काठमाडौं– नेकपा माओवादी केन्द्रले भातृ संगठन अखिल क्रान्तिकारीको राष्ट्रिय सम्मेलनबाट सर्वसम्मत नेतृत्व चयन गर्न विद्यार्थी नेतालाई दबाब दिएको छ। तर, विद्यार्थी नेता भने चुनावको पक्षमा देखिएका छन्।
आगामी बिहीबारदेखि सुरु हुने राष्ट्रिय सम्मेलनबाट नयाँ नेतृत्व आउने भएपछि पार्टीले चुनावमा नजान दबाब दिएको हो। तर, विद्यार्थी नेताहरुले नेतृत्वका आकांक्षी धेरै भएकाले चुनावबाटै चयन गर्ने वातावरण मिलाउन आग्रह गरेका छन्।
विद्यार्थी संगठन चुनावमा जाँदा पार्टीमा गुटबन्दी हुने र त्यसले संगठनलाई असर पार्ने भएकाले सर्वसम्वत नेतृत्व टुंगो लगाउन अध्यक्ष पुष्पकमल दाहाल ‘प्रचण्ड’ले दबाब दिएका छन्। प्रचण्डले विद्यार्थी नेताहरुसँगको छलफलमा माओवादी केन्द्रलाई बलियो र व्यवस्थित बनाउनुपर्ने भएकाले सर्वसम्मत नेतृत्व टुंगो लगाएर बाँकीलाई पार्टीमा व्यवस्थापन गर्न सकिने बताएका छन्।
अखिल क्रान्तिकारीका अध्यक्ष रञ्जित तामाङ अब संगठनबाट बाहिरिँदैछन्। प्रचण्डले गत मंगलबार अध्यक्षका ६ जना आकांक्षी सबैलाई बोलाएर सर्वसम्मत नेतृत्व टुंगो लगाउन आग्रह गरेका थिए। प्रचण्डले तामाङसहित अध्यक्षका प्रत्यासी तिलक भण्डारी, सुरेन्द्र बस्नेत, पञ्चा सिंह, दीपक देवकोटा, उत्तम अधिकारी र विजय गौतमलाई बोलाएर छलफल गरेको खुमलटार स्रोतले जनाएको छ।
‘अहिले पार्टी अप्ठ्यारोमा छ। पार्टीलाई बलियो र व्यवस्थित बनाउनु पर्ने छ। विद्यार्थी संगठनमा चुनाव गर्दा गुटबन्दीले पार्टी संगठन झन् तहसनहस हुन्छ। चुनाव गर्दा एमालेमा ओली–नेपाल खेमा भएर के भयो देखिरहनु भएकै छ’ प्रचण्डको भनाई उदृढ गर्दै खुमलटार स्रोतले भन्यो, ‘अहिले पार्टी र संगठन बनाउनु पर्ने स्थिति छ, त्यसैले विद्यार्थीमा चुनाव नगरौँ, सबैको सहमतिमा नेतृत्व टुंगो लगाउँ।’ पुरानै ढर्राको चुनावी प्रतिस्पर्धाबाट सही नेतृत्व आउन नसक्ने भएकाले पार्टीले आफ्नै खालको विधि पद्दति बनाएर नेतृत्वमा आउने वातावरण मिलाइदिने प्रचण्डले आश्वास दिएका थिए।
प्रचण्डसँगको भेटमा विद्यार्थी नेताहरुले नेतृत्वका आकांक्षी धेरै भएका र राम्रो व्यक्ति छानिएर आउने भएकाले चुनावमा जान दिन आग्रह गरेका थिए। प्रतिस्पर्धाबाट राम्रो र लोकप्रिय व्यक्ति आउने हुँदा त्यसको ओजसमेत बेग्लै हुने विद्यार्थी नेताहरुको जोड थियो।
अखिल क्रान्तिकारीको अध्यक्षका लागि इच्छा देखाएका ६ जना नै विद्यार्थी नेतालाई कोही न कोही पार्टी नेताको समर्थन छ। तिलक भण्डारीलाई कृष्णबहादुर महरा र वर्षमान पुनको समर्थन छ। सुरेन्द्र बस्नेत शक्ति बस्नेतसँग नजिक छन्। पञ्चा सिंह र दीपक देवकोटालाई जनार्दन शर्माको समर्थन छ। उत्तम अधिकारीलाई देव गुरुङ र पम्फा भुसालको समर्थन छ। त्यसै गरी विजय गौतमलाई नारायणकाजी श्रेष्ठको समर्थन छ।
महासचिवमा वर्तमान उपाध्यक्ष दीपेश पुन, रविकिरण यादव र इन्द्र भुसाल दाबेदार मानिएका छन्। हालका उपमहासचिव जीपी मैनाली, मिलन एमसी, तुकमान महरा पनि महासचिवका आकांक्षी हुन्। सचिव नरेश रेग्मीले पनि महासचिवमा इच्छा देखाएका छन्।
अहिले अखिल क्रान्तिकारीमा अध्यक्ष र महासचिवको लागि बढी प्रतिस्पर्धा देखिएकाले चुनावमा जान दिनु पर्ने अखिल क्रान्तिकारीका उपाध्यक्ष तिलक भण्डारीले बताए। ‘गत राष्ट्रिय सम्मेलनमा चुनावमा गएका थियौँ। त्यसैअनुसार सबै कमिटीले चुनावको तयारी गरेका थिए। त्यसले हामीलाई संगठनमा तलतिर फर्कायो,’ भण्डारीले भने, ‘चुनावबाट नेतृत्व चयन गर्नेले पार्टी बिग्रने होइन राम्रो पनि गर्छ। नेतृत्वलाई कार्यकर्ता र जनतातिर फर्काउँछ।’
तर, कतिपय अवस्थामा चुनावले गुट निर्माण गरेर पार्टीलाई ठूलो असर गर्ने भएकाले कस्तो विधिबाट नेतृत्व चयन गर्नुपर्छ भन्ने पार्टीले नै तय गर्नुपर्ने उनले बताए। सर्वसम्मतिको नाममा ‘दास र मालिक’को अवस्था हुने उनको भनाइ छ।
राष्ट्रिय सम्मेलनको तयारी पूरा
अखिल क्रान्तिकारीको २२औँ सम्मेलन काठमाडौंको प्रज्ञा भवनमा आज सुरु हुँदैछ। सम्मेलनको सम्पूर्ण तयारी पुरा भएको उपाध्यक्ष भण्डारीले बताए।
सम्मेलन उद्घाटन गर्न माओवादी केन्द्रका अध्यक्ष प्रचण्ड दिउँसो १ बजे प्रज्ञा भवन पुग्ने भएका छन्। उद्घाटन समारोहमा प्रचण्डसहित स्थायी समिति, केन्द्रीय समिति र विद्यार्थी संगठनका पूर्वनेताहरु पनि सहभागी हुने भएका छन्। बिहीबार उद्घाटन भएपछि शुक्रबार र शनिबार बन्दसत्रबाट नयाँ नेतृत्वसहित पदाधिकारीको टुंगो लाग्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
