ने तयारी गरेको छु। त्यसपछि थाहा हुने छ नेपाली जनतालाई कुरा के रहेछ भन्ने।’
चितवनमा आफ्नो निर्वाचन क्षेत्रमा एउटा घर बनाउने सोचेको प्रचण्डले बताए। ‘चितवनमा पनि सानो झुप्रो बनाउने सोचेको छु। बुवाको सम्पत्तिबाट जति पाएको छु। त्यहाँ एउटा झुप्रो बनाउने विचार छ’ प्रचण्डले भने,‘यहाँ काठमाडौमा डेरा खोजेर बस्ने तयारीमा छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
