काठमाडौं- नेपाली कांग्रेसका वरिष्ठ नेता रामचन्द्र पौडेल पक्षको बैठक बस्ने भएको छ।
आफ्नो पक्षबाट मन्त्री छान्नका लागि बुधबार दिउँसो २ बजे वरिष्ठ नेता पौडेलको निवास बोहोराटारमा बैठक बस्न लागेको हो।
सत्तारुढ गठबन्धनमा सहभागी चार दलबीच मन्त्रिपरिषद् विस्तारका लागि मन्त्रालय बाँडफाँटमा करिबकरिब सहमति जुटेसँगै दलहरु मन्त्री चयनका लागि छलफलमा जुटेका हुन्।
दलीय भागबण्डा अनुसार कांग्रेसले प्रधानमन्त्री र ६ मन्त्रालय पाउने भएको छ। यसअघि नै कांग्रेसबाट प्रधानमन्त्री देउवासहित गृहमन्त्री बालकृष्ण खाँण, परराष्ट्रमन्त्री डा नारायण खड्का र कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले जिम्मेवारी पाइसकेका छन्। अब कांग्रेसले थप तीन मन्त्रालय पाउने भएको छ।
कांग्रेसको भागमा स्वास्थ्य तथा जनसंख्या, सञ्चार तथा सूचना प्रविधि, महिला, बालबालिका, ज्येष्ठ नागरिक तथा समाज कल्याण मन्त्रालय परेको छ।
पौडेल पक्षले आफूहरुको भागमा परेको दुई मन्त्रालयका लागि मन्त्री छान्नु पर्नेछ।
पौडेल पक्षबाट मिनेन्द्र रिजाल, सुजाता कोइराला, दिलेन्द्र बडु, तेजुलाल चौधरीको सम्भावना रहेको छ।
रिजाललाई मन्त्री बनाउन भने देउवा, पौडेल र शशांक सकारात्मक छन्। यसअघि सञ्चार मन्त्रीसमेत भइसकेका रिजालले सोही मन्त्रालयलमा दाबी गरिरहेका छन्। यदी उनले सञ्चार मन्त्रालय नपाए स्वास्थ्य मन्त्रालयको जिम्मेवारी चाहेको स्रोतको भनाइ छ।
गठबन्धनका दलहरुबीच हाल दुईवटा मन्त्रालय प्रधानमन्त्रीसँगै राख्ने सहमति भएको छ। ती दुई मन्त्रालयमा एउटा उद्योग, वाणिज्य तथा आपूर्ति मन्त्रालय रहने सहमति भएको छ। प्रधानमन्त्री देउवाले घटस्थापनाका दिन बिहीबार मन्त्रिपरिषद् विस्तार गर्ने तयारी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
