एनसेलको स्वास्थ्यसम्बन्धी पहलले पायो विट्सा र एसोसीओ अवार्ड

कर्पोरेट

नेपाल लाइभ बुधबार, मंसिर ८, २०७८ १३:१७

काठमाडौं- एनसेल आजियाटा लिमिटेडले धुलिखेल अस्पतालसँगको सहकार्यमा ग्रामीण, दूरदराजका सेवाबाट वञ्‍चित समुदायहरुलाई गुणस्तरीय स्वास्थ्य सेवा प्रदान गर्न सञ्‍चालन गरेको टेलिमेडिसिन र स्वास्थ्य सूचना कार्यक्रम दुई वटा प्रतिष्ठित अन्तर्राष्ट्रिय अवार्डबाट सम्मानित भएको छ।

यो कार्यक्रमका लागि एनसेलले 'विट्सा ग्लोबल आईसीटी एक्सिलेन्स अवार्ड २०२१' र 'एसोसीओ अवार्ड २०२१' जित्न सफल भएको कम्पनीले जनाएको छ।

कम्प्युटर एसोसियसन नेपाल (क्यान) महासंघले शुक्रबार काठमाडौंमा आयोजना गरेको ‘बीटुबी बिजनेस समिट २०२१’ को अवसर पारी यी दुई पुरस्कार शिक्षा, विज्ञान तथा प्रविधिमन्त्री देवेन्द्र पौडेलले एनसेललाई हस्तानतरण गरेका थिए। वर्ल्ड इन्फरमेसन टेक्नोलोजी एण्ड सर्भिसेस् अलाइन्स (विट्सा) र एसियन-ओसियनियन कम्प्यूटिङ इण्डष्ट्री अर्गनाइजेसन (एसोसीओ)मा क्यान महासंघले नेपालको प्रतिनिधित्व गर्दछ।

विट्सा ग्लोबल आईसीटी एक्सिलेन्स अवार्ड २०२१ को विजेताहरुको घोषणा गत कात्तिक २७ गते बंगलादेशको ढाकामा आयोजित एक कार्यक्रममाझ भएको थियो । एनसेलले यो अवार्ड मेरिट विनरको रुपमा ई-हेल्थ सोलुसन अवार्ड (प्राइभेट सेक्टर/एनजीओ) विधाअन्तर्गत जितेको हो ।

त्यस्तै गत कात्तिक २६ गते बंगलादेशको ढाकामा आयोजित वर्ल्ड कङ्ग्रेस अन इन्फरमेसन एण्ड टेक्नोलोजी २०२१ कार्यक्रममा एनसेलले हेल्थटेक अवार्ड २०२१ विधाअन्तर्गत एसोसीओ अवार्ड जितेको घोषणा गरिएको थियो। यस कार्यक्रममा विभिन्न २४ देशका ३५ संघसंस्था तथा कम्पनीहरु एसोसीओ अवार्डबाट सम्मानित भएका थिए।

'एक सयभन्दा बढी योग्य, नवीन तथा राम्रा आवेदनहरुको समीक्षा गर्ने हामीले मौका पायौं,' विश्वभरका सूचना तथा सञ्चार प्रविधि क्षेत्रका संघसस्थाहरुको छाता संगठन विट्साका सेक्रेटरी जनरल जीम पोइसन्टले शुक्रबार कार्यक्रममा देखाइएको भिडियो सन्देशमा भने, 'इनोभेटिभ ई-हेल्थ सोलुसन्सअन्तर्गत एनसेल आजियाटा लिमिटेड विजयी भएको छ। दूरदराजका जनसमुदायलाई सेलुलर र डिजिटल प्रविधिहरुको प्रयोगमार्फत् गुणस्तरीय स्वास्थ्य सेवा प्रदान गरेकाले यो पुरस्कार प्रदान गरिएको हो।'

एनसेलले आफ्नो व्यावसायिक सामाजिक उत्तरदायित्वअन्तर्गत प्रविधि तथा तथ्याङ्‍कमा आधारित स्वास्थ्य सेवा प्रदान गर्ने विधि अपनाइ ग्रामीण, दूरदराजका सेवाबाट वञ्‍चित समुदायहरुलाई उनीहरुको घरदैलोमा नै गुणस्तरीय स्वास्थ्य सेवा प्रदान गर्न धुलिखेल अस्पतालसँगको सहकार्यमा टेलिमेडिसिन र स्वास्थ्य सूचना कार्यक्रम सुरु गरेको थियो। उक्त कार्यक्रम धुलिखेल अस्पतालअन्तर्गतका विभिन्न ग्रामीण भेगका चार स्वास्थ्य केन्द्रहरुमा लागू गरिसकिएको छ। यस कार्यक्रमअन्तर्गत जनसमुदायले आफ्नै स्थानीय स्वास्थ्य केन्द्रमार्फत् धुलिखेल अस्पतालमा रहेका विषेशज्ञ डाक्टरहरुसँग परामर्श लिन सक्छन्।

'हाम्रो सामाजिक उत्तरदायित्वअन्तर्गत सुरु गरिएको स्वास्थ्यसम्बन्धी यस नवीन कार्यक्रमले प्रतिष्ठित विट्सा र एसोसीओ अवार्ड जित्न सफल भएकोमा हामी निकै खुसी छौं,' एनसेलका प्रमुख कार्यकारी अधिकृत एण्डी चोङले भने, 'यस पहलले द"रदराजका जनसमुदायको जीवनरक्षा गर्न मद्दत गर्नुका साथै आफ्नै ठाउँमा नै सेवा उपलब्ध हुने भएकाले सहरका अस्पतालमा जाँदा लाग्ने समय र स्रोत बचत गर्नमा योगदान गर्दछ। यो कार्यक्रमले १५ हजारभन्दा बढी घरधुरीका जनसमुदायहरुलाई दीर्घरोग, नसर्ने रोग, सरुवा रोग लगायतका रोगहरुको उपचार सेवामा प्रत्यक्ष योगदान गर्दछ।'

कार्यक्रम पुरस्कृत भएकोमा खुसी व्यक्त गर्दै धुलिखेल अस्पतालका प्रशासकीय निर्देशक डा. रमेश मकाजुले भने, 'एनसेलसँगको हाम्रो यस सहकार्यले अन्तर्राष्ट्रिय पुरस्कार पाउनु ठूलो सम्मान हो। जनसमुदायलाई सजिलै गुणस्तरीय स्वास्थ्य सेवामा पहुँच सुनिश्चित गर्न यो कार्यक्रम २० वा सोभन्दा बढी स्वास्थ्य केन्द्रमा लागू गर्ने हाम्रो योजना रहेको छ।'

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

५८ जिल्लामा भूमि आयोगका अध्यक्ष नियुक्त

विपिन जोशी सकुशल रहेको परराष्ट्रमन्त्रीको दाबी, फर्केर आउने आश्वासन

प्रयागराजमा महाकुम्भ मेला सुरु, ४० करोड सहभागी हुने अनुमान [तस्बिरहरु]