काठमाडौं– गठबन्धन सरकारको नेतृत्व गरिरहेको नेपाली कांग्रेस र गठबन्धनकै अर्को घटक नेकपा (माओवादी केन्द्र)बीच आफू निकटस्थलाई अध्यक्ष नियुक्त गर्ने हानथापले नेपाल धितोपत्र बोर्ड चार महिनादेखि नेतृत्वविहीन भएको छ।
सर्वोत्तम सिमेन्टको सेयर खरिद प्रकरणमा मुछिएपछि बोर्डका अध्यक्ष भीष्मराज ढुंगाना बर्खास्तीमा परेका थिए।
पछिल्लो पटक मन्त्रिपरिषद् बैठकले अध्यक्ष छनोट समितिको लागि संयोजक तोकेर पठाउन राष्ट्रिय योजना आयोगलाई निर्देशन दिएको छ। तर, अर्थमन्त्री जनार्दन शर्मा र योजना आयोग उपाध्यक्ष विश्वराज पौडेलबीच समिति संयोजक तोक्ने सम्बन्धमा विवाद भएपछि यो प्रक्रिया रोकिएको छ।
अर्थ मन्त्रालयका एक अधिकारीका अनुसार पौडेल आफैँ समिति संयोजक हुन चाहेका छन्। पौडेललाई नेपाली कांग्रेसको कोटामा प्रधानमन्त्री शेरबहादुर देउवाले उपाध्यक्ष नियुक्त गरेका हुन्। यसअघि मन्त्रालयले उनैलाई संयोजक बनाउँदा समिति विवादित भएको थियो।
तर, मन्त्री शर्माले योजना आयोगबाट माओवादी निकटलाई संयोजक बनाउन चाहेका छन्। यही विवादका कारण समिति गठन हुन नसकेको हो।
बोर्ड अध्यक्ष छनोटका लागि अर्थ मन्त्रालयले यसअघि पनि समिति गठन गरेको थियो। उक्त समितिले अध्यक्षका लागि आवेदन खुलाएको थियो। १२ जनाको आवेदन पनि परेको थियो। तर, अर्थ मन्त्रालयले ऐनअनुसार समिति गठन नगरेको भन्दै विरोध भएपछि उक्त समिति खारेज भयो। त्यसपछि नयाँ समिति गठनका लागि मन्त्रिपरिषदले नै योजना आयोगलाई संयोजक पठाउन पत्र पठाएको हो।
अर्थ मन्त्रालयका ती अधिकारी भन्छन्, ‘मन्त्रिपरिषद् बैठकले अध्यक्ष छनोटको लागि निर्णय गरिसकेको छ। एक महिना अगाडि मन्त्रिपरिषद् बैठकले समिति छनोटको लागि योजना आयोगलाई फाइल पठाएको हो। तर, आयोगले अहिलेसम्म कसलाई समितिको संयाजक बनाउने भनेर निर्णय गर्न सकेको छैन।’
यसरी छनोट गरिन्छ धितोपत्र बोर्ड अध्यक्ष
नेपाल धितोपत्र सम्बन्धी ऐन २०६३ अनुसार अध्यक्ष छनोटका लागि राष्ट्रिय योजना आयोगको पुँजी बजार तथा वित्तीय क्षेत्र हेर्ने सदस्यको संयोजकत्वमा अर्थ मन्त्रालयका सचिव र धितोपत्र बजार विज्ञसहितको समिति गठन गर्नुपर्छ। अर्थ मन्त्रालयले यसअघि गठन गरेको समिति सोही प्रावधानविपरीत भएको भन्दै विरोध भएको थियो। कात्तिक पहिलो साता अर्थमन्त्रीस्तरीय निर्णयबाट बनेको समिति खारेज भएपछि नयाँ समिति गठनको प्रक्रिया अघि बढेको छ।
अघिल्लो समितिमा योजना आयोगका उपाध्यक्ष पौडेलको संयोजकत्वमा अर्थसचिव मधु मरासिनी र विज्ञ सदस्य डा नारायणप्रसाद पौडेल सदस्य थिए। पौडेललाई संयोजक राख्ने कार्य ऐनविपरीत भएको भन्दै विरोध भएको थियो। ऐनको दफा ७ को उपदफा ३ मा भनिएको छ, ‘अध्यक्ष नियुक्ति गर्ने प्रयोजनका निमित्त नाम सिफारिस गर्नका लागि राष्ट्रिय योजना आयोगको सम्बन्धित क्षेत्र हेर्ने सदस्यको संयोजकत्वमा, अर्थ मन्त्रालयका सचिव र धितोपत्र क्षेत्रसँग सम्बन्धित विशेषज्ञ रहेको एक समिति रहनेछ र सो समितिको सिफारिसमा यस दफाबमोजिम अध्यक्षको नियुक्ति हुनेछ।’
सोही दफाको उपदफा-२ ले अध्यक्षको योग्यता निर्धारण गरेको छ। उक्त उपदफामा भनिएको छ- ‘नेपाल सरकारले अध्यक्षको नियुक्ति गर्दा कम्तीमा स्नातकोत्तर उपाधि हासिल गरी धितोपत्र बजार व्यवस्थापन, पुँजी बजार विकास, आर्थिक, वित्तीय, वाणिज्य, व्यवस्थापन वा कानुन क्षेत्रमा कम्तीमा सात वर्ष काम गरेको अनुभवी प्रतिष्ठित व्यक्तिहरुमध्येबाट उपयुक्त व्यक्तिलाई अध्यक्षको पदमा नियुक्ति गर्नेछ।’
अब बन्ने समितिमा अर्थसचिव मधु मरासिनी नै रहने र विज्ञको रुपमा डा.दिलनाथ दंगाल रहने मन्त्रालय स्रोतले जनाएको छ। अब राष्ट्रिय योजना आयोगले संयोजक तोकेपछि समितिले पूर्णता पाउने छ।
स्टक एक्स्चेन्ज सीईओ पनि छनोट प्रक्रियामा छ : अर्थ मन्त्रालय
नेपाल स्टक एक्स्चेन्ज पनि चार महिनादेखि कार्यकारी निर्देशकविहीन छ। बोर्डका तत्कालीन अध्यक्ष भीष्मराज ढुंगाना र नेपाल स्टक एक्सचेन्जका तत्कालीन कार्यकारी अधिकृत चन्द्रसिंह साउद दुवै जनालाई सर्वोत्तम सिमेन्टको ‘गोल्डेन सेयर’ खरिद गरेको आरोप लागेको थियो। यसकारण सीईओ साउदले राजीनामा दिएका थिए। नेप्सेको सीईओ छनोट प्रक्रिया अगाडि बढिरहेको अर्थ मन्त्रालय स्रोतले जनाएको छ।
सीईओ नियुक्तिको प्रक्रिया भने मन्त्रालयले गठन गरेको अघिल्लो समितिले नै अगाडि बढाएको छ। सीईओका लागि समितिले आवेदन मागेको थियो। जसअनुसार १२ जनाले आवेदन दिएको स्रोतले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
