काठमाडौं– संघीय मन्त्रिपरिषद्को विस्तारलाई अन्तिम रुप दिन बसेको सत्ता गठबन्धनको बिहीबारको बैठकले सो विषयमा सहमति जुटाउन नसके पनि प्रदेश १ र बागतमी प्रदेशका आगामी मुख्यमन्त्रीको विषय भने टुंगो लगाएको छ। अब ती दुवै प्रदेशको मुख्यमन्त्री नेकपा एकीकृत समाजवादीले पाउने भएको छ।
बैठकमा सहभागी एक शीर्ष नेताका अनुसार, संघीय मन्त्रिपरिषद्मा आफूलाई कम मन्त्रालय छुट्याइएकोमा असन्तुष्ट एकीकृत समाजवादीको 'चित्त बुझाउन' ती दुवै प्रदेशको मुख्यमन्त्री सोही पार्टीलाई दिन लागिएको हो। ती दुवै प्रदेशमा अहिले एमालेका नेताहरु भीम आचार्य र अष्टलक्ष्मी शाक्य मुख्यमन्त्री छन्। तर, दल विभाजनका कारण उनीहरुले केही दिनभित्रै विश्वासको मत लिनुपर्ने बाध्यता छ। उनीहरुले आवश्यक मत पुर्याउन सक्ने सम्भावना भने असम्भवप्रायः छ।
प्रदेश १ मा एकीकृत समाजवादीका संसदीय दलको नेतामा राजेन्द्र राई छन्, बागमती प्रदेशमा राजेन्द्र पाण्डे। राई भदौ २६ गतेको संसदीय दलको बैठकबाट नेता चयन भएका थिए। पाण्डे भने भदौ २७ गते बसेको संसदीय दलको बैठकबाट नेता चयन भएका हुन्।
एकीकृत समाजवादी पार्टीले मुख्यमन्त्री पाउने सहमति भएसँगै ती दुई प्रदेशमा दुई राजेन्द्रले अवसर पाउने निश्चित जस्तै भएको हो। सत्ता गठबन्धनबीच आजको सहमति नउल्टिए उनीहरु केही दिनभित्रै मुख्यमन्त्री बन्नेछन्।
प्रदेश १ र बागमती प्रदेशका मुख्यमन्त्री बदलिने भए पनि कांग्रेस र एकीकृत समाजवादीबीच भागबण्डा हुने आकलन गरिएको थियो। तर, संघीय सरकारमा कम मन्त्रालय पाएको एकीकृत समाजवादीले दुई प्रदेश सरकार पाउने सहमति बनेको हो। प्रदेशबाटै भए पनि, अबको केही दिनमै नवगठित एकीकृत समाजवादीले सत्ताको नेतृत्व-यात्रा सुरु गर्नेछ।
राई भोजपुरका हुन्। २०७४ सालमा सम्पन्न प्रदेश सभा निर्वाचनमा उनले भोजपुर १ (क) बाट संघीय समाजवादी फोरमका अजम्बर राई कामबाङलाई पराजित गरेका थिए। राईले १९ हजार २९७ मत पाएका थिए भने कामबाङले ११ हजार ५४१ मत पाएका थिए।
राई विद्यार्थी राजनीतिबाट उदाएका नेता हुन्। उनी २०५७ पछि दुई कार्यकाल अनेरास्ववियुको अध्यक्ष बनेका थिए। २०७४ सालमै प्रदेशको मुख्यमन्त्रीको दौडमा रहेका शेरधन राई र भीम आचार्यबीच टक्कर हुँदा राजेन्द्र राईलाई पनि मुख्यमन्त्रीको रुपमा चर्चामा आएका थिए। ती दुवै जना मुख्यमन्त्री भइसकेका छन्। त्यतिबेला विकल्पको रुपमा हेरिएका उनी अब भने मुख्यमन्त्रीको कुर्सी छेउमा पुगेका छन्।
त्यस्तै, पाण्डे धादिङका हुन्। गत निर्वाचनमा उनले धादिङ १ (क) बाट कांग्रेसका मदुकुमार श्रेष्ठलाई पराजित गरेका थिए। पाण्डेले २७ हजार ३३२ मत पाउँदा श्रेष्ठले १३ हजार ६४७ मत पाएका थिए।
पाण्डे तत्कालीन गिरिजाप्रसाद कोइराला नेतृत्वको अन्तरिम सरकारमा स्थानीय विकास मन्त्री भएका थिए। एमाले विभाजनको बेलामा माधव नेपाललाई बलियो साथ दिने सीमित नेतामध्ये पाण्डे पनि एक हुन्।
पाण्डे पनि २०७४ सालमै मुख्यमन्त्रीको दौडमा थिए। त्यतिबेला उनले माधव नेपाल गुट परित्याग गरी केपी ओली गुटमा लागेर भए पनि मुख्यमन्त्री बन्ने प्रयास गरेका थिए। तर, त्यतिबेला बागमती प्रदेशको मुख्यमन्त्री बन्नुअघि भएको एमाले संसदीय दलको चुनावमै राष्ट्रपति विद्यादेवी भण्डारी समेत सक्रिय भएको आरोप लाग्दै आएको छ। त्यसपछि राष्ट्रपति तथा ओलीको जोडमा अष्टलक्ष्मी शाक्यलाई हराउँदै डोरमणि पौडेल संसदीय दलको नेता र मुख्यमन्त्री बनेका थिए।
त्यतिबेलाको आकांक्षा पूरा नभए पनि परिस्थितले पाण्डेलाई मुख्यमन्त्रीको कुर्सी छेउमा पुर्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
