काठमाडौं-अन्तिम समयमा सम्हालिन नसक्दा नेपाल एएफसी महिला एसियन कप–२०२२ को छनोटअन्तर्गत फिलिपिन्ससँग पराजित भएको छ।
उज्वेकिस्तानको जेएआर स्टेडियमा सम्पन्न समूह ‘ए’ को पहिलो खेलमा नेपाल बलियो प्रतिद्धन्द्धी फिलिपिन्ससँग २–१ गोल अन्तरले पराजित भएको हो।
खेलमा सुरुवाती अग्रता भने नेपालले लिएको थियो। नेपालका लागि विमला चौधरीले १०औं मिनेटमा गोल गर्दै अग्रता दिलाएकी थिइन्। उनले हेडमार्फत् उत्कृष्ट गोल गरिन्।
तर, ३९औं मिनेटमा विमला चोट बोक्दै मैदानबाट बाहिरिएकी थिइन्। विमलाको स्थानमा अनिता बस्नेत मैदान प्रवेश गरेकी थिइन्।
दोस्रो हाफमा मैदान प्रवेश गर्दै डिफेन्डर विमला विकले सिनियर टोलीबाट डेब्यू गरिन्। उनले ६३ अौं मिनेटमा पुजा रानाको स्थान लिएकी थिइन्।
नेपालले खेलको ९०अौं र इन्ज्युरी समयको दोस्रो मिनेटमा गोल खायो। खेलको ९०औं मिनेटमा ताहनाई अन्निसले डिबक्स बाहिरबाट आएको पासलाई नियन्त्रणमा लिँदै नेपाली डिफेन्डरलाई ट्याप अन गर्दै गोल गरेकी थिइन्।
यस्तै, केमिली विल्सन ९२औं मिनेटमा गोल गर्दै फिलिपिन्सलाई २–१ ले जित दिलाइन्। डिबक्स भित्रबाट हुलमुललाई चिर्दै आएको बललाई बिना मार्कमा रहेकी विल्सनले जाली चुमाएकी थिइन्।
महिला फुटबलमा नेपाल र फिलिपिन्स दोस्रोपटक खेलेको हो। यसअघि १९९९ मा भएको एएफसी महिला च्याम्पियनसिपमा नेपाल ५–० गोल अन्तरले पराजित भएको थियो।
छनोटको तयारीका लागि नेपाली टोलीले घरेलु मैदान दशरथ रंगशालामा बंगलादेशसँग दुई मैत्रीपुर्ण खेल खेलेको थियो। पहिलो मैत्रीपुर्ण खेलमा नेपालले सविता रानामगर र प्रीति राईले डेब्यू खेलमै गोल गरेपछि नेपालले २–१ को जित निकालेको थियो। दोस्रो मैत्रीपुर्ण खेल गोलरहित बराबरीमा सकिएको थियो।
अब समूह ‘एफ’ मा नेपालले मंगलबार हङकङसँग खेल्नेछ। यस समूहको फिलिपिन्स र हङकङबीचको ८ असोजमा हुनेछ। फिलिपिन्सले पहिलो खेलमा जित निकाल्दै ३ अंक जोडेको छ।
नेपालले हङकङविरुद्धको खेल जितेमा एसियन कपका लागि छनोट सम्भावना जिवित रहनेछ। समूहको शीर्ष टोलीले अर्को वर्ष भारतमा हुने एसियन कप खेल्नेछ। एसियन कप २० जनवरीदेखि ६ फेब्रुअरीसम्म हुनेछ।
एसियन कप छनोट भए नेपाल विश्वकप छनोटमा पनि अघि बढ्नेछ। एएफसीले एसियन कपकै नतिजाले विश्वकपमा छनोट हुने उल्लेख गरेको छ। एसियन कपमा छनोट भएमात्र विश्वकप छनोटमा अघि बढ्न सकिने जनाइएको छ।
नेपालले यसअघि १९८६, १९८९ र १९९९ मा पनि एसियन कप खेलेको थियो। सुरुवाती दुवै पटक प्रतियोगिता हङकङमा भएको थियो। नेपाल सबै ६ खेलमा पराजित हुँदा गोल गर्न सकेको थिएन। १९९९ को प्रतियोगितामा भने नेपालले चौथो तथा अन्तिम खेलमा गोल गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
