काठमाडौं– जिम्बावेमा जारी विश्वकप छनोट प्रतियोगितामा सहभागी श्रीलंकन महिला क्रिकेट टोलीका ६ खेलाडीको कोरोना परीक्षण रिपोर्ट पोजेटिभ देखिएको छ।
श्रीलंका क्रिकेट बोर्डले आइतबार एक विज्ञप्ति जारी गर्दै उक्त जानकारी दिएको हो। दक्षिण अफ्रिकामा कोरोनाको नयाँ भेरियन्ट फेला परेपछि अन्तर्राष्ट्रिय क्रिकेट काउन्सिल (आईसीसी)ले शनिबार जिम्बावेमा भइरहेको छनोट प्रतियोगिता रद्द गरेको थियो।
श्रीलंकाका टिलका एक सदस्यमा कोरोना पोजिटिभ देखिएपछि वेस्ट इन्डिज र श्रीलंकाबीचको खेल रद्द गरिएको थियो। त्यसपछि आईसीसीले छनोट रद्द गर्ने निर्णय गरेको हो।
यद्यपि, पोजिटिभ देखिएका खेलाडीहरू ओमिक्रोन भेरियन्टबाट संक्रमित भएका हुन् या होइनन् भन्ने कुरा अझै खुलाइएको छैन।
‘टोली अझै जिम्बाब्वेमा छ र उनीहरूलाई सकेसम्म चाँडो श्रीलंका फिर्ता ल्याइनेछ,’ श्रीलंका क्रिकेट बोर्डका सीईओ एस्ले डी सिल्भाले भने।
खेलाडीहरू परीक्षणको रिपोर्ट नेगेटिभ नआएसम्म त्यहाँ बस्नुपर्नेछ। यता, संक्रमित नभएका टोलीका खेलाडी चाँडै फर्कन सक्नेछन्।
यद्यपि, ओमिक्रोन भेरियन्टलाई ध्यानमा राख्दै श्रीलंका सरकारले अफ्रिका महादेशका दक्षिणी देशहरूबाट आउने यात्रुहरूका लागि अनिवार्य क्वारेन्टिनमा राख्ने निर्णय गरेको छ।
त्यसैले, श्रीलंका आइपुगेपछि खेलाडीहरु क्वारेन्टिनमा बस्नुपर्नेछ। श्रीलंकन टोलीका सबै सदस्य अहिले जिम्बावेमा आइसोलेसनमा छन्।
छनोट रद्द भएपछि आईसीसीले बंगलादेश, पाकिस्तान र वेस्ट इन्डिजले अर्को वर्ष न्यूजिल्यान्डमा हुने विश्वकपमा खेल्ने बताएको छ।
यी तीन टोलीबाहेक न्यूजिल्यान्ड, अष्ट्रेलिया, भारत, इंग्ल्याण्ड र दक्षिण अफ्रिका विश्वकपमा छनोट भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764157624.png)
-1764146706.png)
-1764080971.png)
-1763721444.png)
-1763559424.jpg)
