प्रतिकात्मक तस्वीर
काठमाडौं– मुगुको छायाँनाथ रारा नगरपालिका–७ र ८ को बीचमा पर्ने झ्यारी खोलामा भएको बस दुर्घटनामा मृत्यु हुनेको संख्या २६ पुगेको छ।
मुगुका प्रमुख जिल्ला अधिकारी रोम बहादुर महतले घटनास्थलमा २६ जनाको शव भेटिएको जानकारी दिए। दुर्घटनामा करिब १८ जना घाइते भएका प्रजिअ महतको भनाइ छ।
स्थानीयले भने बसमा ४० देखि ५० जनाको हाराहारीमा यात्रुहरु सवार रहेकाले मृत्यु हुनेको संख्या अझै बढ्न सक्ने बताएका छन्।
छायाँनाथ रारा नगरपालिकाकी उपमेयर सुन्तला रोकायाले बस दुर्घटनामा २६ जनाको मृत्यु भएको विवरण प्राप्त भएको जनाइन्। रोकायाका अनुसार मृत्यु हुनेमा अधिकांश नगरपालिकाकै विभिन्न वडाका छन्।
पढाइका लागि काठमाडौं, नेपालगञ्ज र देशका विभिन्न शहरमा गएकाहरु दशैंका लागि घर फर्किने क्रममा दुर्घटनामा परेका उपमेयर रोकायाले जानकारी दिइन्।
'प्लेनको भाडा बढेको र प्लेनहरु पनि नपाएका कारण अहिले यहाँ आउने बस खचाखच भरिएर आइरहेका छन्। मंगलबार दुर्घटनामा परेको बसमा ४० देखि ५० जना यात्रु रहेका बताइएको छ। ४२ जना दुर्घटनामा परेका छन्, जसमध्ये २६ जनाको मृत्यु भएको छ,' रोकायाले भनिन्।
प्रहरीका अनुसार नेपालगञ्जबाट मुगु आउँदै गरेको भे १ ख ३१ ६७ नम्बरको बस मंगलबार दुर्घटनामा परेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
