काठमाडौं– हिमाल एसोसिएसनको आयोजनामा यो वर्षको ‘काठमाडौं अन्तर्राष्ट्रिय पर्वतीय चलचित्र महोत्सव (किम्फ)’को शुभारम्भ भएको छ।
काठमाडौं महानगरपालिकाको सह-आयोजनामा मंसिर २७ गतेसम्म चल्ने महोत्सवको आज पर्यटन बोर्डको सभाहलमा सुरुवात भएको हो।
बिहीबार भएको उद्घाटन समारोहमा लद्दाखका पर्यावरणविद् तथा वैज्ञानिक सोनाम वाङ्चुकको मुख्य उपस्थिति रहेको छ। किम्फको यो १९ औं संस्करण हो।
दर्शकको भौतिक उपस्थितिसँगै अनलाइनबाट पनि हुने यो वर्षको कार्यक्रममा विभिन्न २८ देशबाट प्राप्त डकुमेन्ट्री, फिक्सन, लघु चलचित्र, एनिमेसनलगायतका ६० वटा फिल्महरु देखाइनेछन्। महोत्सवमा ‘जलवायु कर्म’ आशय बोकेका फिल्महरु प्रदर्शन हुनेछन्।
आयोजकका अनुसार स्थानीय र विश्वव्यापी रुपमा देखिएका जलवायु परिवर्तनका प्रभावलाई समेटिएका फिल्मसँगै विमर्श लगायतका कार्यक्रमहरु महोत्सवभर चल्नेछन्।
२७ मंसिरसम्म चल्ने महोसत्वको पहिलो दिन बिहीबार उद्घाटन समारोहसँगै काइली रुडडिकको निर्देशनमा बनेको ‘ड्रिम माउन्टेन’, विभुषण बस्नेत र पुजा गुरुङको निर्देशनमा बनेको ‘द बिग हेडेड बोय’, विकास रोका मगर निर्देशिक ‘लाहुरेनी, राजेश प्रसाद खत्री निर्देशित ‘जुलुङ्गो’लगायतका फिल्महरु प्रदर्शन हुनेछन्। यी फिल्महरु बिहीबार दिउँसो तीन बजेबाट किम्फको वेबसाइट मा पनि हेर्न सकिनेछ।
यी बाहेक महोसत्वमा कोरे रोविनसन निर्देशित ‘वेन ग्लेसियर्स गो’, सृष्टी लखेरा निर्देशित ‘एक था गाउँ’, बाराक हैमन निर्देशित ‘दानी काराभान’ लगायतका वातावरणसम्बन्धी फिल्महरुको प्रदर्शन रहेको छ। महोत्सवमा टोनी हेगनले लेखेको ‘बिल्डिङ ब्रिजेज टु द थ्रड वल्र्ड’को नेपाली अनुवाद ‘नेपालमा मेरो खोजयात्रा’को पनि विमोचन हुँदैछ। यी बाहेक कार्यक्रममा वातावरणसँग सम्बन्धित विभिन्न विमर्शका कार्यक्रमहरु छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
