काठमाडौं– नेकपा (एमाले)को जारी विधान महाधिवेशनमा गण्डकी प्रदेश समूहले जनप्रतिनिधिको भूमिका प्रभावकारी बनाउन पनि पार्टीले ध्यान दिनुपर्ने बताएको छ।
समूहगत छलफलको रिपोर्टिङ प्रस्तुत गर्दै जगत विश्वकर्माले दक्षिण एसियाको राजनीति र एमसीसीबारे पार्टीको प्रस्ट धारणा व्यख्या गरिनुपर्नेसमेत बताएका छन्।
तत्कालीन समय भएका पार्टी एकीकरणलगायत घटनाक्रमलाई अझ विस्तार गर्नुपर्ने गण्डकी प्रदेशको सुझाव छ। पार्टी नेतृत्वको सरकारले गरेका काम र उपलब्धिका विषयमा पनि अझ विस्तार रूपमा राखिनुपर्ने सुझावसमेत उनीहरुको छ।
वर्गीय र क्षेत्रीय अन्तर विरोध हल गर्नका लागि ठोस कार्यक्रम आउनुपर्ने सुझाव प्रस्तुत गर्दै उनीहरुले निर्वाचन प्रणालीलाई सुधार गर्नुपर्नेमा समेत जोड दिएका छन्।
निर्वाचन लड्नै नसक्ने स्थिति देखिएको भन्दै संयुक्त मोर्चा बनाएर अगाडि जानुपर्ने विषय प्रतिवेदनमा उल्लेख हुनुपर्ने सुझावसमेत गण्डकी प्रदेशको रहेको छ।
आजको नेकपा एमाले तत्कालीन नेकपाको निरन्तरता हो वा सुदृढ एवं परिस्कृत एमाले हो भन्ने विषयलाई प्रतिवेदनमा प्रस्ट राखिनुपर्ने उनीहरुको सुझाव छ।
सामूहिक नेतृत्व र कमिटी प्रणालीलाई स्थपित गर्नेतर्फ ध्यान दिनुपर्ने माग समेत गण्डकीको सुझावमा उठाइको छ। पार्टीलाई वैचारिक र भावनात्मक हिसाबले एक बनाउनुपर्ने समेत सुझावमा उल्लेख छ।
पुँजीवादी चिन्तनले पार्टी जीवनमा असर पारेको भन्दै कार्यकर्ताको उचित मूल्याकंन नहुने अवस्थामको अन्त्य हुनुपर्ने समेत गण्डकीको सुझावमा उल्लेख छ।
जित्नेले हारेकालाई नसमेट्ने अनि हार्नेले जित्नेलाई स्वीकार नगर्ने परिपाटीले समस्या ल्याएको भन्दै राजकीय र सांगठनिक भूमिकामा रहेका नेताबीच खाडल देखिनु नहुने सुझावमा छ। पार्टीले जातीय विभेदलगायत विषयमा ध्यान दिनुपर्ने सुझावसमेत दिइएको छ।
वरिष्ठ उपाध्यक्ष १ उपाध्यक्ष ७ उप महासचिव ३ सचिव ७ आवश्यक रहेको सुझावमा उल्लेख छ। महिलाको प्रतिनिधित्व पदाधिकारीमा पनि ३३ प्रतिशत हुनुपर्ने तथा पोलिटब्युरो राखिनुपर्ने सुझाव गण्डकीले दिएको छ।
केन्द्रमा सचिवालय आवश्यक नभएको भन्दै गण्डकीले हरेक कमिटीमा एक तिहाइ युवाको उपस्थित हुनुपर्ने सुझावसमेत दिएको छ। पूर्वपदाधिकारीका हकमा एउटा नयाँ नियम बनाउनुपर्ने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
