भक्तपुर- भक्तपुरको नगरकोट आउने पर्यटकसँग चाँगुनारायण नगरपालिकाले पर्यटन शुल्क उठाउन थालेपछि व्यवसायीले त्यसको विरोध गरेका छन्।
उनीहरुले चाँगुनारायण नगरप्रमुख सोमप्रसाद मिश्रलाई ज्ञापनपत्र बुझाउँदै नगरपालिकाको निर्णय तत्काल फिर्ता लिन माग गरेका छन्। निर्णय नसच्याए व्यवसाय नै बन्द गर्ने चेतावनीसमेत उनीहरुले दिएका छन्।
चाँगुनारायण नगरपालिकाले असोज १ गतेदेखि नगरकोट आउने बाहिरी पर्यटकअन्तर्गत सार्क मुलुकका पर्यटकसँग प्रतिव्यक्ति रु ३०० र अन्य देशकासँग ४०० लिने गरी ठेक्का दिएको छ।
नगरप्रमुखलाई ज्ञापनपत्र बुझाउँदै व्यवसायी एवं नगरकोट नाल्दुम पर्यटन विकास समितिका अध्यक्ष इन्द्र लामाले पर्यटकसँग शुल्क उठाउने नाममा ठेकेदार पोस्ने काम गरेको आरोप लगाउँदै तत्कालै सो निर्णय फिर्ता लिन माग गरे। उनले नगरपालिकाले निर्णय नसच्याए व्यवसायीले होटल बन्द गरेर नगरपालिका घेराउको कार्यक्रम गर्न बाध्य हुने चेतावनीसमेत दिए।
अर्का व्यवसायी एवं समितिका प्रवक्ता गोकुल शर्माले नगरपालिकाले व्यवसायीसँग बिना छलफल पर्यटन शुल्क उठाएर नगरकोटको पर्यटन व्यवसायलाई ध्वस्त बनाउने काममा नगरप्रमुख मिश्रले अगुवाइ गरेको बताउँदै सो निर्णय तत्काल सच्याउनुपर्ने बताएका छन्।
नगरप्रमुख मिश्रले भने नगरकोट आउने पर्यटकसँग शुल्क लिनु गल्ती भएको बताए। व्यवसायीसँग छलफल नगरी एकतर्फीरुपमा नगरपालिकाले पर्यटन शुल्क उठाउएकोमा गल्ती भएको उनले स्वीकार गरेका छन्।
विगत तीन वर्षदेखि कार्यान्वयन हुन नसकेको निर्णय आफूले कार्यान्वयनमा मात्र ल्याएको उनको भनाइ छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
