काठमाडौं– कास्कीको अन्नपूर्ण गाउँपालिका–१० कालाभिरमा सोमबार दिउँसो भएको जीप दुर्घटनामा परी मृत्यु हुनेको पहिचान खुलेको छ।
कास्कीको पोखराबाट अन्नपूर्ण गाउँपालिकाको घान्द्रुक जाँदै गरेको ग १ ज ६९०० नम्बरको बोलेरो जीप सोमबार कालाभिरमा दुर्घटना हुँदा ८ जनाको मृत्यु भएको हो।
दुर्घटनामा जीपका चालक कास्कीकै अन्नपूर्ण गाउँपालिका घर भएका ४२ वर्षीय खुसीमान क्षेत्रीको पनि ज्यान गएको छ।
मृत्यु हुने अन्यमा काठमाडौं महानगरपालिका–३ गोंगबुका २२ वर्षीय अच्यूतम काफ्ले, १८ वर्षीय आशिष आलेमगर, १८ वर्षीय जिल्लप घिसिङ, २४ वर्षीया सुजा चौधरी, २० वर्षीया लिजा चौधरी, २० वर्षीय सुमन चौधरी, गोरखा घर भइ गोंगबु बस्ने २७ वर्षीय विनय क्षेत्री छन्।
दुर्घटनामा परेकी २० वर्षीय देबिजा घिसिङको भने सकुशल उद्दार गरिएको छ। जीपमै रहेकी उनी भिरमा अड्किएको अवस्थामा फेला परेकी थिइन्।
घटनास्थलमा पुगेका अन्नपूर्ण गाउँपालिका–११ का वडाध्यक्ष हिम बहादुर गुरुङले अप्ठेरो मोडमा गाडी ब्याक भएर भिरमा खसेको बताए। घटनाको प्रारम्भिक अनुसन्धानबाट मोडमा ब्रेक फेल हुँदा गाडी आफैं ब्याक भएर दुर्घटना भएको देखिएको जिल्ला प्रहरी कार्यालय कास्कीले जानकारी दिएको छ।
दुर्घटनामा ज्यान गुमाउने आठै जना दशैंको बिदा मनाउन गएका युवाहरु थिए। दशैंको बिदाको अवसर पारेर पोखरा घुम्न गएका उनीहरु जीप बूक गरेर त्यहाँबाट घान्द्रुकका लागि हिँडेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764508750.jpg)
-1764146706.png)
-1763721444.png)
-1763559424.jpg)
-1764080971.png)
