काठमाडौं- युरोपेली फुटबलको सर्वोच्च संस्था युईएफएका अध्यक्ष अलेक्स्यान्दर केफेरिनले स्पेनिस क्लब रियल मड्रिड र बार्सिलोना तथा इटालियन क्लब युभेन्टसले च्याम्पियन्स लिग नखेल्ने निर्णय लिए पनि समस्या नहुने बताएका छन्।
युईएफए संस्थापक १२ क्लबमध्ये तीन क्लब अर्थात बार्सिलोना, मड्रिड र युभेन्टस युरोपोली सुपर लिग (ईएसएल)को संस्थापक रहेका छन्।
सुपर लिग गत १८ अप्रिलमा घोषण गरिएको थियो। तर, सोही दिनदेखि यो विवादमा पर्न थाल्यो। फुटबलको विश्व प्रशासकीय निकाय फिफाले प्रतिस्पर्धालाई मान्यता नदिने र युईएफएले भाग लिने खेलाडी र क्लबमाथि प्रतिबन्ध लगाउने चेतावनी दिएपछि अन्य क्लबले नाम फिर्ता लिएको थियो।
उनले यी तीन क्लबले ईएसएल पनि खेल्ने र यस सिजन च्याम्पियन्स लिग पनि खेल्ने निर्णय आफूले बुझ्न नसकेको पनि बताए।
‘उनीहरूले छाडे पनि म माइन्ड गर्ने छैन। उनीहरू नयाँ प्रतियोगिता सुरु गर्न चाहन्छन् र यही समय यस सिजन च्याम्पियन्स लिग पनि खेल्न चाहन्छन्। यो निकै हास्यास्पद छ,’ उनले भने।
रियल, बार्सिलोना र युभेन्टसका अध्यक्षहरूले फुटबललाई मार्न चाहेको पनि उनले बताएका छन्।
‘यी तीन क्लबमा निरर्थक नेतृत्व छन्। फियोरेन्टिनो पेरेज, जोआन लापोर्टा र आन्द्रे एज्निल्लीले फुटबललाई मार्ने प्रयास गरेका छन्,’ उनले भने।
रियलका अध्यक्ष पेरेजले किलियान एमबाप्पेलाई पेरिस सेन्ट‑जर्मेन (पीएसजी)बाट भित्र्याउन गरेको कोसिसको पनि आलोचना गरे।
‘उनी सुपर लिग गर्न सकेमात्रै क्लब बाँच्न सक्ने बताइरहेका छन्। तर, यही समय एमबाप्पेलाई १८ करोड युरो तिरेर भित्र्याउने प्रयास पनि उनले गरेका छन्,’ उनले भने।
एमबाप्पेका लागि रियलले पीएसजीसामु १ सय ६० मिलियन युरोको औपचारिक प्रस्ताव राखेको थियो। तर, पीएसजीले उक्त प्रस्ताव अस्वीकार गरेको छ।
यो सिजनको समर ट्रान्सफर गत ३१ अगस्टको मध्यरातसँगै सकिएको छ। यस अगाडि सम्झौताको अन्तिम वर्षमा रहेका एमबाप्पेसँग सम्झौता हुनेमा रियलका प्रशिक्षक कार्लो एन्सेलोट्टी आशावादी रहेका थिए। तर, त्यो पूरा हुन सकेन।
जर्मनी समाचार माध्यमहरुका अनुसार युभेन्टस, बार्सिलोना र रियल आफ्नो सुपर लिग परियोजनाबाट बाहिरिएका छैनन। यद्यपि, प्रिमियर लिगबाट चेल्सी, लिभरपुल, आर्सनल, म्यानचेस्टर युनाइटेड, म्यानचेस्टर सिटी र टोटेनहमले नाम फिर्ता लिएका छन्।
यता, एसी मिलान र इन्टर मिलानले पनि प्रतिनिधित्व नजनाउने भएकाे छ। स्पेनबाट एटलेटिको मड्रिडले पनि नखेल्ने जनाइएकाे छ।
तर, युभेन्टस, बार्सिलोना र रियल नयाँ ढाँचा अनुसार लिग सञ्चालन गर्ने तरखरमा रहेका छन्। जसमा दुई डिभिजनहरु छन्: सुपर लिग १ र सुपर लिग २। याो लिगहरु पदोन्नति र रेलिगेशनको आधारमा सञ्चालन गरिनेछ।
उनले ‘फाइनान्सियल फेयर प्ले’ नियममा पनि केही संशोधन गरिने बताए। ‘हामी भविष्यमा फाइनान्सियल फेयर प्लेभन्दा पनि प्रतिस्पर्धात्मक सन्तुलनबारे कुरा गर्न चाहन्छौँ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
