काठमाडौं– पछिल्लो समय दर्शकको रोजाइमा ओटिटी (ओभर दि टप) माध्यम पनि पर्छ। फिल्म तथा वेब सिरिजहरु हेर्नका लागि गुणस्तरीय ओटिटीमाध्यमहरु बढेसँगै यसमा दर्शकको चाप पनि अत्यधिक नै छ। ‘नेटफ्लिक्स’, ‘डिज्नी प्लस हटस्टार’, ‘अमेजोन प्राइम’लगायत थुप्रै ओटिटी माध्यममा करोडौंको लागनीमा बनेका सिनेमा र वेब सिरिज रिलिज भइरहेका छन्।
ओटिटीमा फिल्म र सिरिज हेरेर फाइदा उठाउने दर्शकका लागि डिसेम्बर महिना झन् फलदायी हुँदै छ। यो महिना नेटफ्लिक्स, अमेजोन प्राइम, हटस्टारलगायतका ओटिटी प्लेटफर्महरुमा लामो समयदेखि कुरिएका वेबसिरिज र फिल्म सार्वजनिक हुँदै छन्।
विश्वभर नै चर्चा कमाएको स्पेनिस वेब सिरिज ‘मनी हाइस्ट’को अन्तिम भाग डिसेम्बर ३ मा नेटफ्लिक्समा प्रसारण हुँदै छ। सिरिजको तेस्रो सिजनको पहिलो भाग ३ सेम्टेम्बरमा प्रसारण भएको थियो। सिरिजका पात्र प्रोफेसर र उनको समूहको फैसला सिरिजमा हेर्न बाँकी छ। विश्वभर नै मन पराइएको यो सिरिजको पाँचौं सिजनको दोस्रो भाग डिसेम्बर ३ बाट नेटफ्लिक्समा स्ट्रिमिङ गर्न पाइनेछ।
बलिउड अभिनेता अभिषेक बच्चनको फिल्म ‘बब विश्वास’ पनि डिसेम्बर ३ बाट ओटिटी माध्यम ‘जी फाइभ’मा प्रसारण हुँदै छ। ट्रेलर सार्वजनिक भएसँगै यो फिल्मलाई लिएर दर्शकले निकै चासो देखाएका छन्। फरक लुक्स र फरक कथामा देखिएका अभिषेकको यो फिल्मलाई शाहरुख खानको प्रोडक्सन हाउसले निर्माण गरेको छ भने दीया अन्नपूर्णा घोषले निर्देशन गरेकी छिन्।
डिसेम्बर १० मा बलिउड अभिनेत्री रविना टण्डन मुख्य भूमिकामा रहेको थ्रिलर सिरिज ‘अरुण्यक’ पनि सार्वजनिक हुँदै छ। सिरिजमा रविना प्रहरी अधिकृतको भूमिकामा देखिएकी छिन्, जो एक पर्यटकको हराएको मुद्दामा काम गरिरहेकी हुन्छिन्। रविनासँगै यो सिरिजमा अशुतोष राणा, जाकिर हुसैन, मेद्दना मलिकलगायत भारतीय कलाकारले अभिनय गरेका छन्। यो सिरिजलाई विनय वैकुलले निर्देशन गरेका हुन्।
नेटफ्लिक्समा प्रसारण हुने अर्को प्रतिक्षित सिरिजमा बलिउड अभिनेता आर माधवन र सुरवीन चावला अभिनित सिरिज ‘डीकपल्ड’ पनि रहेको छ। १७ डिसेम्बरबाट रिलिज हुने सिरिजमा एउटा विवाहित जोडीबीचको कथालाई देखाइएको छ। हार्दिक मेहताले निर्देशन गरेको सिरिजमा माधवन र सुरवीन श्रीमान–श्रीमतीको भूमिकामा देखिएका छन्।
अदालती फिल्म मन पराउने दर्शकका लागि डिसेम्बरमा ‘४२० आइपिसी’ रिलिज हुँदै छ। फिल्ममा एक सामान्य चार्टर्ड एकाउन्टेन्ट आर्थिक अपराधमा फरेपछिको कथालाई देखाइएको छ। मनिष गुप्ताको निर्देशनमा बनेको फिल्ममा विनय पाठक, रणवीर सोरे, गुल पनाङ र रोशन विनोद मेहरा लगायतका कलाकारहरुको अभिनय रहेको छ। ‘जी फाइव’मा यो फिल्म १७ डिसेम्बरमा रिलिज हुँदै छ।
दक्षिण भारतीय अभिनेता धनुषले बलिउडमा डेभ्यु गर्न लागेको फिल्म ‘अतरंगी रे’ पनि डिसेम्बरमा नै ‘डिन्नी फ्लस हटस्टार’मा रिलिज हुँदै छ। धनुषसँगै अक्षय कुमार र सारा अली खानले अभिनय गरेका छन्। तीन पात्रहरु बीचमा त्रिकोणात्मक प्रेम देखाइएको फिल्म अनन्द एल रायको निर्देशनमा बनेको छ।
यी बाहेक डिसेम्बरमै ‘एमिली इन पेरिस–२’, ‘इनसाइड एज–३’, ‘आर्या–२’, ‘द विचर–२’, ‘डन्ट लुक अप’जस्ता फिल्म तथा सिरिजहरु रिलिज हुँदै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1782224905-1782225890.jpeg)
