मौद्रिक नीतिको पहिलो समिक्षापछिको साता : सेयर बजारमा कसले कमाए, कसले गुमाए?

बैंक/बिमा/सेयर

सुमित्रा कार्की शुक्रबार, मंसिर १७, २०७८ २१:४४

काठमाडौं– नेपाल राष्ट्र बैंकले सार्वजनिक गरेको मौद्रिक नीतिको प्रथम त्रैमासिक समीक्षापछिको पहिलो साता नेप्से परिसूचक १४५.५९ अंकले घटेको छ। गत साताको अन्तिम दिन बिहीबार २७३१.७८ बिन्दुमा रहेको नेप्से परिसूचक यस साता १४५.५९ अंकले घटेर २५६८.१९ बिन्दुमा झरेको हो।

यो साता १९ अर्ब ६ करोड रुपैयाँ बराबरको कारोबार भएको छ। साताका पाँच कारोबार दिनमध्ये सबैभन्दा धेरै कारोबार आइतबार भएको छ। आइतबार सेयर बजारमा पाँच अर्ब ८३ करोड ५१ लाख ३५ हजार रुपैयाँ बराबरको कारोबार भएको नेपाल स्टक एक्सचेन्जले जानकारी दिएको छ।

साताको दोस्रो कारोबार दिन सोमबार सेयर बजारमा चार अर्ब ८९ लाख ३७ हजार रुपैयाँ बराबरको कारोबार भएको छ। कारोबारको तेस्रो दिन, मंगलबार भने तीन अर्ब आठ करोड ९० लाख ४१ हजार रुपैयाँ बराबरको कारोबार भएको थियो। चौथो दिन, बुधबार सेयर बजारमा सबैभन्दा थोरै, दुई अर्ब ७४ करोड २० लाख ८५ हजार रुपैयाँ बराबरको कारोबार भयो। साताको अन्तिम कारोबार दिन, बिहीबार भने तीन अर्ब ४१ करोड ३५ लाख ८९ हजार रुपैयाँ बराबरको कारोबार भएको थियो।

कुन समूहको सेयर मूल्य कति प्रतिशत घट्यो ?
यो साता कारोबारमा आएका सबै समूहको सेयर मूल्य घटेको छ। सबैभन्दा बढी विकास बैंक समूहको सेयर मूल्य घटेको नेप्सेले जनाएको छ। यस समूहको सेयर मूल्य यो हप्ता ९.०८ प्रतिशतले घटेको छ। यो साता सबैभन्दा धेरै गुमाउने अर्को समूह भने होटल तथा पर्यटन क्षेत्रका लगानीकर्ता हुन्। यो समूहका लगानीकर्ताले हप्ताभरिमा ८.९५ प्रतिशतले आफ्नो सेयर मूल्य गुमाएका छन्।

सेयर बजारमा यो साता ट्रेडिङ समूहको मूल्य ७.१५ प्रतिशत, अन्य समूहको मूल्य ६.७७ प्रतिशत, लाइफ इन्स्योरेन्स कम्पनीको मूल्य ६.५३ प्रतिशत, फाइनान्स कम्पनीको ६.४७ प्रतिशत, उत्पादन तथा प्रशोधन समूहको ६.३१ प्रतिशत र लगानी समूहको मूल्य ६.२० प्रतिशतले ओरालो लागेको छ।

त्यस्तै, जलविद्युत समूहको सेयर मूल्य ५.७२ प्रतिशत, लघुवित्त समूहको ५.३५, निर्जीवन बीमा कम्पनीको ५.१३ प्रतिशत र वाणिज्य बैंक समूहको सेयर मूल्य ३.७८ प्रतिशतले घटेको छ। यो साता सबभन्दा थोरै म्यूचुअल फन्ड समूहतर्फका लगानीकर्ताले गुमाएका छन्। यो समूहका लगानीकर्ताले २.४५ प्रतिशतको दरले आफ्नो सेयर मूल्य गुमाए। समग्र समूहको सेयर मूल्य ५.३३ प्रतिशतले घट्यो।

