काठमाडौं– करिब दुई वर्षसम्म कोरोना महामारीका कारण बन्द रहेका सिनेमा हल असोज २१ गते खुल्दा हलमा लाग्ने कुनै नेपाली फिल्म थिएनन्।
सिनेमा हलमा वितरकहरुले अंग्रेजी फिल्म ‘फास्ट एण्ड फ्युरियस’को सहारा लिनु परेको थियो। असोज २६ मा दुई नेपाली फिल्म ‘डाँडाको वरपीपल’ र ‘धन्धागिरी’ प्रदर्शन भएपनि त्यसले खासै फरक पारेन। सिनेमा हलमा नेपाली फिल्मले दर्शकलाई तान्न सकेनन्।
नेपाली फिल्म हेर्न दर्शक नआएपछि नेपाली फिल्मका निर्माता/निर्देशकले आफ्नो फिल्म प्रदर्शन गर्ने कुरै भएन। लाखौं लगानी भएको फिल्मलाई त्यसै प्रदर्शन नगरिने तर्कसहित उनीहरु बसेका थिए।
तर, बलिउड फिल्म ‘सूर्यवंशी’ नेपाली सिनेमा हलमा नोभेम्बर ५ देखि प्रदर्शनमा आएसँगै दर्शक सिनेमा हलमा फर्किए। तिहारको अवसरमा प्रदर्शन भएको उक्त फिल्मले सुख्खा बनेको नेपाली सिनेक्षेत्रका लागि पानीको काम गर्यो।
‘सूर्यवंशी’का कारण दर्शक हलसम्म फर्किएपछि फेरि नेपाली निर्देशक/निर्माताले आफ्नो फिल्म प्रदर्शन गर्ने आँट गरें। कतिसम्म भने कुनै बेला हिन्दी फिल्मको विरोध गर्ने कलाकार तथा निर्माता दीपक राज गिरिसम्मले दर्शक सिनेमा हलसम्म आएकाले हिन्दी फिल्मलाई साथ दिनुपर्ने बताएका थिए। हिन्दीकै सहारामा उनीहरुमा त्यो हिम्मत आएको देखिएको थियो।
अब माहोल फरक भएको छ। आगामी वर्षको सुरुवातसम्मलाई नेपाली फिल्म प्रदर्शनको घोषणा भइसकेको छ। लामो समयदेखि पखाईंमा रहेका ‘प्रेम गीत ३’ देखि ‘चिसो मान्छे’सम्मका फिल्महरुले प्रदर्शनको मिति तोकिसकेका छन्।
यसबीच निर्माता अर्जुन कुमार भने हिन्दी फिल्मको विरोधमा उत्रिएका छन्। उनले निर्माण गरेको फिल्म ‘चपली हाइट ३’ पुस २ गतेबाट प्रदर्शनमा आउँदै छ। आफ्नो फिल्मसँगै दक्षिण भारतीय सिनेमा ‘पुष्पः द राइज’ पनि प्रदर्शन हुने भएपछि अर्जुन आक्रोशमा उत्रिएका हुन्। उनी हिन्दी डब फिल्मको विरोध गर्दै यी फिल्म नेपालमा ल्याउनेलाई ‘दलाल’सम्म भन्न पुगेका छन्।
केही दिनअघि सामाजिक सञ्जालबाट उनले आफ्नो फिल्मसँग दक्षिण भारतीय फिल्म जुँध्ने भएपछि विरोध सुरु गरेका थिए। उनले फेसबुकमा लेखेका छन्, ‘डेढ–दुई लाखमा हिन्दी डब फिल्म ल्याएर दलालहरु अझैं नेपाली फिल्मलाई तर्साउन खोज्छस्? याद गर, नेपाली मेकरलाई सधैं यसरी नसताउ, पछि पछुताउनु पर्ला।’
सञ्चारमाध्यमदेखि सामाजिक सञ्जालमा निरन्तर विरोध गरिरहेका अर्जुनले आफू हिन्दी फिल्मबाट नडराएको प्रष्टिकरण पनि दिएका छन्। तर, सँगै आफ्नो फिल्मसँग अर्को फिल्म जुँध्ने भएकोमा गुनासो पनि गरिरहेका छन्। दुई दिनअघि उनले फेसबुकमा लेखेका थिए, ‘कहाँ कहाँबाट धुँवा निकाल्न पर्छ, मलाई सबै थाहा छ। नेपाली फिल्मलाई धेरै नहेप।’
हिन्दी फिल्म चलेर दर्शक सिनेमा हलमा फर्किएपछि नै आफ्नो फिल्म प्रदर्शन गर्ने हिम्मत जुटाएका निर्मातामध्येका अर्जुन अहिले भने हिन्दीको विरोधमा उत्रिए। आफ्नो फिल्मको दर्शक बाँडिने डर हो वा अरु केही, त्यो उनले नै जान्ने कुरा हो। तर, कहिले हिन्दीकै समर्थन गर्नु, हिन्दीकै आडमा आफ्नो फिल्म प्रदर्शन गर्ने हिम्मत जुटाउनु, अनि कहिले हिन्दीकै विरोध गर्नु चाहिँ अलि अनुचित नै मान्नुपर्छ। आखिर उनले फिल्ममा गरेको लगानी चाहिँ लगानी हुने र अरुले गरेको चाहिँ ‘बालुवामा पानी’ हुने त होइन नि!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
