काठमाडौं- तालिबानले सरकार गठन गरेसँगै अफगानिस्तानका राष्ट्रिय महिला टोलीको उमेर समूहका सदस्यहरुले देश छाडेका छन्। महिला टोली तोर्खाम नाका पार गर्दै मंगलबार पाकिस्तान आइपुगेको त्यहाँका सूचनामन्त्रीले जानकारी दिएका हुन्।
अफगानिस्तान र पाकिस्तानबाट आवतजावत गर्ने मुख्य नाकाका रूपमा तोर्खाम नाकालाई लिइन्छ। उक्त नाका पाकिस्तानले सुरक्षाका कारण केही समय बन्द गरेको थियो। तर, तालिबानसँगको वार्तासँगै उक्त नाका पुनः खुल्ला गरिएको छ।
‘अफगानी महिला फुटबल टोली छिमेकी राष्ट्र पाकिस्तान आइपुगेका छन्,’ पाकिस्तानी सूचनामन्त्री फवाद चौधरीले भने, ‘हामी अफगानी महिला फुटबल टोलीलाई स्वागत गर्दछौं।’
चौधरीले एक ट्वीटमा उनीहरुलाई पाकिस्तान फुटबल महासंघका एक प्रतिनिधिले स्वागत गरेको जानकारी दिएका छन्। चौधरीले सुरक्षाका कारण अन्य कुनै विवरण खुलाएका छैनन्। यस्तै, उनीहरु के कारणले पाकिस्तान पुगेका हुन् र कति खेलाडी पुगेका हुन् भन्ने कुरा पनि खुलाएका छैनन्।
यद्यपि, ‘फुटबल फर पिस’ नामक बेलायती गैरसरकारी संस्थाका अनुसार तोर्खाम नाका पार गर्नेमा ३२ खेलाडी र उनीहरुको परिवारसहित १ सय २५ जना थिए। उनीहरुलाई पाकिस्तान सरकार, फुटबल फर पिस र पाकिस्तान फुटबल संघका अस्फाक हुसैन साहले सहयोग गरेका थिए ।
एक महिना अघि तालिबानले देश कब्जा गरेपछि अफगानिस्तानका बौद्धिक र सार्वजनिक व्यक्तित्वहरुका साथै विशेष गरि महिलाहरु व्यापक रुपमा पलायन भइरहेका छन्।
दुई दशक पहिले अफगानिस्तानमा तालिबान समूहले अन्तिम पटक शासन गर्दा महिलाहरुलाई विद्यालय जान दिइएको थिएन। यस्तै, महिलाहरुलाई काम गर्न र शिक्षा लिन पनि प्रतिबन्ध लगाइएको थियो। त्यस्तै, महिलाहरुलाई खेलकुदमा भाग लिन प्रतिबन्ध लगाइएको थियो र यो शासनमा पनि जारी रहने सम्भावना छ।
तालिबानका एक प्रतिनिधिले गत हप्ता अस्ट्रेलियाली प्रसारक एसबीएससँग कुरा गर्दै महिलाहरुलाई क्रिकेट खेल्न नदिने संकेत गरेका थिए। उनले यो जरूरी नभएको र इस्लामिक कानुनविरुद्धमा रहेकोसमेत बताएका थिए।
एसबीएसले तालिबानको सांस्कृतिक आयोगका उपप्रमुख अहमदुल्लाह वसीकलाई उद्धृत गर्दै भनेको छ,‘इस्लाम र इस्लामिक इमिरेटले महिलाहरुलाई क्रिकेट खेल्न वा त्यस्तो खेल खेल्न अनुमति दिँदैनन्, जहाँ उनीहरुको नियम उल्लघंन हुन्छ।’
तालिबानको कब्जा पछि धेरै पूर्व र वर्तमान महिला फुटबल खेलाडीहरु देश छोडेर पलायन भएका छन्। महिला टोलिका एक पूर्वकप्तानले अफगानिस्तानमा रहेका खेलाडीहरुलाई आफ्नो खेलकुद पेशाक र तस्बिर जलाउन आग्रह गरेकी थिइन्। उनले तालिबानले बदला लिने भन्दै ज्यान जोगाउन लागि आफ्नो सामाजिक सञ्जालका खाताहरु बन्द गर्न आग्रहसमेत गरेका थिए।
फुटबलको सर्वोच्च निकाय फिफाले गत महिना अफगानिस्तानमा रहेका खेलाडीहरुलाई उद्धार गर्ने क्रम जारी रहेको जानकारी दिएको थियो। यसअघि राष्ट्रिय फुटबल महिला टोलीका उमेर समूहका खेलाडीहरु खेलकुदमा गतिविधिमा सहभागि भएको भन्दै तालिबानले पटकपटक धम्की दिँदै आएको समाचारहरु प्रकाशित भएका थिए।
कतार जाने तय भएपनि अगस्ट २६ मा काबुल विमानस्थलमा बम विस्फोट भएपछि उनीहरुको अलपत्र परेका थिए।
यद्धपि, अफगान राष्ट्रिय सिनियर टोलीका अधिकांश सदस्यहरु भने अस्ट्रेलिया सरकारको सहयोगमा कतार पुगेका थिए। तर, उमेर समूहका खेलाडीहरुसँग पासपोर्टलगायतका आवश्यक कागजात नभएका कारण उनीहरु कतार जान पाएका थिएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
