पोखरा- गण्डकीका मुख्यमन्त्री कृष्णचन्द्र नेपाली पोखरेलको निमन्त्रणमा प्रदेश २ का मुख्यमन्त्री लालबाबु राउतसहितको टोलीले बुधबार पोखराको भ्रमणमा गरेको छ। मुख्यमन्त्री पोखरेलको कार्यकक्षमा उनीहरुबीच बुधबार नै औपचारिक भेटवार्ता भएको छ।
भेटवार्ताका क्रममा गण्डकीका मुख्यमन्त्री पोखरेलले संविधानत: मुलुक संघीय लोकतान्त्रिक गणतन्त्रमा गएपछि स्थापना भएको प्रदेश सरकारले जनताको चाहनाबमोजिमको सेवा तथा विकास प्रवाह गर्ने सवालमा धेरै चुनौतीको सामना गर्नुपरेको बताए। उनले भने, ‘अधिकारको निक्षेपणमा संघीय सरकारको मानसिकता अझै पनि केन्द्रीकृत नै देखिन्छ। त्यसैले आगामी दिनमा हाम्रा बीचको सहकार्य अझ घनिभूत बनाउन आवश्यक छ।’
राजस्व बाँडफाँटमा संघले धेरै राखेर प्रदेशलाई उपलब्ध गराउने गरेको सानो अंशले विकासका आवश्यकताहरु पूरा हुने अवस्था नभएको उल्लेख गर्दै उनले यसलाई बढाउन पहल गर्नुपर्ने बताए।
संघीय सरकारले कर्मचारी समायोजनमा पर्याप्त भूमिका नखेलेको, शान्ति सुरक्षालगायतका मुख्य काममा प्रदेशलाई अधिकार नदिँदा प्रदेश सरकार चाहेर पनि काम गर्नसक्ने अवस्थामा नरहेको उनको भनाइ थियो। उनले भने, ‘ठूला विकासका कार्य अघि बढाउन जग्गा प्राप्तिको समस्या, विकास निर्माणमा बाधक विभिन्न कानुनी व्यवस्था आदिको सुधार तथा संशोधनमा पनि संघीय सरकारले ध्यान दिएको छैन।’
ठूला विकास साझेदारको स्रोत परिचालन संघबाट हुने गरेको भन्दै मुख्यमन्त्री पोखरेलले यसमा प्रदेशको संलग्नता वृद्धि हुनुपर्ने बताए। अन्तरप्रदेश समन्वय परिषद्को बैठक नियमित बस्ने र समस्याको समाधान निकाल्नेतर्फ पनि घच्घच्याउनु आवश्यक रहेको उनको भनाइ थियो।
साझा सरोकारका विषयमा समय-समयमा मुख्यमन्त्रीहरुबीच छलफल गरी अनुभव तथा सहयोगको आदानप्रदान तथा संघीयताको प्रवर्द्धनका लागि स्पष्ट धारणा बनाउन आवश्यक रहेको मुख्यमन्त्री पोखरेलले बताए। ‘सबै प्रदेशका मुख्य मन्त्रीज्यूहरुसँग समन्वय गरी उपयुक्त समयमा मुख्यमन्त्रीहरुको छलफल कार्यक्रम पोखरामा आयोजना गर्न इच्छुक रहेको व्यहोरा पनि अनुरोध गर्दछु।’
गण्डकी प्रदेश र प्रदेश २ बीचमा धेरै समानता र सहकार्यको सम्भावना रहेको उनले बताए। प्रदेशको समृद्धि र जनताको सुखका लागि सहकार्य अति आवश्यक रहेको मुख्यमन्त्री पोखरेलको भनाइ थियो।
पर्यटन प्रवर्द्धनमा प्रदेश २ का साँस्कृतिक धरोहरु जानकी मन्दिर, गढीमाईको मन्दिर र मेला, छिन्नमस्ता मन्दिर, सहलेस फूलबारी, धनुषा क्षेत्र, जलेश्वरनाथ महादेव आदिजस्ता स्थल रहेको स्मरण गर्दै मुख्यमन्त्री पोखरेलले गण्डकी प्रदेशमा आएका पर्यटकलाई प्रदेश २ र प्रदेश २ मा आएका पर्यटकलाई गण्डकी प्रदेशमा जानका लागि अभिप्रेरित गर्ने कार्य निजी क्षेत्रको अगुवाइमा अगाडि बढाउन सकिने भनाइ राखे।
प्रदेश २ का मुख्यमन्त्री राउतले संघीयतालाई मजबुत बनाउन आफूहरुले निकै संघर्ष गर्नुपरेको बताए। साढे दुई वर्ष अगाडि पोखरामा मुख्यमन्त्रीहरुको सम्मेलन भएको स्मरण गर्दै उनले त्यो सम्मेलनले उठाएका सवाललाई सम्बोधन गर्न तत्कालीन प्रधानमन्त्री केपी शर्मा ओली तर्सेको बताए। उनले भने, ‘संघ र छ प्रदेशमा कम्युनिस्ट पार्टीकै सरकार थियो, अधिकार हस्तान्तरण गर्न असहज थिएन तर त्यतिबेला प्रधानमन्त्रीज्यूले प्रदेशका कुरा सुन्नै चाहनुभएन।’ अधिकारकै लडाइँका क्रममा आफूहरु संघ सरकारसँग मुद्दा लडिरहेको बताउँदै अधिकार नपाएसम्म संघर्ष जारी रहने उनको भनाइ थियो।
भौतिक विकासमात्र नभएर सामाजिक रुपान्तरण हुनुपर्छ भनेर प्रदेश सरकारले महिला जागरण, बालिका सशक्तीकरण, सरसफाइजस्ता अभियान थालेको उनले बताए। विकासका सवालमा प्रदेश २ र गण्डकीमा फरक रहेको भन्दै अनुभव आदानप्रदान गर्दै सहकार्य गर्नुपर्नेमा जोड दिए। सांस्कृतिक सहर जनकपुर र पर्यटकीय सहर पोखराबीच हवाई सम्बन्ध कायम गरी भारतीय पर्यटकलाई आकर्षित गर्न सकिने उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
-1764146706.png)
