काठमाडौं– ‘बिकिनी किलर’को नामले चर्चित रहेका अन्तर्राष्ट्रिय अपराधी चार्ल्स शोभराज आफ्नो युवा उमेरमा ‘द स्प्लिटिङ्ग किलर’ अर्थात् क्रुर रुपमा हत्या गर्ने अपराधीको रुपमा चर्चित थिए। उनी पक्राउ पर्ने र अनौठो रुपमा जेलबाट भाग्न पनि सफल भएका थिए।
यस्ता क्रुर अपराधी, जो प्रहरी र अनुसन्धानकर्ताहरुको आँखामा धुलो छरेर भाग्न सफल हुन्छ, उनको कथालाई लिएर अन्तर्राष्ट्रिय रुपमा नै फिल्म निर्माताहरुले फिल्म बनाउन सुरु गरे।
निर्माताहरुले उनको कथालाई आम्दानीको स्रोतको रुपमा लिएर अपराध र जेलबाट भाग्न सफल भएको जीवनका किस्साहरुलाई फिल्ममा प्रस्तुत गरेका छन्।
केही समयअघि बीबीसीले उत्पादन गरेको वेब सिरिज ‘द सर्पेन्ट’ सार्वजनिक भएपछि शोभराजको चर्चा फेरि चुलिएको थियो। शोभराजलाई केन्द्रमा राखेर निर्माण गरिएका फिल्म वा सिरिज अन्य पनि छन्, जसले बेलाबखत कुख्यात अपराधीलाई फेरि चर्चामा ल्याउँछन्। तीमध्ये केही सार्वजनिक भइसकेका छन् भने केही अझैं प्रदर्शन हुन बाँकी नै छन्।
यहाँ शोभराजलाई मुलत: विषयवस्तुको रुपमा लिएर बनाइएका वेब सिरिज र केही फिल्महरुको चर्चा गरिएको छ।
सुरुआतमा हालसालै प्रदर्शन भएको ‘द सर्पेन्ट’कै चर्चा गरौं। यही वर्ष ओटीटी माध्यम ‘नेटफ्लिक्स’मार्फत् वेब सिरिज ‘द सर्पेन्ट’लाई मेममोथ स्क्रिनले निर्माण गरेको थियो, जसको लगानी भने बीबीसीले गरेको थियो। टोम शांखलेन्ड र हेन्स हर्दोट्सले निर्देशन गरेको यो सिरिजलाई रिचर्ड वारलोव र टोली फिन्लेले लेखेका थिए। कोभिड महामारीबीच थाइल्याण्डमा यो सिरिजको पूर्ण रुपमा छायांकन गरिएको थियो।
यो सिरिजमा ७० को दशकको मध्यतिरको कथालाई देखाइएको छ। सिरिजमा शोभराजले लागुऔषधको प्रयोग गर्नेदेखि थाइल्याण्डको बैङ्कक हुँदै यात्रा गर्ने यात्रुहरुलाई लुट्ने र हत्या गर्ने कथालाई देखाइएको छ।
यसरी हत्या गरिएका यात्रुहरुको पासपोर्ट प्रयोग गरेर फरक-फरक परिचयमा शोभराज विश्वभर नै यात्रा गरिरहन्छन्। लुटिएका गहनाहरुलाई आफ्नी प्रेमिका मारि आन्द्रे लेक्लेर्कसँग मिलेर बेचिरहेका हुन्छन् उनी। अपराधको शीर्ष विन्दुमा पुगेका उनीमाथि जब नेदरल्याण्ड्सका कुटनीतिज्ञ हर्मन क्निप्पेनबर्गले अनुसन्धान थाल्छन्, तब उनका अपराधका पत्रहरु खुल्दै जान्छन् र क्निप्पेनबर्ग शोभराजसम्म पुग्न सफल हुन्छन्।
आठ एपिसोडमा बाँडिएको यो सिरिजमा तहार रहिमले चार्ल्स शोभराजको भूमिका निभाएका छन् भेन जेन्ना कोलमेनले उनकी प्रेमिकाको। नेदरल्याण्ड्सका कुटनीतिज्ञको भूमिकामा देखिनेमा बेलायती अभिनेता विल्ली होव्ले रहेका छन्।
‘द सर्पेन्ट’ प्रदर्शन भएपछि दर्शकले अत्यधिक रुचाएका थिए। अहिले पनि फिल्म तथा सिरिजलाई रेटिङ दिइने साइट ‘आइएमडी बी’मा यसलाई ७.६ रेटिङ दिइएको छ। पटकथादेखि कास्टिङसम्मका कुराहरुमा अब्बल रहेको यो सिरिजमा दृश्यांकन पनि उत्तिकै अब्बल किसिमले प्रस्तुत गरिएको थियो।
शोभराजमाथि बनेको अर्को चर्चित फिल्म हो ‘मैं औंर चार्ल्स’। २०१५ मा प्रदर्शनमा आएको यो बलिउड फिल्मलाई पर्वल रमनले निर्देशन गरेका थिए। फिल्ममा रणदीप हुड्डा शोभराजको भूमिकामा देखिएका छन्।
फिल्ममा सन् १९६० देखि सन् १९७० सम्मको कथालाई प्रस्तुत गरिएको छ। फिल्ममा भारतीय प्रहरी अधिकारी अमोम कान्ठको दृष्टिकोणबाट देखिएका शोभराजलाई प्रस्तुत गरिएको छ। थाइल्याण्डबाट भारत आएपछि उनको खोजीमा भएका घटनाहरु फिल्ममा छन्।
