काठमाडौं- ३८ सय किलो सुन तस्करी प्रकरणमा मोरङ जिल्ला अदालतमा आइतबार दुई सरकारी वकिलले बहस सुरु गरेका छन्। सहन्यायाधिवक्ता ज्ञानप्रसाद भुसाल र सहायक जिल्ला न्यायाधिवक्ता मनिष पोखरेलले आफ्नो कुरा राखेका छन्।
मोरङ जिल्ला अदालतका मुख्य न्यायाधीश भरत लम्सालको इजलासमा सरकारी पक्षले सुन तस्करीमा सबै अभियुक्तहरुको मिलेमतोमा भएकाले संगठित रुपमा भएको दाबी गरेका छन्। उनीहरुले सनम शाक्यको हत्या पनि सुनकै कारण भएको दाबी गर्दै संगठित अपराध, सुन तस्करी, अपहरण तथा शरीर बन्धक र कर्तव्य ज्यान मुद्दामा सजाय गर्नुपर्ने जिकिर गरेका छन्।
समूहमा मिलेर र राज्य संयन्त्रलाई धरासयी बनाउने गरि सुन तस्करी भएको भन्दै उनीहरुले सबै अभियुक्तलाई अभियोगमा दाबी गरेको सजाय हुनुपर्ने जिकिर उनीहरुले गरेका छन्। सुन तस्करी प्रकरणमा एकपछि अर्को व्यक्ति र अन्तर्राष्ट्रिय रुपमा समेत सञ्चालन भएको अनुसन्धान देखिएकाले सबै अभियुक्तलाई उन्मुक्ति दिन नसकिने उनीहरुको तर्क थियो।
उनीहरुले नेपाल र विदेशमा बसेर सुन तस्करी गरेको तर, नेपालमा उन्मुक्ति पाएकाले उनीहरुले सफाइ पाउन नसक्ने दाबी गरे। मुद्दा सोमबारलाई निरन्तर राखिएको छ। भोलि जिल्ला न्यायाधिवक्ता रामहरि शर्मा काफ्लेले बहस गर्नेछन्। उनीहरुको बहसपछि प्रतिवादीका कानुन व्यवसायीहरुले बहस गर्नेछन्।
तस्करी भएर अवैध रुपमा नेपाल भित्रिएको साढे ३३ केजी सुन खोज्ने क्रममा १८ फागुन २०७४ मा सनम शाक्यको हत्या भएको थियो। उक्त हत्याको अभियुक्तलाई खोज्दै जाँदा सुन तस्करीको सञ्जाल नै फेला परेको थियो। मोरङ प्रहरीले अनुसन्धान गरि १९ वैशाख २०७५ मा त्यसपछि थप तीन पटक मोरङ जिल्ला अदालतमा जम्मा ७७ जनाविरुद्ध दर्ता गराएको थियो।
जिल्ला अदालत मोरङका अनुसार देशकै चर्चित संगठित सुन तस्करी र अपहरण तथा शरिर बन्धक र हत्या आरोपको मुद्दाको अन्तिम सुनवाइका लागि काठमाडौबाट समेत चर्चित कानुन व्यवसायी पुगेका छन्।
सरकारी पक्षको बहस सकिएपछि प्रतिवादीतर्फका अलग अलग कानुन व्यवसायीले बहस गर्नेछन्। उनीहरुको बहसपछि सरकारी वकिलले जवाफ दिँदै फैसला हुनेछ।
मोरङ प्रहरीले सुरुमा मुख्य योजनाकार गोरे भनिने चूडामणि उप्रेतीसहित पहिलो पटक ६३ जना, त्यसपछि थप तीन पटक गरेर जम्मा ७७ जनाविरुद्ध संगठित सुनतस्करी र सनम शाक्य हत्या आरोपमा मुद्दा दर्ता गराएको थियो। हालसम्म आरोपीमध्ये ५५ जना अदालतमा हाजिर भएका छन् भने २२ जना अझै फरार छन्। उनीहरुको हकमा म्याद तामेली हुन नसकेपछि अदालतले अन्तिम सुनुवाइ अघि बढाएको हो।
