काठमाडौं– नेकपा एमाले र माओवादी केन्द्र पार्टी एकीकरणको नजिक पुगेका छन् । आज मंगलबार साँझसम्म स्पष्ट खाकासहित यी दुई दलबीच एकीकरण हुने वार्तारत नेताहरुको दाबी छ।
यो एकीकरण प्रक्रियाको सूत्राधार वामदेव गौतम भन्छन्, ‘केही स–साना मुद्दा मात्र मिल्न बाँकी छ। हामी एकीकरणको नजिक छौं। साँझसम्म ठोस सहमति हुनेछ।’ गौतम र एमाले महासचिव ईश्वर पोखरेलले ४ वर्षअघि बनाएको पार्टी एकीकरणको प्रस्ताव नजिक रहेरै दुई दलबीच सहमति हुन लागेको हो।
तत्काल को प्रधानमन्त्री बन्ने भन्ने विषय टुंगिए अन्य विषयमा दुई दल सहमति नजिक पुगेका छन्। पुष्पकमल दाहाल ‘प्रचण्ड’का विश्वासपात्र माओवादी केन्द्रका स्थायी समिति सदस्य वर्षमान पुनका अनुसार आसन्न प्रतिनिधिसभा र प्रदेशसभाको चुनावी सरकारको नेतृत्व प्रचण्डले गर्ने गरी सहमति हुनेछ।
एमाले अध्यक्ष ओली भने विगतमा संसदीय दलको नेता र पार्टी अध्यक्ष बन्न सघाएका गौतमलाई दुई महिने प्रधानमन्त्री बनाएर भए पनि गुन तिर्ने अडानमा छन्। प्रचण्डको चाहना भने चुनावी सरकारको नेतृत्व आफूले गर्ने र त्यसपछि राष्ट्रपति हुनेछ। प्रचण्डलाई राष्ट्रपति बनाउन एमाले तयार छ। तर, तत्काल को प्रधानमन्त्री भन्ने भन्नेमा मात्र कुरा मिलिरहेको छैन।
शान्ति प्रक्रियामा आएदेखि नै माओवादीले प्रचण्डलाई भावी कार्यकारी राष्ट्रपतिका रुपमा प्रस्तुत गर्दै आएको थियो। राजधानीका रित्ता भित्ताहरुमा ‘गणतन्त्र नेपालको पहिलो कार्यकारी राष्ट्रपति’ भनेर प्रचण्डको तस्बिर पोतेको थियो माओवादीले। कार्यकारी राष्ट्रपतिको व्यवस्था नभएपछि प्रचण्ड आफैंले पनि आलंकारिक राष्ट्रपति हुन जोड गरेनन् र ‘भित्ते राष्ट्रपति’ भनेर उनको मजाक उडाइयो। अब भने प्रचण्ड त्यो ‘इगो’ मेट्न आलंकारिक राष्ट्रपति भए पनि बन्न तयार भएका छन्।
यसबाहेक माओवादीले ७ मध्ये ३ प्रदेशमा आफ्ना उम्मेदवार मुख्यमन्त्री हुनुपर्ने अडान लिएको छ। एमाले सकभर २ वटा प्रदेशमा मात्र माओवादीलाई मुख्यमन्त्री छाड्ने मनस्थितिमा छ।
स्थानीय तहको तेस्रो चरणको चुनावमा प्रदेश–२ मा पाँचौ स्थानमा खुम्चिएको एमाले त्यहाँ आफ्नै उम्मेदवारलाई मुख्यमन्त्री बनाउन चाहन्छ। तर प्रदेश २, ३ र ५ को मुख्यमन्त्री आफ्नो हुनुपर्ने माओवादी दाबी छ।
एमाले अध्यक्ष ओली तत्कालका लागि गौतमलाई प्रधानमन्त्री र पार्टी एकीकरणपछिको अध्यक्ष महासचिव ईश्वर पोखरेललाई बनाउन चाहन्छन्। आफूलाई एमाले सुप्रिमो बन्न सघाएका यी दुई पात्रलाई चिढाउन उनले चाहेका छैनन्। ओली आसन्न दुई तहको चुनावपछि फेरि एकपटक संसदीय दलको नेता चुनिँदै प्रधानमन्त्री बन्न चाहन्छन् । जुन कुरा यी दुई नेताको साथबिना सम्भव छैन।
एकीकरणपछि पार्टीको महासचिव को बन्ने भन्नेमा पनि सहमति जुटेको छैन। माओवादीले महासचिवमा दाबी त गरेको छ तर त्यहाँ पनि उपप्रधानमन्त्री कृष्णबहादुर महरा र पुनको दाबी छ। ओली लामो समयदेखि आफूनिकट नेता विष्णु पौडेललाई महासचिव बनाउन चाहन्छन्। एकीकरणको टुंगो लागे विधान संशोधन गरेर भए पनि एमालेमा दुई महासचिव बनाउने तयारी छ। एक माओवादी केन्द्रबाट हुनेछन् भने अर्को एमालेबाट।
माओवादीको भारी भरकम केन्द्रीय कमिटीका कारण पनि एकीकरणपछिको पद मिलान कसरी गर्ने भन्ने समस्या देखिएको वार्तामा सहभागी एक नेताले जानकारी दिए। तत्कालको अर्को समस्या नारायणकाजी श्रेष्ठलाई कसरी व्यवस्थापन गर्ने भन्ने छ। उनी एकीकरणपछि ईश्वर पोखरेल अध्यक्षताको एमालेमा उपाध्यक्षमा बस्छन् कि बस्दैनन् भन्ने छ। ओली नै अध्यक्षमा रहिरहे श्रेष्ठ उपाध्यक्ष बस्न तयार हुनेछन्। नभए उनलाई वरिष्ठ नेता बनाएर भए पनि सहमति जुटाउने प्रयास जारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