बरिष्ठ प्रहरी अधिकृतको रुपमा आमोद कन्ठ जसले शोभराजको मुद्दामा अनुसन्धान गरेका थिए, उनको भुमिकामा आदिल हुसैन रहेका छन्। फिल्मले चार्ल्सको कथालाई प्रभावशाली रुपमा देखाएको भए पनि राम्रो व्यापार गर्न सकेन।
फिल्मले औसत हिन्दी फिल्मकै रुप लियो। तर, यो फिल्ममा शोभराजको भूमिकामा रहेका रणदीप र उनकी प्रेमिकाको भूमिकामा रहेकी रिचा चड्डाको अभिनयलाई भने प्रशंसा गरिएको थियो। फिल्ममा आदिल हुसैनले प्रहरी अधिकारी अमोद कन्ठको भूमिका निभाएका छन्।
‘शोभराज, अर हाउ टु बी फ्रेन्ड्स विथ द सीरियल किलर’ शोभराजको जीवनमा आधारित रहेर निर्माण भएको वृतचित्र हो। सन् २००४ मा रिलिज भएको यो डकुमेन्ट्रीमा शोभराजको बारेमा जानकारीसँगै उनी २००३ सेप्टेम्बर २२ मा कसरी पक्राउ परेका थिए भन्ने बारेमा पनि खुलासा गरिएको छ।
फिनल्याण्डका निर्माता जान बेलमैनले यो डकुमेन्ट्री फिल्म बनाएका थिए। यो डकुमेन्ट्रीमा चार्ल्ससँगका अन्तर्वार्तादेखि उनलाई पक्राउ गर्ने प्रहरी अधिकारीसम्मको कुरालाई समेटिएको छ। चार्ल्स शोभराज र उनको आपराधिक दुनियाँको बारेमा बुझन् यो डकुमेन्ट्री निकै फाइदाजनक छ।
त्यस्तै, शोभराजको जिवनीमा आधारित रहेको वेब सिरिज ‘स्नेक’ अहिलेसम्म प्रदर्शनमा आएको छैन्। फारुख ढोडीले शोभराजमाथि गरेको अुनसन्धान र साक्षात्कारमाथि आधारित रहेर यो सिरिज निर्माण भएको छ। तीन सिजनमा प्रसारण गरिने यो सिरिज हिन्दी र अंग्रेजी भाषामा ओटीटी माध्यम जी ५ मार्फत् रिलिज हुनेछ।
शोभराजको जीवनमाथि बनेका यी केही प्रमुख फिल्म र सिरिजहरु हुन्। योसँगै १९८९ मा ‘स्याडोज अफ कोब्रा’ नामक टेलिभिजन कार्यक्रम पनि उनको जीवनमा आधारित रहेर निर्माण भएको थियो। बेलायती अभिनेता अरत मलिक यो कार्यक्रममा शोभराजको भूमिकामा देखिएका थिए। कार्यक्रमलाई रिचर्ड नेभेल्ले र जुली क्लर्केले बनाएका थिए।
निर्माता/निर्देशकको सधैंको रोजाईमा पर्छन् शोभराज। एकातिर अपराध र थ्रिलर विद्यामा आधारित फिल्मले व्यावसायिक रुप पनि राम्रोसँग लिनसक्ने हुँदा शोभराज धेरै निर्देशक/निर्माताका लागि पात्र बनेका छन्।
‘मे और चार्ल्स’ निर्देशन गरेका रमनले आफूले शोभराजमाथि फिल्म बनाउनुको कारण शोभराजले असली दुनियाँमा निर्माण गरेको आफ्नो व्यक्तित्वलाई पर्दामा देखाउने प्रयास भएको बताएका छन्।
उनले भनेका छन्, ‘उनी एक खतरनाक अपराधी त थिए तर, उनी पढेका थिए। धेरै जान्ने थिए। कानुनको आँखामा मात्रै उनको बाटो खराब थियो। आफ्नो सम्बन्ध र मार्केटिङको शैलीलाई उनले मुख्य हतियार बनाएका थिए। तर, उनको व्यक्तित्वको चित्रण धेरै सिनेमामा राम्रोसँग हुन सकेको छैन। वास्तविक जीवनमा पनि उनले आफ्नो व्यक्तित्वलाई कानुन विपरित नै त प्रयोग गरेका थिए।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![नेपाल लाइभ समाचार, मंसिर १५ [भिडियाे]](https://nepallive.net/uploads/posts/500X300/news_thumb_reloaded1669903743.jpg)
![राजनीतिमा ‘परिवारवाद’: श्रीमान्–श्रीमतीदेखि ससुरा–बुहारी सांसद! [भिडियाे]](https://nepallive.net/uploads/posts/500X300/samsad banne line ma thumbs 1669800733.jpg)
