काठमाडौं- नेकपा एमालेका नेता प्रभु साहले नेपाल कम्युनिष्ट पार्टी(नेकपा)पुनर्गठनको तयारी गरेका छन्। नेकपा माओवादी केन्द्र र नेकपा एमालेले एकता गर्दै नेकपा गठन गरेको भएपनि सर्वोच्च अदालतको फैसलाले पार्टी एकता ब्युतिएको थियो।
नेकपामा रहँदा केपी ओलीको पक्षमा लागेका नेता साह पार्टी एकता ब्युँतिएपनि माओवादी केन्द्रमा नगएर एमालेमै बसेका थिए। ओलीलाई साथ दिएवापत उनी सहरी विकास मन्त्री बनेका थिए।
ओलीसँगै बेसेपनि साहले आफूलाई एमाले भन्न भने रुचाउने गरेका छैनन्। साहले ओलीको नेतृत्वलाई मान्ने तर नेकपाको निरन्तरता हुनुपर्ने सर्तमा एमालेमै बसेको बताउँदै आएका छन्। एमाले अध्यक्ष ओलीले पुरानै शैलीको एमालेलाई सक्रिय बनाएको भन्दै साहले ८ बुँदे प्रस्ताव अघि सारेका थिए।
अध्यक्ष ओलीले नेकपाकै निरन्तरता एमाले भएको बताउने गरेपनि व्यवहारमा त्यसो हुन नसकेको भन्दै साह असन्तुष्ट छन्। जसका कारण साह नेकपा पुनर्गठनको गृहकार्यमा लागेका हुन्।
एमालेमै रहने गरि अध्यक्ष ओलीसँग केही चरणमा वार्ता भएपनि कुरा मिल्न नसकेको साह निकट एक नेताले बताए।
ओली अग्रगमनलाई स्वीकार्नुभन्दा पुरानै विचार र अजेन्डामा फर्किएकोले साह र उनीनिकट नेताहरु नेकपा पुनर्गठनको तयारीमा जुटेका हुन्। ती नेताका अनुसार नेकपाको केन्द्रीय कमिटीसमेत चयन भइसकेको र केही दिनमै राष्ट्रिय भेलामार्फत देशलाई अग्रगामी निकास दिनका लागि नेकपा पुनर्गठन भएको सन्देश दिने तयारी रहेको छ।
देशलाई अग्रगामी निकास दिन तथा विद्यमान राजनीतिक संकट निवारणका लागि नेकपा पुनर्गठनमार्फत नयाँ समाजवादी केन्द्र बनाउने प्रभु साहको तयारी रहेको छ। उनी पछिल्लो समय आइटी आर्मीमार्फत तराईका जिल्लामा राजनीतिक गतिविधीमा सक्रिय छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