साताका सबभन्दा धेरै कमाउने कम्पनी
यो साता सबभन्दा धेरै कमाउने कम्पनी सामलिङ पावर कम्पनी रह्यो। यसको सेयर मूल्य यो साता ५८.३५ प्रतिशतले बढेको छ। यो कम्पनी केही समय अघिमात्र आईपीओ जारि गरेर नेप्सेमा सूचीकृत भएको थियो। त्यसकारण पनि यो कम्पनीको सेयर लगातार बढेको हो। यस्तै, नारायणी डेभलपमेन्ट बैंकको सेयर मूल्य ५.२३ प्रतिशतले बढेको छ। नेपाल एसबीआई बैंकको सेयर मूल्यमा भने ३.१४ प्रतिशतले वृद्धि भएको छ।

यो साता नेपाल बंगलादेश बैंक, सानिमा लार्ज क्याप फन्ड, निर्धन उत्थान लघुवित्त वित्तीय संस्था, एनआईबीएल समृद्धि फन्ड, समिट लघुवित्त वित्तीय संस्था, सिद्धार्थ इन्भेष्टमेन्ट ग्रोथ स्किम र समिद्धि फाइनान्स कम्पनीको सेयर मूल्य क्रमशः १.३९ प्रतिशत, ०.८३ प्रतिशत, ०.८१ प्रतिशत, ०.८५ प्रतिशत, ०.२९ प्रतिशत, ०.१९ प्रतिशत र ०.१४ प्रतिशतले बढेको छ।

सबैभन्दा धेरै गुमाउने कम्पनी
यो साता सबैभन्दा धेरै मानुशी लघुवित्त वित्तीय संस्थाका लगानीकर्ताले आफ्नो सेयर मूल्य गुमाएका छन्। यस कम्पनीका लगानीकर्ताले यो साता १२.३९ प्रतिशतले आफ्नो सेयर मूल्य गुमाए। यस्तै, साहस उर्जा जलविद्युत कम्पनीले १२.१८ प्रतिशत, महालक्ष्मी विकास बैंक ११.९५ प्रतिशत र उन्नती सहकार्य लघुवित्त वित्तीय संस्थाका लगानीकर्ताले ११.६३ प्रतिशतका दरले आफ्नो सेयर मूल्य गुमाएका छन्।

यो साता श्री इन्भेष्टमेन्ट फाइनान्सका लगानीकर्ताले ११.३५ प्रतिशतका दरले आफ्नो सेयर मूल्य गुमाएका छन्। खानिखोला जलविद्युत कम्पनी ११.११ प्रतिशत, साइन रेसुङगा विकास बैंक ११.०९ प्रतिशत, ग्रिनलाइफ जलविद्युत कम्पनी १०.५९ प्रतिशत र हिमालयन पावर पार्टनर कम्पनीका लगानीकर्ताले १०.१४ प्रतिशतले आफ्नो सेयर मूल्य गुमाएको नेप्सेले जनाएको छ।

के कारण घट्यो नेप्से?
नेपाल राष्ट्र बैंकले मौद्रिक नीति सार्वजनिक गर्दा ल्याइएको ‘४÷१२ को क्याप’ सीमा पहिलो त्रैमासिक समीक्षामा हट्ने सेयरबजारका लगानीकर्ताको अनुमान थियो। तर, राष्ट्र बैंकले समीक्षाका क्रममा उक्त निणर्यमा फेरबदल गरेन। यसकारण बजार घटेको जानकारहरुको बुझाइ छ।

यस्तै, अहिले बैंकिङ क्षेत्रमा तरलताको दबाब सिर्जना भएको छ। निक्षेप संकलन घटेको छ। कर्जा लगानी बढिरहेको छ। यसले गर्दा बैंकहरुले भनेजति पैसा लगानी गर्न पाइरहेका छैनन्। यसको असर पनि सेयर बजारमा परेको जानकारहरु बताउँछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।