ललितपुर- नेकपा (माओवादी केन्द्र)की स्थायी समिति सदस्य पम्फा भुसालले राजनीतिको बागडोर माओवादी केन्द्र र त्यसको नेतृत्वमा निहीत रहेको बताएकी छन्।
ऊर्जा, जलस्रोत तथा सिँचाइमन्त्रीसमेत रहेकी भुसालले माओवादीहरू आफ्नो संगठन, विचार र कार्यदिशामा स्पष्ट रहेको उल्लेख गर्दै देशको सिङ्गो राजनीति चलाउने क्षमता आफ्नो पार्टीमा रहेको दाबी गरिन्। माओवादी नेतृत्वमा एकताको पहल गर्ने, प्रतिक्रान्तिका विरुद्ध गोलबद्ध गर्ने, अग्रगामी शक्तिलाई मिलाउने क्षमता रहेको उल्लेख गर्दै उनले भनिन्, 'देशको राजनीतिक बागडोर माओवादी र माओवादी नेतृत्वले लिएको छ।'
ललितपुर महानगरपालिका-२२ को वडा सम्मेलनको आज उद्घाटन गर्दै उनले द्वन्द्वका समयमा जनतासँग नङ र मासुको सम्बन्ध बनाएजस्तै गरी संगठन विस्तार गर्ने बताइन्। 'आमपार्टी कार्यकर्ता र जनताको बलबाट सुदृढ संगठन बनाएर पार्टीलाई अझै सबल बनाउनुपर्छ,' भुसालले भनिन्, 'टोल, वडा, पालिकास्तरमा संगठन विस्तार गरेर जानुपर्छ। माओवादीलाई एकताबद्ध गरेर सुदृढ संगठन बनाउँछौँ।'
उनले जनताको लोकतन्त्र, संविधानको रक्षा र राष्ट्रियताका विषयमा आधारभूत सहमति भएपछि गठबन्धनको सरकार बनेको स्पष्ट पार्दै पार्टी गठबन्धन टुटाउने षड्यन्त्र भइरहेको बताइन्। तत्कालीन प्रधानमन्त्री केपी शर्मा ओली दलाल पुँजीपति वर्गलाई पोस्ने र विदेशी मालिकलाई खुसी पार्ने अभियानमा लागेकाले पछिल्लो अवस्था सिर्जना भएको उनको भनाइ छ।
स्थायी समिति सदस्य भुसालले १० वर्षे संघर्षको जगमा उठेको जनआन्दोलन र मधेश अन्दोलनमा योगबाट प्राप्त गरेको संघीय लोकतान्त्रिक गणतन्त्र, समावेशिता र धर्मनिरपेक्षता समावेश भएको संविधानलाई समाप्त पार्न षड्यन्त्र गर्नेविरुद्ध एकताबद्ध हुन आग्रह गर्दै श्रमजीवी जनताको पक्षमा लाग्ने पार्टीको पक्षमा जनताको विश्वास रहेको दाबी गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770103362.jpg)
-1764146706.png)
