काठमाडौं- नेपाली कांग्रेसका जिल्ला कार्यसमितिहरुले मनोमानी तरिकाले अधिवेशनबापतको शुल्क उठाएका छन्।
तल्लो तहका संरचनाका पदाधिकारी तथा प्रदेश र केन्द्रको प्रतिनिधिको मनोनयनबापत चर्को शुल्क उठाएका हु्न्। केन्द्रले बनाएको निर्वाचन निर्देशिकाविपरीत रकम ‘मनलाग्दी’ उठाइएको कार्यकर्ताले गुनासो गरेका छन्। केन्द्रले निर्धारण गरेको शुल्कमा ३०० प्रतिशतसम्म वृद्धि गरी रकम उठाइएको छ।
केन्द्रले तोकेको शुल्कअनुसार प्रदेश महाधिवेशन प्रतिनिधिका लागि तीन हजार रुपैयाँ छ। केन्द्रीय महाधिवेशन प्रतिनिधिका लागि पाँच हजार रुपैयाँ र केन्द्रीय महासमिति सदस्यका लागि सात हजार रुपैयाँ शुल्क तय गरिएको थियो। केन्द्रले निर्धारण गरेको शुल्क लागू नगरी जिल्ला कार्यसमितिको निर्णयअनुसार बढी रकम असुल गरिएको हो।
‘अत्यधिक बढी शुल्क लिइएको छ। कांग्रेसलाई कम्युनिस्टले धनीको पार्टी भन्ने आरोप लगाउँथे। इलाममा तोकिएको शुल्कले त्यो आरोपलाई प्रमाणित गरेको छ,’ इलामबाट प्रदेश प्रतिनिधिमा उठेका हरि फुँयालले भने, ‘केन्द्रले तोकेकोभन्दा दोब्बर बढी शुल्क बुझाउनुपर्यो। जिल्ला कार्यसमितिले आफ्नो तरिकाले शुल्क तोकेको छ।’
कतिपय जिल्लामा शुल्क बढी उठाउन नहुने मत आए पनि उनीहरुको आवाजलाई बेवास्ता गर्दै रकम तोकिएको पाइएको छ। ट्रेड युनियन कांग्रेस इलामका अध्यक्षसमेत रहेका फुँयालले भने, ‘केहीले विरोध गर्दागर्दै पनि बढी शुल्क उठाउन जिल्ला कार्यसमितिले निर्णय लादेको छ।’
मोरङमा पदाधिकारी तथा प्रतिनिधिको मनोनयन गर्दा केन्द्रले तोकेको भन्दा बढी रकम उठाइएको छ। प्रदेश प्रतिनिधिका लागि मोरङमा पाँच हजार २०० रुपैयाँ उठाइएको ट्रेड युनियन कांग्रेसका केन्द्रीय उपाध्यक्ष अजयकुमार राईले जानकारी दिए। जबकि, केन्द्रले तोकेको रकम उक्त पदका लागि तीन हजार रुपैयाँ हो।
स्याङजामा केन्द्रीय प्रतिनिधिको लागि १५ हजार रुपैयाँ उठाइएको छ। केन्द्रका अनुसार केन्द्रीय प्रतिनिधिका लागि पाँच हजार रुपैयाँ तोकिएको थियो। जिल्ला कार्यसमितिको निर्णयको आधारमा केन्द्रले तोकेभन्दा बढी रकम उठाइएको केन्द्रीय महाधिवेशनको प्रतिनिधिमा मनोनयन गरेकी दिलीपा अधिकारीले बताइन्।
जिल्ला कार्यसमितिलाई सहयोग पुर्याउन थप रकम उठाइएको छ। ‘केन्द्रले एउटा तोकेको छ। जिल्लाको आवश्यकता र त्यहाँको खर्चको व्यवस्थापनका लागि शुल्क बढी लिइएको होला,’ कांग्रेस प्रवक्ता विश्वप्रकाश शर्माले भने।
केन्द्रीय सभापतिका लागि ३० हजार रुपैयाँ उम्मेदवारी शुल्क तय गरिएको छ। केन्द्रीय उपसभापति र महामन्त्रीका लागि समान २५/२५ हजार रुपैयाँ शुल्क निर्धारण गरिएको छ। सहमहामन्त्रीमा उम्मेदवारी दिनेले २० हजार रुपैयाँ शुल्क बुझाउनुपर्नेछ। केन्द्रीय सदस्यको उम्मेदवार हुन १० हजार रुपैयाँ शुल्क तोकिएको छ।
१४ जिल्लामा कांग्रेसको अधिवेशन सम्पन्न भएको छ। ६० भन्दा बढी जिल्लामा प्रदेश निर्वाचन क्षेत्रको अधिवेशन गत मंसिर ३ मा सकिएको छ। प्रतिनिधि सभा एउटामात्रै रहेको जिल्लामा प्रतिनिधि सभा क्षेत्र र जिल्लाको अधिवेशन सोमबार हुँदै छ।
एकभन्दा बढी प्रतिनिधि सभा क्षेत्र रहेका जिल्लाको प्रतिनिधि सभा क्षेत्रको अधिवेशन पनि भोलि नै गरिँदै छ। एकभन्दा बढी प्रतिनिधि सभा रहेका जिल्लाको जिल्ला अधिवेशन भने मंसि। १० को लागि तोकिएको छ।
सात प्रदेशको अधिवेशन मंसिर १६ र १७ मा हुने गरी मिति तोकिएको छ। केन्द्रीय महाधिवेशन मंसिर को २४ देखि २६ काठमाडौंमा हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
