समाज

राजधानीमा सुरु भयो किरात राई तेस्रो अन्तर्राष्ट्रिय सम्मेलन [फोटोफिचर]

निमेषजंग राई शनिबार, कात्तिक २७, २०७८ २०:३६

काठमाडौं- किरात राई जातिको, इतिहास, भाषा, लिपि, धर्म तथा अधिकार संरक्षणमा पैरवी गर्ने उद्देश्यका साथ ‘किरात राई तेस्रो अन्तर्राष्ट्रिय सम्मेलन-२०७८’ काठमाडौंमा सुरु भएको छ। किरात राई अन्तर्राष्ट्रिय समन्वय समितिले आयोजना गरेको उक्त सम्मेलनको आज उपराष्ट्रपति नन्दबहादुर पुनले उद्घाटन गरे।

'किरात राई जातिको इतिहास, भाषा, धर्म र संस्कृति संरक्षण हाम्रो अभियान- विश्वका किरात राईहरूको एकताका लागि किरात राई तेस्रो अन्तर्राष्ट्रिय सम्मेलन’ नाराका साथ राष्ट्रिय सभागृहमा सुरु भएको सम्मेलन सोमबारसम्म चल्नेछ।

विश्वभर रहेका किरात राई समुदायको एकता, संस्कार, संस्कृतिमा एकरूपता ल्याउने उद्देश्यका साथ सम्मेलन आयोजना गरिएको आयोजकले जानकारी दिएको छ।

सम्मेलनमा राई जातिभित्रका २६ भाषाको अवस्था, किरात सिरिजङ्गा लिपिको प्रयोग, किरात धर्म र माङ्खिम, मुन्दुममा सुप्तुलुङको स्थान र प्रयोग, किरात प्रदेश अभियानलगायत विषय छलफल हुनेछ। सम्मेलनका दौरान किरात राईसँग सम्बन्धित विभिन्न विषयमा कार्यपत्र प्रस्तुत हुनेछ। दुई दिनसम्म चल्ने सम्मेलनले कार्यपत्रमाथि बृहत् छलफल गरी काठमाडौं घोषणापत्र जारी गर्नेछ। सम्मेलनमा भारत, अमेरिका, बेलायत, हङकङ, मकाउलगायत विभिन्न १८ देशबाट आएका प्रतिनिधिको सहभागिता रहेको किरात राई अन्तर्राष्ट्रिय समन्वय समितिका सचिवालय सदस्य जीवन हाताचो राईले जानकारी दिए।

सम्मेलनलाई सम्बोधन गर्दै उपराष्ट्रपति पुनले आफ्नो भाषा, संस्कृति, इतिहास र भूगोलसँग जोडिएको पहिचान स्थापित गर्न, राज्यका निकायमा पहुँच र प्रतिनिधित्व बढाउन र आफ्नो भाषा, संस्कृति, पहिचानको संरक्षण, सम्वर्द्धन र विकास गर्न एकताबद्ध भएर अगाडि बढ्न आग्रह गरे।

साझा उद्देश्य प्राप्तिका लागि एक भएर अगाडि बढ्न आग्रह गर्दै उहाँले एकताबाटै राजनीतिक, सामाजिक, आर्थिक अधिकार प्राप्त हुने उनले बताए। उपराष्ट्रपति पुनले सबै आदिवासी जनजातिलाई, सिङ्‍गो राष्ट्रलाई एकताबद्ध गर्ने र देशको राष्ट्रिय एकतालाई नै सुदृढ गर्ने गरी किरात राई समुदाय अघि बढ्ने विश्वास व्यक्त गरे। उनले पुर्खाले लामो मेहनतपछि स्थापित गरेका आफ्नो भाषा, संस्कार, संस्कृति, सभ्यता र इतिहासलाई संरक्षण गर्दै भावीपुस्तालाई हस्तान्तरण गर्न आग्रह गरे।

प्रदेश १ का मुख्यमन्त्री राजेन्द्र राईले किरात राईको सभ्यतालाई संरक्षणमा राज्यले विभेद गर्न नहुने बताए। किरातको पहिचान र अधिकारका लागि आफू निरन्तर लाग्ने बताउँदै उनले पहिचानका विषयमा अनावश्यक राजनीति हुँदा प्रदेशको नामकरणमा समस्या आएको बताए। पूर्वमन्त्री एवं जनता समाजवादी पार्टीका नेता अशोक राईले पहिचानका विषयमा रहेको भ्रमपूर्ण बुझाइलाई चिर्दै पहिचानको आन्दोललाई शान्तिपूर्ण र सहमतिमा अगाडि लैजानुपर्ने बताए।