काठमाडौं- नेकपा (एमाले)को केन्द्रीय कमिटीको जारी बैठकको दोस्रो दिन १० समूहका नेताले रिपोर्ट प्रस्तुत गरेका छन्। ललितपुरस्थित तुल्सीलाल स्मृति प्रतिष्ठान भवनमा बसेको बैठक साढे ३ बजे सुरु भएर झण्डै तीन घण्टासम्म बसेको थियो।
शुक्रबारै गठन गरिएको १० समूहले आज राजनीतिक प्रतिवेदन, संगठनात्मक प्रस्ताव र विधान संशोधनसम्बन्धी प्रस्तावमा छलफल गरेका थिए। त्यसपश्चात् बसेको केन्द्रीय कमिटीको बैठकमा समूह नेताले रिपोर्ट प्रस्तुत गरेका हुन्।
बैठकमा जबजको मार्गनिर्देशनमा २०६२/६३ को ऐतिहासिक जनक्रान्ति र संविधान निर्माणसम्म आइपुग्दा लोकतान्त्रिक जनवादी क्रान्ति सम्पन्न गरिसकेकाले अब त्यसका उपलब्धिहरुलाई संस्थागत र सुदृढ गर्दै समाजवादको आधार निर्माण गर्ने कुरालाई पार्टीको कार्यदिशाको रुपमा अगाडि बढाउनुपर्छ भनेर धेरै टोलीले सुझाव दिएको एमाले प्रचार विभाग प्रमुख योगेश भट्टराईले जानकारी दिए।
त्यस्तै, केही समूहका नेताले नेपालको कम्युनिस्ट आन्दोलन एकता र विभाजनको कालखण्डबाट गुज्रिँदै आएको भए पनि एमालेचाहिँ एकताको प्रतीक भएको बताएका थिए। ‘त्यसैले विभाजित भएको कम्युनिस्ट आन्दोलनलाई एकताबद्ध गर्ने ऐतिहासिक कार्यभार नेकपा एमालेले नै पूरा गर्नुपर्छ भन्ने सुझाव आएको छ। त्यसका निम्ति सबै कम्युनिस्ट पार्टीहरुसँग छलफल, संवाद, उहाँहरुको गलत विचारसँग छलफल र संवादको प्रक्रियाबाट रुपान्तरण गर्ने, कम्युनिस्ट आन्दोलनमा देखिएको संकीर्णता, गुटवादी प्रवृत्तिहरु, विभाजनकारी प्रवृत्तिहरुमाथि संघर्ष गर्दै एउटै कम्युनिस्ट पार्टी बनाउने कार्यदिशा नेकपा एमालेको हुनुपर्छ भन्ने कुरा पनि समूहबाट आएको छ,’ भट्टराईले भने।
त्यस्तै, पार्टीमा क्रमशः पुरानो पुस्ताको बाहुल्यता बढ्दै गएकाले यसलाई नवीनीकृत गर्दै लैजानका निम्ति प्रत्येक तहमा युवाहरुको उल्लेखनीय सहभागिता, नीति निर्माणदेखि कार्यान्वयनको तहमा, जनप्रतिनिधिदेखि पार्टी नेतृत्वको तहमा समेत युवाहरुको उल्लेखनीय सहभागिता बढाउनुपर्छ भन्ने सुझाव पनि आएका थिए।
पार्टीलाई समावेशी चरित्रको बनाउनुपर्ने सुझाव पनि आएका थिए।
‘पार्टीको सम्पूर्ण ध्यान आगामी निर्वाचनमा पार्टीले श्रेष्ठता हासिल गर्ने गरी जानुपर्छ। स्थानीय तहको निर्वाचन फागुन महिनामा हुँदैछ। सम्पूर्ण तयारी त्यसमा लाग्नुपर्छ। स्थानीय तहमा पहिलेको भन्दा राम्रो परिणाम ल्याउनेगरी हामीले काम गर्नुपर्छ भन्ने सुझाव आएको छ। आगामी संसदीय र प्रदेशको चुनावमा पार्टीले बहुमत ल्याउने गरी सम्पूर्ण शक्ति एकताबद्ध भएर आगामी प्रतिस्पर्धामा पार्टीलाई श्रेष्ठ सावित गर्ने ढंगले अगाडि जानुपर्छ भन्ने सुझाव आएका छन्,’ भट्टराईले भने।
सात वटा प्रदेश भएकाले प्रादेशिक ढंगले गर्ने सात वटा प्रदेशका उपाध्यक्ष हुनुपर्ने सुझाव पनि आएको उनको भनाइ छ।
सम्पूर्ण सुझावहरुको बारेमा पार्टी अध्यक्ष र प्रतिवेदन प्रस्तोताले भोलिको बैठकमा थप प्रस्टीकरण गर्ने र पुष्टि गर्ने काम हुने भट्टराईले बताए। ‘विधान महाधिवेशनका अन्य तयारीका कामहरु गर्नुपर्नेछ। त्यसैले भोलि ११ बजे सम्मका निम्ति बैठक स्थगित भएको छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
