काठमाडौँ– माइतीघरमा आइतबार ‘स्वतन्त्र राष्ट्रिय कानुन व्यवसायी अभियान’को प्रदर्शन थियो। प्रदर्शनमा सहभागी भने पत्रकारको प्रश्नमा एउटै जवाफ दिन्थे, ‘त्यो त कालो कोट लगाउनेहरुलाई सोध्नुहोस्।’
प्रदर्शनमा ‘विद्रोही’ न्यायाधीशले गरेको बेञ्च बहिस्कार र बार एसोसिएसनको आन्दोलनविरुद्ध नारा लगाइएको थियो। उनीहरुले ‘दबाबको शासन अन्त्य गर, विधिको शासन कायम गर’, ‘बेन्च बहिष्कार अन्त्य गर’ ‘मेरो पेसी कैले आउँछ श्रीमान्??’ जस्ता नारा लेखिएका ब्यानर बोकेका थिए। उनीहरूले प्रधानन्यायाधीशको पक्षमा प्रदर्शन गरिरहेको प्रष्टै थियो।
प्रदर्शनमा अधिकांश मजदुर र स्कुले विद्यार्थी थिए। वृद्ध र गर्भवतीलाई पनि ल्याइएको थियो। धेरैले नारासमेत लगाएका थिएनन्। हरेकका हातमा पर्चा भने थियो। अधिकांशलाई कति बेलासम्म त्यहाँ बसिरहने भन्ने समय बताइएको थियो।
हरि विक कक्षा ४ मा पढ्छन्। उनी विद्यालय छाडेर आफन्तको साथ लागेर जुलुसमा भाग लिन आएका थिए। जुलुसमा आउनुको कारणबारे उनले भने, ‘न्यायका लागि।’ थप प्रश्न गर्दा उनको जवाफ थियो, ‘काला कोट लगाउनेलाई सोध्नू।’
भीमार्जुन लामा प्रदर्शनस्थलको पछाडि बसेका थिए। आफूलाई जुलुसमा बोलाएकोले आएको तर, के का लागि हो भन्ने थाहा नभएको उनले बताए। ‘जुलुसमा आएको हुँ। अरु को मान्छे छन् म चिन्दिनँ,’ उनले भने, ‘साथीहरूले जाउँ भनेपछि आएँ। यहाँ के भइरहेको छ थाहा छैन।’
त्यस्तै, सुस्मिता पाण्डे पनि स्कुल नगएर जुलुसमा आएकी छिन्। उनलाई ‘घुमाघाम गर्ने’ भनेर ल्याइएको रहेछ। तर, के को लागि आन्दोलन भइरहेको छ थाहा नभएको बताइन्। ‘घुम्ने भनेर यता ल्यायो, तर जुलुस रै’छ। यहाँ आएपछि मात्र थाहा पाएँ,’ उनले भनिन्।
गोविन्द राईलाई ‘एक जना’ दाइले ल्याएका थिए। ‘चिनेको दाइले जाम भन्यो, काम छोडेर आएँ,’ उनले भने। उनी मजदुरी गर्छन्। उनले पनि यहीँ आएपछि मात्र जुलुसमा सहभागी हुन ल्याएको थाहा पाए।
सम्झना विकले भने आफू न्यायका लागि आएको बताइन्। तर, थप प्रश्न गर्दा ‘काला कोट लगाउनेलाई’ सोध्न भनिन्।
ओखलढुंगाका कुमार गर्तौला वैदेशिक रोजगारीको लागि भिसा लगाउन काठमाडौँ आएका हुन्। आफूलाई केही दिन ‘रोजगारी’ पाइन्छ भनेर ल्याएको बताए। आफूलाई के कार्यक्रम भइरहेको छ भन्ने पनि थाहा नभएको उनको भनाइ छ। धनकुटाका ओम खत्रीलाई पनि पेट्रोलियम पदार्थको भाउ घटाउने र न्यायको पक्षमा आन्दोलन गर्न केही दिन ‘रोजगारी’ दिने भनेर बोलाइएको रहेछ।
अर्की सहभागी रविना विश्वकर्माले ‘न्यायको लागि’ जुलुसमा आएको बताइन्। उनी ललितपुरको ग्वार्कोबाट माइजुसँग आएकी हुन्। उनी गर्भवति छिन्। ‘माइजुले जाउँ भनेको हुनाले आएँ,’ उनले भनिन्।
एक जना सहभागीले आफूलाई ल्याउने मान्छेको नाम थाहा नभएको तर, चिनेको बताए। उनले चिनाएको व्यक्तिले सबै सहभागी स्वइच्छाले आएको बताए। तर, आफ्नो नाम भन्न चाहेनन्। माइक समातेर बोलिरहेकी आयोजकमध्येका एक वकिललाई बालबालिका र गर्भवतीको सहभागताबारे सोध्दा आफू आयोजक नभएको भनेर पन्छिएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
