कांग्रेस महाधिवेशनका लागि छानिएका ३६४ प्रतिनिधिमा कुन पक्ष बलियो?

महाधिवेशन विशेष

लिलु डुम्रे मंगलबार, कात्तिक ३०, २०७८ १८:१२

काठमाडौं– नेपाली कांग्रेसको १४औं महाधिवेशनका लागि १३ जिल्लाबाट प्रतिनिधि चयन भएका छन्। हालसम्म छनोट भएका ३६४ प्रतिनिधिमध्ये बहुमत संख्या आफ्नो पक्षमा रहेको पार्टी भित्रका बेग्लाबेग्लै समूहको दाबी छ।

अधिवेशन सकिएका १३ जिल्लामध्ये गोरखामा मात्रै दुई निर्वाचन क्षेत्र रहेको छ। प्रतिनिधि सभा निर्वाचन क्षेत्रबाट २६ जना चयन हुने हुँदा १३ जिल्लाबाट ३६४ प्रतिनिधि चयन भइसकेका छन्। मनाङ, मुस्ताङ, गोरखा, ताप्लेजुङ, मुगु, संखुवासभा, रामेछाप, दोलखा, कालीकोट, हुम्ला, रुकुमपूर्व, बाजुरा र बझाङ जिल्लाको अधिवेशन सकिएको छ।

छनोट भएका प्रतिनिधिमा आ-आफ्नो पक्ष बलियो रहेको कांग्रेस भित्रका तीनै समूहको दाबी छ। कांग्रेस सभापति शेरबहादुर देउवा पक्षले १३ जिल्लाका प्रतिनिधिमा आफ्नो पक्ष स्पष्ट बहुमतमा रहेको दाबी गरेको छ। अर्कोतर्फ, संस्थापनइतरको, वरिष्ठ नेता रामचन्द्र पौडेल पक्षले देउवा पक्षको दाबीलाई अस्वीकार गरेको छ। तेस्रो धारका नेता कृष्णप्रसाद सिटौला पक्षले दोस्रो स्थानमा आफूनिकट प्रतिनिधि चयन भएको दाबी गरेको छ।

संस्थापनइतरमा पनि फरक-फरक पक्षले आफ्नो समूहनिकट बढी चुनिएको दाबी गरेका छन्। चयन भएका प्रतिनिधिकै आधारमा महाधिवेशन भए पनि देउवा पराजित हुने सभापतिको उम्मेदवारी घोषणा गरेका डा शेखर कोइराला पक्षको निचोड छ। अहिले चयन भएका प्रतिनिधि विगतको निरन्तरता नभएकाले शेखर विजयी हुने आधार बन्दै गएको उक्त पक्षको आकलन छ।

शेखरनिकट रहेर उनलाई सभापतिमा विजयी गराउनका लागि सक्रिय राजनीतिक विश्लेषक पुरञ्जन आचार्य १३ जिल्लाको आधारमा नै देउवा पराजित हुने दाबी गर्छन्। विगतको महाधिवेशन र अहिलेका प्रतिनिधि चयनको आफूले अध्ययन गरेको उनले बताए।

‘एउटा फ्रेस नेतृत्वको खोजी छ। यही हुन्छ भन्ने छैन। तर, अहिले भइरहेकोमध्ये एउटा फ्रेस स्टार्ट गर्दाखेरी डा शेखर कोइराला त्यसमा अरुभन्दा अग्रिम मोर्चामा छन्’, विश्लेषक आचार्य भन्छन्, ‘उनी फ्रेस छन्। अर्को कुरा उनीसँग युवा टीम छ। अहिले आउने अधिकांश महाधिवेशन प्रतिनिधिहरु धेरैजसो युवाहरु पनि छन्।’

