काठमाडौं- युरोपको शीर्ष क्लब फुटबल प्रतियोगिता इंग्लिस प्रिमियर लिग आज (शनिबार) देखि पुन: सुरु हुँदै छ। करिब दुई साताको अन्तर्राष्ट्रिय ब्रेकपछि लिगको चौथो राउण्ड सुरु हुन लागेको हो।
आज लिगका विभिन्न ८ खेल प्रतिस्पर्धा हुनेछ। शीर्षस्थानमा रहेको टोटेनहमले क्रिस्टल प्यालेससँग साँझ ५:१५ बजे प्रतिस्पर्धा गर्दै छ।
टोटेनहम लगातार चौथो जितको खोजीमा रहेको छ। टोटेनह्यामले यसअघि लिग च्याम्पियन म्यानचेस्टर सिटी, वल्भ्स र वाटफर्डलाई समान १-० ले पराजित गरेको थियो।
यता, क्रिस्टल प्यालेस पहिलो जितको लक्ष्यमा मैदान उत्रनेछ। क्रिस्टलले चेल्सीसँग ३-० को हार बेहोरेको थियो भने ब्रेन्टफर्ड र वेस्ट ह्यामसँग बराबरी खेलेको थियो।
यता, आर्सनलले घरेलु मैदानमा नर्विच सिटीको आतिथ्यता गर्दै छ। आर्सनल पहिलो जित निकाल्ने योजनामा हुनेछ। आर्सनल ब्रेन्टफर्ड र चेल्सीसँग समान २-० ले पराजित भएको थियो। यस्तै, सिटीसँग ५-० को फराकिलो हार बेहोरेको थियो।
यता, नर्विच पनि पहिलो जितको खोजीमा रहनेछ।
अपराजित ब्रेन्टफर्डले ब्राइटनसँग खेल्दा लेस्टर सिटीले घरेलु मैदानमा साविकको विजेता सिटीको आतिथ्यता गर्दै छ। म्यानचेस्टर युनाइटेडले घरेलु मैदानमा न्युक्यासल युनाइटेडको सामना गर्दै छ।
साउथह्याम्टन र वेस्टह्याम तथा वाटफर्ड र वल्भ्सबीचको खेल पनि आज राति नै हुँदै छ।
यी सबै खेल राति ७:४५ बजेबाट सुरु हुनेछ।
गत सिजनको च्याम्पियन्स लिग च्याम्पियन चेल्सीले एस्टन भिल्लासँग राति १०:१५ बजे प्रतिस्पर्धा गर्दै छ।
अमेरिकी राष्ट्रका खेलाडीलाई आफ्नो क्लबबाट खेल्न दिने निर्णय
दक्षिण अमेरिकी राष्ट्रका खेलाडीले आफ्नो क्लबबाट प्रिमियर लिग खेल्न पाउने भएका छन्। फुटबलको सर्वोच्च निकाय फिफाको समन्वयमा उनीहरुलाई आ-आफ्नो क्लबबाट प्रिमियर लिग खेल्न दिन लागिएको हो।
फिफासँग ब्राजिल, चिली, पाराग्वे र मेक्सिको फुटबल संघसँगको छलफलपछि यी राष्ट्रले आफ्नो पाँच दिनको प्रतिबन्ध माफ गर्न सहमत भएको हो। तर, अर्जेन्टिनाका खेलाडीले भने खेल्न नपाउने भएको छ।
अब लिभरपुलका फाविन्हो, एलिसन बेकर र रोबर्टो फिर्मिनो, सिटीका एडर्सन मोराएस र गाब्रियल जेसस, युनाइटेडका फ्रेड र चेल्सीका थियागो सिल्भा खेल्न योग्य हुनेछन्। यस्तै, लिड्सका राफिन्हा, वल्भ्सका राउल जिमिनेज, वाट्फोर्डका फ्रान्सिस्को सिएराल्टा, न्यु क्यासलका मिगुएल अल्मिरोन र ब्ल्याकबर्नका बेन ब्रेरटनले पनि क्लबबाट खेल्न पाउनेछन्।
प्रिमियर लिग क्लबले खेलाडीलाई आफ्नो देशको लागि पछिल्लो अन्तर्राष्ट्रिय खेलका लागि कोरोनाको रेड लिस्टमा रहेका राष्ट्रमा नपठाउने निर्णय गरेको थियो। ब्राजिलले विश्वकप छनोटका केही खेल प्रिमियर लिग खेल्ने नौ खेलाडीबिना नै खेलेको थियो।
फिफाको नियमअनुसार क्लबहरुले खेलाडी फुकुवा गर्न नमाने अन्तर्राष्ट्रिय खेल सकिएको पाँच दिनसम्म प्रतिबन्ध लगाउन पाउने प्रावधान रहेको छ।
यता बेलायतको रातो सूचीमा रहेको ब्राजिल पुगेका अर्जेन्टिनी जियोभानी लो सेल्सो, क्रिस्टियन रोमेरो, एमिलियानो बुएन्डिया र एमिलियानो मार्टिनेजले प्रिमियर लिगको यो साताको पहिलो खेल गुमाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
