काठमाडौं– बागमती प्रदेशको मुख्यमन्त्रीबाट राजीनामा दिएकी अष्टलक्ष्मी शाक्यले एकताको भावन जीवित राख्नका लागि आफूले पद त्याग गर्ने 'सहज बाटो' रोजेको बताएकी छन्। प्रदेश सभामा मत विभाजनमा जाँदा तिक्तता बढेर प्रदेश बनाउन नसकिने भएकाले आफूले राजीनामा रोजेको शाक्यको भनाइ छ।
पदबाट राजीनामा दिँदै उनले बागमती प्रदेशलाई समृद्ध बनाउने अवसर आफ्नो पुस्तालाई रहेको बताउँदै एकताको भावना जीवित राख्नुपर्ने बताइन्। उनले भनिन्, ‘ बैठकको दोस्रो कार्यसूचीमा मत विभाजन रहेछ। त्यसमा किन जानुपर्यो र? किन तिक्तता बढाउने? आखिरमा नमिलेर सुख छैन। त्यसैले बागमती प्रदेशमा संविधानको धारा १७९ को उपधारा १ क को व्यवस्थाअनुसार मुख्यमन्त्रीबाट मार्गप्रशस्त गरेको छु।’
बागमती प्रदेश राजधानीसँग जोडिएको र धेरै जिल्ला भएको प्रदेश भए पनि विकासका लागि अनुकुल वातावरण रहेको उनको बुझाइ छ। ‘साँच्चै लाग्ने हो भने क्षणभरमै हामी समृद्धितर्फ लैजान सक्छौं,’ उनले भनिन्, ‘यसलाई समृद्ध, सुशासन र विकसित बनाउने हाम्रो कर्तव्य हो।’
बागमतीलाई नमूना, सुशासन र समृद्धिको प्रदेश बनाउन सकिने बताउँदै यसका लागि पक्ष र विपक्षको परम्परागत अवधारणा त्याग्नुपर्ने शाक्यको भनाइ छ। ‘नमूना प्रदेश बनाउन संस्कारयुक्त सत्ता पक्ष र विपक्ष हुनुपर्छ,’ उनले भनिन्, ‘पक्ष र विपक्षमा परम्परागत भएर हुँदैन। सत्ता पक्षले पेल्नु हुँदैन, विपक्षले आलोचना गर्नैपर्ने सोच त्याग्नुपर्छ। यो त्याग्न सकिएन भने नयाँ नेपालको सोच आउँदैन।’
सकारात्मक कुरालाई स्वीकार्ने संस्कार विकास गर्नुपर्ने शाक्यको भनाइ छ। संस्कारयुक्त बागमती प्रदेश बनाउन लागिपर्नुपर्ने उनले बताइन्। ‘आलोचना र आत्माचोलना गरौं। एकले अर्कोलाई माया गरौं। साँच्चिकै प्रदेश बनाउन अलगथलग भएर सकिँदैन। अप्ठ्यारो वातावरण देखेर भनेकी हुँ,’ उनले थपिन्।
अहिलेको अवस्थासम्म ल्याइपर्याउने परिवर्तन महत्वपूर्ण विषय भएकाले यसलाई जोगाउन लागिपर्नुपर्ने उनको भनाइ छ। उनले भनिन्, ‘यतिबेला अलिअलि छलफल गरिहँदा डर पनि लाग्छ, कता–कता बाटो विचलित हुने हौं कि, बाटो विराउने हो कि जस्तो लाग्छ। यो ठाउँसम्म पुर्याउन धेरैको महत्वपूर्ण योगदान छ, यसलाई जोगाउने हाम्रो अहम् दायित्व हो। गणतन्त्र जोगाउने, संघीयता जोगाउने दायित्व छ। आर्थिक सामाजिक रुपमान्तरण गर्ने, नयाँ नेपाल, समृद्ध नेपाल, सुखी नेपालदी भनेर चिनाउन चाहेको हो,’ उनले भनिन्।
शाक्यले राजनीतिक स्थिरताका लागि सत्ता पक्ष र प्रतिपक्ष नमिलेर सुखै नपाउने बताइन्। उनले थपिन्, ‘मिलेर अघि बढौं, एक भएर अघि बढौं। परिस्थिति विथोलिन खोजेको होकि, लोकतन्त्र कमजोर हुन थालेको होकि भन्ने प्रश्न हाम्रो मनमा छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766928868.png)
-1766648928.png)