शेखरनिकट आचार्यको दाबीलाई नेविसंघका पूर्वमहामन्त्री कुन्दनराज काफ्ले खण्डन गर्छन्। शेखरको पक्षमा सीमित संख्यामा लोकप्रिय मत आउने काफ्ले बताउँछन्। तेस्रो धारका नेता सिटौलानिकट रहेका काफ्लेले चयन भएका प्रतिनिधिमध्ये पहिलो स्थानमा देउवा पक्ष र दोस्रो स्थानमा आफ्नो समूह रहेको दाबी गरे।

‘शेखर दाइको पक्षमा सबै क्षेत्रबाट लोकप्रिय केही मत आएको छ। त्यो मत न्यून हुन्छ। एउटा क्षेत्रबाट २/४ जना उहाँको पक्षमा आउँदैमा समग्रमा बहुमत आफ्नो पक्षमा आएको मान्न सकिन्न’, काफ्लेले भने, ‘संगठनको मत देउवा पक्षकै बढी आएको छ। दोस्रोमा सिटौला पक्ष हो।’

बाजुरामा सिटौला पक्षबाट बढी प्रतिनिधि निर्वाचित भएको उक्त खेमाको दाबी छ। दोलखामा देउवा र सिटौला पक्षका प्रतिनिधि बराबर आएको बताइन्छ। पौडेल समूहमा चार पक्षमा प्रतिनिधि विभाजित हुने अवस्था छ। एउटै समूहका चार नेताका पक्षधर प्रतिनिधि चयन हुँदा त्यसको प्रत्यक्ष लाभ देउवा समूहले उठाउने विश्लेषण हुने गरेको छ।

दशैंअघि २१ हिमाली जिल्लाको अधिवेशन सक्ने पूर्वनिर्धारित कार्यतालिका भए पनि १३ जिल्लाको मात्र अधिवेशन सकिएको थियो। २१ हिमाली जिल्लाध्ये अधिवेशन हुन नसकेका आठ जिल्लामा सोलुखुम्बु, सिन्धुपाल्चोक, रसुवा, डोल्पा, जुम्ला, दार्चुला, धादिङ र म्याग्दी छन्। सिन्धुपाल्चोकमा तीन वडाको अधिवेशनको मिति कात्तिक २७ का लागि तय गरिएको थियो। उक्त मितिमा पनि अधिवेशन हुन सकेको छैन। सिन्धुपाल्चोकमा समायोजनको विवाद कायमै रहेको बताइएको छ।

पौडेल पक्षले आफ्नो भनी दाबी गरेका निर्वाचित दुई जिल्ला सभापतिमा समेत देउवा खेमाले आफूनिकट रहेको बताएको छ। पूर्वी रुकुमका केशरमान रोका र गोरखाका नन्दप्रसाद न्यौपाने संस्थापननिकट रहेको देउवानिकट एक नेताले बताए। पूर्वी रुकुम र गोरखामा संस्थापन पक्षको सहयोगले जिल्ला सभापति चयन गरिएको देउवा समूहको भनाइ छ।

जिल्ला सभापतिमा पौडेल पक्ष बहुमतमा देखिएको बताइन्छ। पौडेल समूहबाट संखुवासभामा दीपक खड्का, कालीकोटमा अम्मबहादुर शाही, दोलखामा बर्मा लामा, मुस्ताङमा रोमी गौचन, रुकुम पूर्वमा केशरमान रोका र बाजुरामा रामसिंह रावल चुनिएका छन्। गोरखामा निर्वाचित सभापति नन्दप्रसाद न्यौपाने नेता गगन थापानिकट हुन्। यद्यपि, रोका र न्यौपाने आफू निकट रहेको संस्थापन पक्षको दाबी छ।

देउवा समूहबाट ताप्लेजुङमा गजेन्द्रप्रसाद तुम्याहाङ, हुम्लामा मोहनविक्रम सिंह, रामेछापमा पूर्णबहादुर तामाङ (कान्छाराम), मुगुमा ऐनबहादुर शाही, बझाङमा खडक बोहरा र मनाङमा शंकर गुरुङ जिल्ला सभापति चुनिएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।