काठमाडौं- अभिनेत्री सन्नी लियोनीले अभिनय गरेको पछिल्लो गीत ‘मधुवन में राधिका नाँचे’ अहिले चर्चामा आएको छ। तर, चर्चा सकारात्मक नभएर नकारात्मक रुपमा अघि बढिरहेको छ। सन्नीको गीतलाई लिएर सामाजिक सञ्जालमा बहिष्कार गर्ने अभियान नै चालिएका छ भने भारतको मथुरामा यसको व्यापक विरोध भइरहेको छ।
विरोध गर्नेहरुले सन्नीको यो भिडियोलाई प्रतिबन्ध लगाउनुपर्ने माग गरिरहेका छन्। २२ डिसेम्बरमा रिलिज भएको यो गीतलाई लिएर कानुनी कारबाहीमा पनि जाने मथुराका सन्तहरुले चेतावनी दिएका छन्।
मथुराको वृन्दावनका सन्त नवल गिरी महाराजले भारतीय सरकारलाई यो गीतको विरुद्धमा कारबाही गर्न भनेका छन्। उनले गीतलाई प्रतिबन्ध र अभिनेत्री सन्नी लियोनीलाई कारबाही नगरेमा आफ्नो समूह अदालतमा जाने चेतावनी दिएका छन्। महाराजले सन्नीले गीतको भिडियोबाट आपत्ति जनक दृश्यहरु हटाउने र माफी माग्ने नगरेमा उनलाई भारतमै बस्न नदिने अवस्था सिर्जना गरिदिने चेतावनी दिएका छन्।
गीतको भिडियो रिलिज भएसँगै यो गीत निकै चर्चामा आएका थियो। दर्शकले सन्नीको मजाक पनि उठाएका थिए। यसबीच उनको गीतको भिडियोलाई लिएर आपत्ति जनाउन सुरु भयो। सन्नीको भिडियोको विरोध गर्नेहरुले यो गीतमा उनले गरेको नृत्य आपत्तिजनक भएको बताएका छन्।
‘मधुवन’ र ‘राधिका’जस्ता धार्मिक शब्द प्रयोग भएको गतिमा सन्नीले उच्छृंखल र आपत्तिजनक नृत्य गरेको भन्दै उनीहरुले विरोध गरेका छन्। वृन्दावनका सन्तहरुले भनेका छन्, ‘यो गीतमा उनले जसरी नाचेकी छिन्, यो गीतको बोल तुलना गर्दा निकै आपत्तिजनक छ। राधा हाम्रो लागि पुजनीय हुन्। सन्नीले हिन्दूहरुको धार्मिक भावनामा ठेस पुग्ने गरी यो नृत्य गरेकी छिन्।’
‘कोहिनुर’ फिल्मको गीलाई रिक्रियट गरी बनाइएको यो गीतमा सन्नीले ‘आइटम डान्स’ गरेकी छन्। एकातिर मथुरा र वृन्दावनका सन्तहरुले उनको विरुद्धमा कानुनी कारबाही खोज्दै गीतमा प्रतिबन्ध लगाउनुपर्ने र दृश्यहरु हटाउनुपर्ने माग गरेका छन् भने सामाजिक सञ्जालमा सन्नीको यो गीतविरुद्धमा बहिष्कारको अभियान नै चलेको छ।
यो गीतलाई कनिका कपुर र अरिन्दम चक्रवर्तीले गाएका छन्। १९६० को फिल्म ‘कोहिनुर’को यो गीतलाई उनीहरुले रिक्रियट गरेका हुन्। फिल्ममा भने यो गीतलाई मोहम्मद रफीले गाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
