काठमाडौं– डेभिड वार्नर इन्डियन प्रिमियर लिग (आईपीएल) मा निकै आक्रामक ब्याट्सम्यानका रुपमा चिनिन्छन्। उनले आफ्नो कप्तानीमा सनराइजर्स हैदरावादलाई उपाधि दिलाएका थिए। तर, पछिल्ला केही समय उनको लागि राम्रो भएन, जब प्रदर्शन मध्यमा रह्यो। ८ खेलमा १९५ रन बनाएका उनलाई टोलीबाट हटाइयो भने कप्तानीसमेत खोसियो।
सन् २०२० सम्म वार्नरले ५२ को औसत र १४५ को स्ट्राइक रेटमा रन बनाएका थिए। तर, २०२१ उनको लागि शुभ रहेन। उनको स्कोरिंगको गति सुस्त भएको कारण उनलाई हैदरावादले टोलीबाट समेत हटायो। उनको कप्तानी खोसेर न्यूजिल्याण्डका कप्तान केन विलियम्सनलाई सुम्पियो।
उनी आईपीएल २०२१ का ८ इनिङ्समा दुई पटक रनआउट भए। त्यहीँबाट हो आईपीएल लिजेण्ड वर्नरको खराब लय सुरु भएको।
यद्यपि, वार्नर पहिलो पटक रन बनाउन संघर्ष गरिरहेको भने होइन। सन् २०१८ मा अष्ट्रेलियाले बल टेम्पिरिङ गरेको आरोपमा प्रतिबन्ध लगाएपछि उनी नेपालका बलर सोमपाल कामी सम्मिलित विनिपेग हक्स टोलीबाट खेले।
ग्लोबल टी२० लिगको प्रतिनिधित्व गर्न क्यानडा पुगेका उनले त्यहाँ १३.६ को औसत र ११४.७ को स्ट्राइक रेटमा रन बनाए।
त्यसपछि उनले क्यारेबियन प्रिमियर लिग (सीपीएल) मा सेन्ट लुसियाका लागि खेले।आफ्नो पहिलो तीन इनिङ्समा ९, ११ र ७ रन बनाए।
त्यसपछि धेरैले वार्नरले क्रिकेट करिअर अन्त्य हुनसक्ने आकलन गरेका थिए। तर, त्यसो भएन। २०१९ मा वार्नरले आईपीएलमा १४३.८६ को स्ट्राइक रेटमा ६९२ रन बनाएर धमाकेदार पुनरागमन गरे। त्यही बेलाबाट हो, वार्नर हिटरबाट ब्याट्सम्यान बनेका। र, विशेष गरी टेस्ट खेलाडी।
वार्नरले आफूलाई टी२० हिटिङ मेसिनबाट क्रिकेटरमा परिणत गरेका छन्, जसको काम लगातार रन बनाउने हो। उनले आफ्नो शरीरलाई पनि फुर्तिलो र चुस्त बनाएका छन्।
उनले लेगस्पिन वा मिडियम फेस गर्न छाडेका छन्। उनको काँधले यसलाई खेल्न दिँदैन। तर, यसको मतलब यो होइन कि उनले अब छक्का प्रहार गर्न सक्दैनन्। उनले अझै पनि स्पिन बलिङविरुद्ध ठूला सर्ट खेल्छन्। यद्यपि, यो पनि सत्य हो उनी अब त्यति खतरनाक छैनन्, जति हामीले उनलाई केही वर्ष अघि भारतका मिडिल फास्ट बलर विनय कुमारविरुद्ध खेलेका देखेका थियौं।
पछिल्ला केही महिनामा आईपीएलमा वार्नरको ब्याटिङ र टी२० विश्वकपमा दक्षिण अफ्रिकाविरुद्धको इनिङ्स देखेपछि उनले फेरि एकपटक निकै आलोचनाको सामना गर्नुपरेको थियो र सबैको निशानामा परे।
तर, यो पनि मान्नुपर्छ वार्नरको खेल्ने शैली फेरिएको छ र यो टोलीको लागि राम्रो संकेत हो। टी२० विश्वकपमा अस्ट्रेलियाली कप्तान एरोन फिन्चको ब्याट चलेन। तर, वार्नरको ब्याटबाट रन बनिरह्यो। उनले श्रीलंकाविरुद्ध ४२ बलमा ६५ रन बनाए। यद्यपि, उनी दक्षिण अफ्रिका, इंग्ल्याण्ड र बंगलादेशविरुद्ध सुरुमै आउट भए। उनी दक्षिण अफ्रिकाविरुद्ध १४, इंग्ल्यान्डसँग १ र बंगलादेशविरुद्ध १८ रनमा आउट भएका थिए।
तर, वेस्ट इन्डिजविरुद्धको महत्वपूर्ण खेलमा उनले ५६ बलमा ८९ रनको अविजित इनिङ्स खेलेका थिए। त्यसपछि पाकिस्तानविरुद्धको सेमिफाइनलमा सनसनीपूर्ण शैलीमा खेले।
हैदरावादको टोलीले दुवै तर्फबाट दर्शकदीर्घामा ९० माइल प्रतिघण्टाको गतिमा बल हान्न सक्ने खेलाडीलाई सन् २०१९ मा फर्काएको थियो। यो वर्ष वार्नर टोलीबाट बाहिरिए। तर, आईपीएलको ६ सिजनमा उनको दबदबा थियो।
टी२० प्रतियोगितामा आफ्नो दबदबा रहेको कुरा विश्वकपको सेमिफाइनलअन्तर्गत पाकिस्तानविरुद्ध खेलमा उनले पुन: प्रमाणित गरेका छन्। यो खेल हारेको भए अस्ट्रेलियाले विश्वकपको उपाधि चुम्न पाउने थिएन। तर, वार्नरले पाकिस्तानको अविश्वसनीय बलिङ लाइन अपविरुद्ध डटेर खेले।
पाकिस्तानका उदाउँदो फास्ट बलर शाहिन शाह अफ्रिदीसँग बचेर खेले उनले लेगस्पिनर शादाब खानविरूद्ध राम्रो खेल खेले। तर, मोहम्मद हफिजले दोहोरो बाउन्सरमा उनलाई बोल्ड गरे। त्यसअघि उनले नो-बललाई पनि छक्का प्रहार गरेका थिए। उनी कति चतुर छन् भन्ने कुरा यसले पनि प्रमाणित गरेको छ।
अहिले उनको ब्याटिङ लय राम्रो देखिएको छ। विश्वकप उपाधि जिताउन उत्कृष्ट प्रदर्शन गरेका वार्नर प्लेयर अफ द टुनामेन्ट (सर्वोत्कृष्ट) खेलाडी चुनिए। उनले ७ खेलमा ३ अर्धशतकसहित २ सय ८९ रन बनाए।
वार्नरले १४६.७० को स्ट्राइक रेटमा ३२ चौका र १० छक्का प्रहार गरे। औसत ४८.१६ थियो। वार्नरले प्रतियोगिताभर कुल १ सय ९७ बल खेलेका थिए। फाइनलमा वार्नरले ३८ बलमा ४ चौका र ३ छक्का सहित ५३ रनमा आउट भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
