काठमाडौं- नेपाली राष्ट्रिय फुटबल टिमका कप्तान किरण चेम्जोङले साफ च्याम्पियनसिपको फाइनल पुग्ने लक्ष्य रहेको र त्यसका लागि सबै खेल जित्नुपर्ने बताएका छन्।
शुक्रबारदेखि माल्दिभ्समा सुरु हुने १३औं साफ च्याम्पियनसिपअघि बिहीबार भएको प्रिम्याच कन्फ्रेन्समा किरणले कुनै पनि टिमसँग नडराउने र राम्रो नतिजाका लागि मैदानमा लड्ने बताए।
‘प्रशिक्षकले भने अनुसार हामी मात्र साफको उपाधि जित्न बाँकी छ। यसपटक हामी हरेक खेलमा कडा प्रतिस्पर्धा गर्दैर्छौं, उनले भने, ‘फाइनल पुग्न हरेक खेल जित्नुपर्छ। हरेक खेल कठिन हुन्छ। मलाई आशा छ केही राम्रो गर्नेर्छौं।’
प्रतियोगिताको पहिलो दिन नेपालले शुक्रबार आयोजक माल्दिभ्सविरुद्ध पहिलो खेल खेल्नेछ। खेल नेपाली समय अनुसार राति ९ः४५ बजे शुरु हुनेछ।किरणले माल्दिभ्सलाई होम एडभान्टेज हुने तर आफूहरुलाई त्यसले असर नगर्ने बताए।
‘पक्कै पनि उनीहरुलाई घरेलु मैदानको फाइदा हुनेछ। तर, होम र अवेले फरक पार्दैन। हामी गोर्खाली हौं। हामीले विश्वमा इतिहास बनाएका छौं। अन्तिमसम्म पनि फाइट गर्छौं,’ उनले भने।
यसपटक नेपाली टिममा युवा र अनुभवी खेलाडीको मिश्रण रहेकोसमेत उनले बताए। ‘युवा खेलाडीहरु राम्रा छन्। टिममा युवा र सिनियर खेलाडीको राम्रो कम्बिनेसन छ,’ हामी मैदानमा नतिजाका लागि अन्तिमसम्म लड्ने छौं,’ उनले भने।
नेपाल साफको २८ वर्षको इतिहासमा एक पटक पनि फाइनलमा पुग्न सकेको छैन। पछिल्ला चारमध्ये तीन संस्करणको सेमिफाइनल खेलेको नेपाल तीनै पटक त्यहाँभन्दा माथि पुग्न सकेन।
सन् १९९३ को पहिलो संस्करणमा चार टिमले प्रतिस्पर्धा गर्दा नेपाल तेस्रो भयो। त्यसपछि १९९५ र १९९९ मा सेमिफाइनलमै नेपालको यात्रा सकियो। त्यसपछि पनि नेपालको सहभागिता उल्लेखयोग्य छैन।
सकेसम्म उपाधि नै जित्ने, त्यसो नभए कम्तीमा फाइनल भए पनि पुग्ने लक्ष्य रहेको प्रशिक्षक अब्दुल्लाह अल्मुताइरीले सुनाउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
