काठमाडौं- प्रदेश २ का मुख्यमन्त्री लालबाबु राउतले विश्वासको मत पाएका छन्। बुधबार प्रदेश २ को प्रदेश सभामा भएको मतदानमा उनले आवश्यक मत पाएका हुन्। राउतको पक्षमा ७७ मत परेको थियो। त्यस्तै, उनको विपक्षमा २३ मत परेको थियो। मतदानमा १०० जना उपस्थित भएका थिए।
राउतलाई उनको दल जनता समाजवादी पार्टी, कांग्रेस, एकीकृत समाजवादी र माओवादी केन्द्रले सघाएका हुन्। एकीकृत समाजवादीबाहेक अन्य दलहरु सत्ता साझेदारी गरिरहेका छन्। ती दलबीच केन्द्रमा समेत सत्ता गठबन्धन छ।
प्रदेश २ का १०७ सांसदमध्ये अहिले १०४ जना मात्रै छन्। सबैभन्दा ठूलो दल जसपासँग ३९, कांग्रेससँग १९, लोसपासँग १६, एकीकृत समाजवादीसँग १३, माओवादी केन्द्रसँग ८, एमालेसँग ८ र नेपाल संघीय समाजवादी पार्टीसँग १ जना सांसद छन्। यसमध्ये लोसपाका १५ र एमालेका ८ जनाले विपक्षमा मत दिएका हुन्।
असोज १३ गते प्रदेश २ को मन्त्रिपरिषद्ले विश्वासको मत लिन असोज २० गतेका लागि अधिवेशन आह्वानको लागि सिफारिस गरेको थियो।
विश्वासको मत लिने प्रस्तावमाथिको छलफलमा केही दिनअघि मुख्यमन्त्री कार्यालयमा अख्तियार दुरुपयोग अनुसन्धान आयोगको टोलीले छापा मारेको विषयले प्राथमिकता पाएको थियो। मुख्यमन्त्री राउतले सो कदमलाई संघीयतालाई बदनाम गराउने प्रयासको रुपमा चर्चा गरेका थिए। ‘नीति तथा कार्यक्रममा आएको होइन र बेटी बचाऊ बेटी पढाऊ भन्ने कार्यक्रम। तपाईं माननीयहरुलाई पनि जानकारी छ नि,’ उनले भने, ‘अहिले प्रदेश सरकारलाई बदनाम गराउन अनेक प्रयत्न गरिएको छ।’
राउतले आफूलाई विश्वासको मत दिन आफ्नो आलोचना गरिरहेका दलहरु एमाले तथा लोसपासँग पनि आग्रह गरेका थिए।
विपक्षी सांसदले भने अख्तियारका कारण होइन, मुख्यमन्त्रीका कारण संघीयता बदनाम भएको बताएका थिए। ‘संघीयता लौकाको कोपिला होइन,’ लोकतान्त्रिक समाजवादी पार्टीका संसदीय दलका नेता जितेन्द्र सोनलले भने, ‘मुख्यमन्त्री कार्यालयमा साइकल खरिदमा भएको अनियमितताको उजुरीका अधारमा अख्तियारको छापामारीले संघीयता गुम्दैन।’
लालबाबु राउत २०७४ फागुन ३ गते मुख्यमन्त्रीमा नियुक्त भएका थिए। त्यतिबेला संघीय समाजवादी फोरमका सांसद रहेका उनले राष्ट्रिय जनता पार्टीसँग मिलेर सरकारको नेतृत्व गरेका थिए। उनले फागुन १० गते विश्वासको मत लिएका थिए। त्यतिबेला उनले ८२ मत पाएका थिए। १०७ सांसदमध्ये १०० जना मात्रै उपस्थिति भएको मतदानमा उनको विपक्षमा १८ मत परेको थियो। त्यतिबेला वाम गठबन्धनमा रहेका एमाले र माओवादी केन्द्रका सांसदले पनि राउतलाई मत दिएका थिए। नेपाली कांग्रेसले उनको विपक्षमा मत दिएको थियो
कालान्तरमा नयाँ शक्ति पार्टी र राष्ट्रिय जनता पार्टीसँगको एकतापछि जनता समाजवादी पार्टी गठन भयो। सो पार्टी पनि भदौमा विभाजन भएको छ। मुख्यमन्त्रीले प्रतिनिधित्व गर्ने दल विभाजित भएमा मुख्यमन्त्रीले तीस दिनभित्र विश्वासको मत लिनुपर्ने संवैधानिक प्रावधान भएका कारण मुख्यमन्त्री राउतले बुधबार विश्वासको मत लिएका हुन्।
साढे तीन वर्षको अवधिमा प्रदेश २ को सरकारमा व्यापक फेरबदल आएको छ। जसपाको केन्द्रमा विवाद उत्पन्न भएपछि मुख्यमन्त्री राउतले जेठ २३ मा महन्थ ठाकुर र राजेन्द्र महतो पक्षका मन्त्रीहरुलाई बर्खास्त गरिदिएका थिए। जेठ २६ मै उनले कांग्रेसका तर्फबाट तीन मन्त्री नियुक्त गरेका थिए। सरकारमा सहभागी हुनुअघि कांग्रेससँग दुई बुँदे सहमति गरिएको थियो। साथै, मन्त्रालय टुक्र्याएर १० पुर्याइएको थियो। साउन २ मा माओवादी केन्द्रका दुई मन्त्री पनि नियुक्त भएका थिए।
मुख्यमन्त्रीले विश्वासको मत लिएसँगै नेकपा एकीकृत समाजवादीलाई पनि सरकारमा सहभागी गराउने तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781240272.png)
-1764146706.png)
