काठमाडौं- माओवादी केन्द्र र एमालेबीच नयाँ गठबन्धन निर्माणको तयारी अन्तिम चरणमा पुगेपछि त्यसलाई रोक्न नेपाली काग्रेस पनि सक्रिय भएको छ।
प्रदेश र प्रतिनिधि सभा निर्वाचन तथा सरकारको नेतृत्वमा फेरबदल हुने सम्भावना देखिएपछि गठबन्धन बचाउन काग्रेसका नेताहरु सक्रिय भएका हुन्।
एमाले र माओवादी गठवन्धन रोक्न प्रधानमन्त्री एवं पार्टी सभापति शेरबहादुर देउवा र वरिष्ठ नेता रामचन्द्र पौडेलले मंगलबार बिहान माओवादी केन्द्रका अध्यक्ष पुष्पकमल दाहाल 'प्रचण्ड'सँग एक घन्टा छलफल गरेका थिए।
प्रधानमन्त्री निवास वालुवाटारमा भएको वार्तामा माओवादी केन्द्रका अध्यक्ष प्रचण्डले चुनावी तालमेलका लागि एमालेबाट प्रस्ताव आएको र वाम गठबन्धन बनाएर निर्वाचनमा जाने सहमति भएको जानकारी कांग्रेसलाई गराएको नेता पौडेलले बताए। लगत्तै प्रधानमन्त्री देउवाले वर्तमान गठबन्धन तोड्ने काम नगर्न प्रचण्डलाई आग्रह गरेका थिए।
'सहमति अनुसार हाम्रो गठबन्धन सबै तहको चुनावसम्मको लागि हो, प्रधानमन्त्रीको भनाई उद्धृत गर्दै पौडेलले भने, 'सहमतिको पालना गर्दै गठबन्धन कायम हुनुपर्छ।'
प्रचण्डले सरकारसँगको गठबन्धन कायम हुने जवाफ दिएका छन्। निर्वाचनसम्मको गठबन्धनका पार्टीभित्र छलफल गरेरमात्रै निर्णय लिने उनले प्रधानमन्त्रीलाई बताएका छन्। 'सत्ता गठबन्धनमा हामी प्रतिबद्ध छौँ आगामी निर्वाचनमा सहकार्यका लागि एमालेसँग सहमति भएको अवस्थामा अर्को निर्णय पार्टीभित्र छलफल गरेर मात्रै लिन सकिन्छ', प्रचण्डले प्रधानमन्त्रीलाई भने।
कांग्रेस र माओवादी केन्द्रबीच स्थानीय तहमा तालमेल भएको थियो। प्रदेश र प्रतिनिधिसभा निर्वाचनमा वर्तमान गठबन्धन कायम राख्दै तालमेल गर्ने कुरामा सहमति नजुटेपछि शीर्ष नेताबीच अपरान्ह तीन बजे छलफल हुने भएको छ। निर्वाचनमा कांग्रेस र माओवादीको पोजिसन क्लियर गर्ने किसिमले तीन बजेको बैठकमा छलफल हुने नेता पौडेलले बताए। 'माओवादी केन्द्रले निर्वाचनमा तालमेलका पोजिसन क्लियर हुनुपर्ने प्रस्ताव राखेको छ, पौडेलले भने, 'हामी पोजिसनका विषयमा छलफल गर्छौ।'
कांग्रेस र माओवादी केन्द्रबीच दीर्घकालीन सहकार्य कायम राख्न वार्ता टोली समेत बनाएर छलफल थाल्ने तयारी भएको नेता विमलेन्द्र निधिले जानकारी दिए। 'काँग्रेस र माओवादी केन्द्रबीच दीर्घकालीन सहकार्यका लागि हामी प्रतिबद्ध छौँ , निधिले भने, 'माओवादीसँग वार्ताका लागि समिति बनाउने तयारी भइरहेको छ।'
प्रतिनिधिसभा र प्रदेशसभा निर्वाचनमा एक भएर जाने विगतको सहमति कार्यान्वयनका लागि समितिले दुबै पार्टीको पोजिसन प्रस्ताव गर्ने र प्रदेश सरकार र केन्द्र सरकारमा समेत छलफलका आधारमा भागबन्डा गर्ने ढंगले प्रस्ताव तयार गर्ने नेता निधिले बताए। अपरान्ह तीन बजे हुने छलफलबाट निष्कर्ष नआए वार्ता समिति गठन गर्ने कांग्रेसको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1794455419.jpg)
-1786602170.png)