उक्त विवादमा केही बहालवाल र पूर्वप्रहरी अधिकृतसमेत तानिएका थिए। तत्काल पुर्पक्षका लागि थुनामा पठाइएका अभियुक्त्त पूर्वडीआईजी गोविन्द निरौला, एसएसपी दिवेश लोहनी, एसपी विकासराज खनाल, डिएसपी प्रजित केसी, सई बालकृष्ण सञ्जेल साधारण तारेखमा र रामकुमार तिवारी, प्रभात अग्रवाल, विमल पोद्दार, राजेन्द्रकुमार शाक्य, राजकुमार दारुका, मदनप्रसाद घिमिरे, शैयत अक्बर र इम्तियाजलगायत उच्च अदालतबाट धरौटीमा छाडिएका थिए।
यस्तो थियो सुुन तस्करी प्रकरण
२०७४ मंसिरमा थाई एयरलाइन्सबाट आएको साढे ३३ केजी सुन गायब भएपछि यो प्रकरण सुरु भएको हो। उक्त सुन खोजी गर्ने क्रममा १८ फागुन २०७४ मा सुन तस्करीका नाइके चूडामणि उप्रेती (गोरे) का सहयोगी मोरङ उर्लाबारी नगरपालिका ७ का युवा सनम शाक्यको हत्या भएको थियो। उनको अपहरणपछि हत्या गरिएको थियो। शाक्यको शव १९ फागुन २०७४ मा स्कर्पियो जिपभित्र विराटनगर १ पोखरियामा फेला परेको थियो। घटनास्थलबाट टेकराज मल्ल ठकुरी, मोहन काफ्ले र कृष्ण कार्की पक्राउ परेका थिए।
उक्त्त हत्यापछि सरकारले उच्चस्तरीय छानबिन टोली गठन गरेर सुन तस्करीको छानबिन गरेको थियो। छानबिन समितिको प्रतिवेदनको आधारमा नेपाल प्रहरीले विभिन्न चरणमा सरकारी वकिलको कार्यालय मोरङमार्फत् जिल्ला अदालत मोरङमा अपराधिक समूह स्थापना गरी सुन चोरी पैठारी निकासी गरी अवैध कारोबार गरेको र मानव अपहरण गरी हत्या गरेको आरोपमा ७७ जनाविरुद्ध अभियोग दर्ता गराएको थियो।
सबै अभियुक्त उपर २०१५ जुलाईदेखि २०१६ अगस्टसम्म संगठित आपराधिक सञ्जाल बनाएर १७ अर्ब १ करोड ८० लाख ७१ हजार ४ सय ७३ रुपैयाँ बराबरको ३७ लाख ९९ हजार ५ सय ६३ ग्राम बराबर सुन तस्करी गरेको उक्त प्रतिवेदनमा दाबी गरिएको थियो।
उक्त्त मुद्दामा पूर्वडीआईजी गोविन्द निरौला, एसएसपी दिवेश लोहनी, एसपी विकासराज खनाल, डीएसपी प्रजित केसी, सई बालकृष्ण सञ्जेल प्रहरी हवल्दार विष्णुबहादुर खड्का र अम्मरबहादुर खड्काविरुद्ध पनि अभियोग रहेको छ। यो विवादमा भएको थुनछेक धरौटी सुनुवाइ निकै विवादित भएको थियो। उच्च अदालतका मुख्य न्यायाधीशदेखि केही न्यायाधीश छानविनमा समेत तानिएका थिए। पछि सर्वोच्च आएर धरौटी र थुनछेकको मुद्दा टुङ्गो लागेको थियो। हाइप्रोफाइल उक्त मुद्दाका कारण केही न्यायाधीशले जागिरसमेत गुमाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
