काठमाडौं– मन्त्रिपरिषद् विस्तारमा भइरहेको ढिलाइ र त्यसमा प्रधानन्यायाधीश चोलेन्द्र शमशेर राणा समेत जोडिएपछि अहिले न्याय क्षेत्र तरंगित बनेको छ। वहालवाला प्रधानन्यायाधीशले नै मन्त्रिपरिषद् विस्तारमा कोटा मागेको समाचार सार्वजनिक भएपछि सोमबार बिहानै सर्वोच्च अदालत बार एशोसिएसनका पदाधिकारीहरु प्रधानन्यायाधीश राणालाई भेट्न सर्वोच्च पुगे।
कार्यालय समय सुरु हुने बेला आकस्मिक समय मागेर सर्वोच्च बारका अध्यक्ष पूर्णमान शाक्य, सचिव ऋषिराम घिमिरे, सदस्यहरु विकास भट्टराई, अनन्तराज लुइँटेल लगायतले प्रधानन्यायाधीश राणासँग भेट गरे।
भेटवार्ताको सुरुमै बारका प्रतिनिधिले मन्त्रिपरिषद् विस्तारमा कोटा मागेको विषयमा जिज्ञासा राखे। प्रधानन्यायाधीश राणाले 'यस्ता समाचारहरु आइरहन्छन्, यस्ता विषयमा म धेरै वास्ता गर्दिनँ' भनेर पन्छिन खोजे।
बारका प्रतिनिधिले व्यक्तिको नाम नै तोकेर समाचार आइरहेको र त्यो संयोग वा आलोचना गर्ने विषय मात्रै नहोला नि? भनेर पुन: प्रश्न गरे। त्यसपछि राणा त्यो विषयमा थप कुरा गर्न तयार भए।
बारका प्रतिनिधिसँगको कुराकानीमा राणाले आफू मन्त्री बनाउने जिम्मेवारीमा नरहेको, र अदालत कसैलाई मन्त्री बनाउने निकाय नभएको बताए। 'म कसैलाई मन्त्री बनाउने जिम्मेवारीमा छैन। न यो मन्त्रीपरिषद् बनाउने थलो हो,' राणाको भनाइ थियो, ‘कसलाई मन्त्री बनाउने भन्ने कुरा प्रधानमन्त्रीको अधिकार हो। संविधानले को मन्त्री हुन्छ, को हुँदैन भनेर योग्यता नै तोकेको छ। म कसरी सिफारिस वा कोटा भन्न सक्छु र ?’
प्रधानन्यायाधीश राणाले मन्त्रीका लागि प्रधानन्यायाधीशले कोटा मागेको भन्ने चर्चा गराएर न्यायपालिकामाथि प्रहार गर्ने काम भइरहेको टिप्पणी पनि गरे। यसरी आउने समाचारले स्वतन्त्र न्यायपालिकालाई विवादित गराउने उल्लेख गर्दै राणाले ती समाचारहरुको खण्डन गर्न सचिवालय र सर्वोच्च प्रशासनलाई निर्देशन दिएको सुनाए।
राणाले समाचारमा उल्लेख गरिएका नामको विषयमा पनि कोट्याए। ‘सञ्चारमाध्यममा आएका समाचार मैले पनि पढेँ। १ जना दीपक तिमल्सिना र अर्को गजेन्द्र हमाललाई मन्त्री बनाउन कोटा खोजिएको भनेको रहेछ,' राणाको भनाइ थियो, 'हमाल त कांग्रेसकै कार्यकता हुन्। मैले किन मन्त्री बनाउन कोटा माग्न पर्यो र?’ राणाले हमालको बारेमा आफूलाई जोड्न नहुने भन्दै बचाउ गरे।
'गजेन्द्र हमाल भनेको त शेरबहादुर सरहका कांग्रेस नेता हुन् नि। उनीसँग मलाई जोड्न पर्छ र ? उनलाई मैले बनाउनुपर्छ र !, मैले बनाएर बन्ने हुन्छ र ?’
तर, कोटा मागेको समाचारको विषयमा प्रधानन्यायाधीश राणा रक्षात्मक देखिएको भेटवार्तामा सहभागी एक प्रतिनिधिले सुनाए। 'प्रन्याज्यू रक्षात्मक देखिनुभयो। उहाँले व्यक्तिको नाम लिएर त्यो मान्छे त फलानो पार्टीको कार्यकर्ता हो भन्नु आवश्यक नै थिएन। उहाँले भन्नुभयो,' ती प्रतिनिधिले भने।
को हुन् हमाल ?
गजेन्द्र हमाल पुराना कांग्रेस नेता हुन्। तर, अहिले उनी कांग्रेसमा सक्रिय छैनन्। बरु हिन्दु राष्ट्र र राज संस्थाको आन्दोलनमा सक्रिय रहेका छन्। हमालसँग राणाको नजिकको नाता सम्वन्ध रहेको छ। राणाका भाइ प्रभु शमशेरसँग उनी व्यवसायिक साझेदार भएको पनि बताइन्छ।
कांग्रेस बाँकेका पूर्व सभापति रहेका हमाल तत्कालीन पार्टी सभापति सुशील कोइरालालाई निर्वाचनमा हराउन लागि परेका थिए। तर, कोइरालालाई हराउन असफल भएपछि उनी कांग्रेसबाट टाढिँदै गए। उनका एक भाइ सुरेन्द्र हमाल अहिले कांग्रेसको प्रदेश सांसद रहेका छन्।
प्रधानन्यायाधीशले मन्त्री बनाइनुपर्ने भनेर 'कोटा' माग गरेको भनेर चर्चामा आएका अर्का व्यक्ति दीपक तिमल्सिना सर्वोच्च अदालतकै पूर्व 'कर्मचारी' हुन्। सर्वोच्चको आइटी (सूचना प्रविधि) डिपार्टमा काम गरेका भनिएका उनी त्यहाँको एउटा 'अनियमितता'मा पनि मुछिएका थिए। पछिल्लो समय उनी न्याय क्षेत्रका एक 'प्रभावशाली विचौलिया'का रुपमा चिनिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773992198-1773992913.jpeg)
-1764146706.png)
-1773837959.png)
